IINDUMISO 13

₁Kunini na, Yehova, undilibele kwaphela?

Kunini na ubusithelisa ubuso bakho kum?

₂Kunini na ndicebacebisana nomphefumlo wam,

Ndinesingqala entliziyweni yam imini le?

Kunini na lundiphakamele utshaba lwam?

₃Bheka undiphendule, Yehova, Thixo wam;

Khanyisa amehlo am, hleze ndilale ukufa;

₄Hleze utshaba lwam luthi, Ndimeyisile;

Bagcobe abandibandezelàyo, xa ndithe ndashukunyiswa.

₅Mna ndikholosé ngenceba yakho,

Mayigcobe intliziyo yam ngosindiso lwakho.

₆Ndiya kuvuma kuYehova,

Ngokuba endiphethe kakuhle.