IMIZEKELISO 28

₁Basaba bengasukelwa nto abangendawo;

Ke wona amalungisa akholosa njengengonyama.

₂Ngokreqo lwelizwe baba baninzi abathetheli balo;

Ngomntu onengqondo, onokwazi, ukuzinza kwalo kuyoluka.

₃Umfo oyintloko ekucudiseni izisweli

Yimvula etshayelayo, ingasalisi kudla.

₄Abashiya umyalelo badumisa abangendawo;

Ke abawugcinayo umyalelo bayazixhokonxa ngabo.

₅Abantu abanobubi abakuqondi okusesikweni;

Ke bona abamquqelayo uYehova baqonda izinto zonke.

₆Lilungile ihlwempu elihamba ngengqibelelo yalo,

Ngaphezu komjibilizi ondlela mbini, nakuba esisityebi.

₇Obamba umyalelo ngunyana onengqondo;

Ke olikholwane labachithi uhlaza uyise.

₈Owongeza ubuncwane bakhe ngokudla abanye, nangolwandiso,

Ubuthela obabala izisweli.

₉Osusa indlebe yakhe ekusiphulaphuleni isiyalo,

Kwanomthandazo wakhe ulisikizi.

₁₀Obalahlekisayo abathe tye ngendlela enobubi,

Kuya kweyela yena esihogweni sakhe,

Bona abagqibeleleyo bakudle ilifa okulungileyo.

₁₁Ilumkile indoda esisityebi kwawayo amehlo;

Ke isisweli esinengqondo siyayigocagoca.

₁₂Ekudlamkeni kwamalungisa kwanda uzuko;

Ekuphakameni kwabangendawo, àbaveli nokuvela abantu.

₁₃Osigubungelayo isono sakhe akayi kuba nampumelelo;

Ke yena osivumayo, asishiye, uya kufumana inceba.

₁₄Hayi, uyolo lomntu ohlala enkwantya;

Ke yena ontliziyo ilukhuni uya kweyela ebubini.

₁₅Uyingonyama egqumayo, uyibhere• ebhaduliswa kukulamba,

Umlawuli ongendawo kubantu abazizisweli.

₁₆Hayi, ingànga iswele ukuqonda, enokucudisa okuninzi!

Othiye inzuzo embi wolula imihla yakhe.

₁₇Umntu onovalo ngegazi lomphefumlo

Usabela nasemhadini; makangabanjezelwa.

₁₈Ohamba ngengqibelelo uya kusindiswa,

Ke umjibilizi ondlela mbini weyela okukanye.

₁₉Owusebenzayo umhlaba wakhe uya kuhlútha sisonka;

Osukela izinto ezingento uya kuhlútha bubuhlwempu.

₂₀Indoda enyanisekileyo ineentsikelelo ezininzi;

Ke yena ongxamayo ukuba sisityebi, akabi msulwa.

₂₁Ukukhetha ubuso akulungile;

Ngenxa yeqhekeza lesonka umntu angáde aphosise.

₂₂Indoda eliso libi ikhawulezela ukutyeba;

Ayazi ukuba ukuswela kuya kuyifikela.

₂₃Omohlwayayo umntu wothi kamva afumane ubabalo,

Ngaphezu kocengacengayo ngolwimi.

₂₄Ophanga uyise nonina, athi, Asilukreqo,

Ulidlelane lendoda engumonakalisi.

₂₅Omphefumlo ubawayo uxhaya ingxabano;

Ke yena okholose ngoYehova uyatyetyiswa.

₂₆Okholose ngeyakhe intliziyo usisidenge;

Ke yena ohamba ngobulumko uya kusinda.

₂₇Opha ihlwempu akasweli;

Ke yena ofihla amehlo akhe uneengqalekiso ezininzi.

₂₈Ekuphakameni kwabangendawo bayasithela abantu;

Ekutshabalaleni kwabo ayanda amalungisa.