IMIZEKELISO 31

₁Amazwi kaLemuweli, ukumkani waseMasa, awamqeqesha ngawo unina.

₂Yini, nyana wam? yini, nyana wesizalo sam?

Yini, nyana wezibhambathiso zam?

₃Amandla akho musa ukuwanika amankazana,

Iindlela zakho uzinike abo batshabalalisa ookumkani.

₄Asiyindawo yokumkani, Lemuweli, asiyindawo yokumkani ukusela iwayini;

Asiyindawo yezidwangube ukuthi, Síphi na isiselo esinxilisayo?

₅Hleze basele bakulibale okumiselweyo,

Balijike ityala loonyana bonke beentsizi.

₆Isiselo esinxilisayo sinikeni abatshabalalayo,

Newayini yinikeni abamphefumlo ukrakra.

₇Mabasele abo, babulibale ubuhlwempu babo,

Bangabi sabukhumbula ububi babo.

₈Wuvule umlomo wakho ngenxa yosisidenge,

Ngenxa yetyala labo bonke abadlulayo.

₉Vula umlomo wakho, gweba ngobulungisa,

Ugwebe ityala lolusizana nolihlwempu.

₁₀Umfazi onesidima ngubani na ongamfumanayo?

Lingaphezulu nakwikorale• ixabiso lakhe.

₁₁Ikholose ngaye intliziyo yendoda yakhe,

Ayisayi kuswela nto.

₁₂Uyiphatha kakuhle, kungabi kakubi,

Yonke imihla yobomi bakhe.

₁₃Ufuna uboya begusha neflakisi,•

Asebenze ethumekelele ngezandla zakhe.

₁₄Unjengeenqanawa zabarhwebi,

Ukuya kuthabatha kude ukudla kwakhe.

₁₅Uvuka kwasebusuku,

Ayinike into edliwayo indlu yakhe,

Awunike umsebenzi wawo umthinjana wakhe.

₁₆Unkqangiyela intsimi ayizuze;

Ngeziqhamo zezandla zakhe utyala isidiliya.

₁₇Ubhinqa amandla emanqeni akhe,

Ayomeleze imikhono yakhe.

₁₈Uyakuva ukuba kulungile ukurhweba kwakhe;

Isibane sakhe asicimi ebusuku.

₁₉Uzibeka izandla zakhe entongeni yokuluka,

Neminwe yakhe ibamba isikhanda sento yokuluka.

₂₀Isandla sakhe usitwabululela olusizana,

Azolulele izandla zakhe kumahlwempu.

₂₁Indlu yakhe akayoyikeli, mhlana ngekhephu,

Kuba yonke indlu yakhe yambethe ezisithileyo.

₂₂Uzenzela imiqamelo;

Yilinen ecikizekileyo kwanemfusa isambatho sakhe.

₂₃Iyaziwa indoda yakhe emasangweni,

Ekubutheni kwayo namadoda amakhulu elizwe.

₂₄Wenza iingubo zelinen entle,

Athengise ngazo, athengise ngemibhinqo kumaKanan.

₂₅Ngamandla nobungangamela isambatho sakhe;

Usuka ahleke ngemini ezayo.

₂₆Umlomo wakhe uwuvula ngobulumko;

Umyalelo onenceba uselulwimini lwakhe.

₂₇Uyayondela ihambo yendlu yakhe,

Angasidli isonka sobuvila.

₂₈Bayasuka oonyana bakhe, bathi unoyolo;

Iyasuka indoda yakhe imdumise;

₂₉Ithi, Zininzi iintombi ezenza ngokunesidima;

Ke wena uzidlule zonke ziphela.

₃₀Bubuxoki ubuhle, ngamampunge ubunzwakazi;

Ngumfazi owoyika uYehova yedwa oya kudunyiswa.

₃₁Mnikeni kwiziqhamo zezandla zakhe,

Zimdumise emasangweni izenzo zakhe.