IMIZEKELISO 2

₁Nyana wam, ukuba uthe wazamkela iintetho zam,

Wayiqwebela kuwe imithetho yam,

₂Ukuze uyibazele ubulumko indlebe yakho,

Uyithobele ukuqonda intliziyo yakho;

₃Ewe, ukuba uthe wayibiza ingqondo,

Walisa ekuqondeni ilizwi lakho;

₄Ukuba uthe wabufuna njengesilivere,

Wabumba njengobutyebi obuselelweyo:

₅Ùya kwandula ukukuqonda ukoyika uYehova,

Ukufumane ukumazi uThixo,

₆Ngokuba uYehova upha ubulumko;

Emlonyeni wakhe kuphuma ukwazi nokuqonda.

₇Ubaqwebela uzimaso abathe tye,

Uyingweletshetshe kwabahamba ngengqibelelo,

₈Ukuze alondoloze umendo wesiko,

Agcine nendlela yabakhe benceba.

₉Ùya kwandula uqonde ubulungisa,

Nesiko, nokuthe tye, nayo yonke imikhondo yokulungileyo;

₁₀Kuba ubulumko buya kungena entliziyweni yakho,

Ukwâzi kwenze mnandi umphefumlo wakho.

₁₁Ukunkqangiyela kókugcina,

Ukuqonda kókulondoloza;

₁₂Ukuba kukuhlàngule endleleni embi,

Kubantu abathetha impenduka;

₁₃Kwabashiya umendo wokuthe tye,

Ukuze bahambe ngeendlela zobumnyama;

₁₄Kwabavuyela ukwenza ububi,

Bagcobe ngeempenduka zabenza ububi;

₁₅Abamendo ujibilizayo,

Abathi gu bucala ngemikhondo yabo;

₁₆Ukuze uhlangulwe kumkamntu,

Kowolunye uhlanga, ontetho yakhe igudileyo;

₁₇Lowo ushiya ikholwane lobutsha bakhe,

Awulibale umnqophiso woThixo wakhe.

₁₈Kuba útshona ekufeni nendlu yakhe,

Nemikhondo yakhe itshonela kwabangasekhoyo;

₁₉Bonke abangénayo kuye ababuyi,

Abafiki kumendo wobomi:

₂₀Ukuze uhambe ngendlela yabalungilyo,

Ugcine umendo wamalungisa.

₂₁Ngokuba abathe tye baya kulíma ilizwe,

Basale kulo abagqibeleleyo,

₂₂Banqunyùlwe ezweni abangendawo,

Abanginizayo bancothulwe kulo.