IMIZEKELISO 6

₁Nyana wam, ukuba uthe wammela ummelwane wakho,

Wabambana nomnye ngesandla:

₂Urhintyélwe ngentetho yomlomo wakho,

Uthiwé hlasi ngentetho yomlomo wakho.

₃Yenza le nto ngoku, nyana wam, uzihlangule;

Kuba uzifaké esandleni sommelwane wakho;

Yiya, ziwise phantsi, umzame ummelwane wakho.

₄Musa ukuwanika ubuthongo amehlo akho,

Ungaziniki kozela iinkophe zakho;

₅Zihlangule esandleni njengebhadi,

Njengentaka esandleni somthiyeli.

₆Yiya embovaneni, vilandini;

Khangela iindlela zayo, ulumke:

₇Yona ithi, ingenamphathi,

Namongameli, namlawuli,

₈Isuke isilungise isonka sayo ehlotyeni,

Ikubuthe ukudla kwayo ngexa lokuvuna.

₉Kunini na ulele, vilandini?

Ùya kuvuka nini na ebuthongweni bakho?

₁₀Xa uthe, Intwana yobuthongo, intwana yokozela,

Intwana yokukhwabusha izandla ukuba ndilale:

₁₁Boza ubuhlwempu bakho njengomhambi,

Nokuswela kwakho njengendoda enengweletshetshe.

₁₂Ngumntu olitshijolo, ngumntu okhohlakeleyo,

Lowo uhamba ngokujibiliza komlomo wakhe;

₁₃Útyanda ngoshiyi, uqhubukusha ngeenyawo,

Walatha ngophakathi wakhe.

₁₄Yimpenduka entliziyweni yakhe, uyila ububi ixesha lonke,

Úngenisa ingxabano.

₁₅Ngenxa yoko kuya kufika ngesiquphe ukusindeka kwakhe;

Úya kwaphuka ngephanyazo, angabi nakunyangwa.

₁₆Izinto ezintandathu uzithiyile uYehova,

Ezisixhenxe zingamasikizi emphefumlweni wakhe:

₁₇Ngamehlo aqwayingayo; lulwimi oluxokayo;

Zizandla eziphalaza igazi elimsulwa;

₁₈Yintliziyo eyila iingcinga zobutshinga;

Ziinyawo ezikhawulezayo ukugidimela ebubini;

₁₉Lingqina elixokayo, elifutha amanga;

Nongenisa ingxabano phakathi kwabangabazalwana.

₂₀Nyana wam, bamba umthetho kayihlo,

Ungasilahli isiyalo sikanyoko.

₂₁Sibophe entliziyweni yakho okukanye,

Usinxibe emqaleni wakho.

₂₂Ekuhambeni kwakho sókukhapha;

Ekulaleni kwakho sókugcina;

Ekuvukeni kwakho sóncokola nawe.

₂₃Ngokuba úsisibane umthetho, silukhanyiso isiyalo;

Zinyindlela yobomi izohlwayo eziqeqeshayo;

₂₄Ukuba ugcínwe kumfazi onobubi,

Ekugudeni kolwimi lowolunye uhlanga.

₂₅Musa ukubukhanuka ubunzwakazi bakhe ngentliziyo yakho,

Angàkubambisi ngeenkophe zakhe;

₂₆Kuba ngenxa yehenyukazi umntu uda adle kuphela intendana yesonka;

Umkamntu uzingela umphefumlo onqabileyo.

₂₇Umntu únokuwuthabatha na umlilo ase esifubeni sakhe,

Zingàtshi na iingubo zakhe?

₂₈Únokuhamba na umntu phezu kwamalahle avuthayo,

Zingatyabuki na iinyawo zakhe?

₂₉Únjalo ongena emfazini wommelwane wakhe;

Akukho namnye umchukumisayo, oya kuba msulwa.

₃₀Àlidelwa isela, xa lithe labela

Ukwanelisa umphefumlo walo, xa lithe lalamba;

₃₁Lifunyênwe, lihlawula kasixhenxe,

Lirhola bonke ubuncwane bendlu yalo.

₃₂Okrexeza umfazi ke uswele intliziyo;

Owenza loo nto ngumonakalisi womphefumlo wakhe.

₃₃Ufumanana nobetho nocukucezo,

Ungcikivo lwakhe alucimi.

₃₄Kuba ikhwele libubushushu bendoda,

Ayiyi kuyeka ngemini yempindezelo.

₃₅Ayiyi kulubeka ucamagusho, nokuba luluphi na;

Ayiyi kuvuma, naxa uthe wayicenga ngeento ezininzi.