IINDUMISO 115

₁Ungazukisi thina, Yehova, ungazukisi thina;

Zukisa igama lakho,

Ngenxa yenceba yakho, ngenxa yenyaniso yakho.

₂Yini na ukuba zithi iintlanga,

Uphi na kaloku uThixo wabo?

₃UThixo wethu ke usemazulwini,

Konke akuthandileyo úyakwenza.

₄Izithixo zazo yisilivere negolide,

Zizenzo zezandla zabantu.

₅Zinomlomo nje, azithethi;

Zinamehlo nje aziboni;

₆Zineendlebe nje, aziva;

Zineempumlo nje, azisezeli.

₇Izandla zazo aziphathi,

Iinyawo zazo azihambi;

Azidumzeli ngomqala wazo.

₈Boba njengazo abenzi bazo,

Bonke abasukuba bekholose ngazo.

₉Wena Sirayeli, kholosa ngoYehova;

Uncedo lwabo nengweletshetshe yabo nguye.

₁₀Nani bendlu ka-Aron, kholosani ngoYehova;

Uncedo lwabo nengweletshetshe yabo nguye.

₁₁Nina boyiki bakaYehova, kholosani ngoYehova;

Uncedo lwabo nengweletshetshe yabo nguye.

₁₂UYehova usikhumbule, wósisikelela;

Woyisikelela indlu kaSirayeli,

Woyisikelela indlu ka-Aron;

₁₃Wobasikelela aboyiki bakaYehova,

Abancinane kwanabakhulu.

₁₄UYehova wonandisa nina ngakumbi nangakumbi,

Abandise oonyana benu.

₁₅Nisikelelekile kuYehova,

UMenzi wamazulu nowehlabathi.

₁₆Amazulu ngamazulu kaYehova,

Ihlabathi ulinike oonyana babantu.

₁₇Asingabafileyo abamdumisayo uYehova,

Asingabo bonke abehlayo baye kwelokuzola.

₁₈Thina ke siya kumbonga uYehova,

Kususela koku kude kuse ephakadeni.

Haleluya!