IMIZEKELISO 19

₁Lilungile ihlwempu elihamba ngengqibelelo yalo,

Ngaphezu komlomo ojibilizayo, esisinyabi yena.

₂Kananjalo ukuthi umphefumlo ungabi nakwazi akulungile;

Onyawo zingxamileyo uyayiphosa indlela.

₃Ukumatha komntu kuphenula indlela yakhe;

Ijalele uYehova intliziyo yakhe.

₄Ukutyeba kongeza izihlobo ezininzi;

Ke osweleyo, nesihlobo sakhe siyahlukana naye.

₅Ingqina elixokayo alibi msulwa;

Ofutha amanga akasindi.

₆Baninzi abacenga amanene;

Yonke into isisihlobo kwindoda ephayo.

₇Bonke abazalwana behlwempu balithiyile;

Zibeka phi na izihlobo ukuya kude kulo!

Lisukela amazwi angento.

₈Orhweba ubulumko uthanda umphefumlo wakhe;

Ogcina ingqondo uya kufumana okulungileyo.

₉Ingqina elixokayo alibi msulwa;

Ofutha amanga uyatshabalala.

₁₀Akusifanele isinyabi ukudla ubuncwane;

Kobeka phi na ke ukungamfaneli umkhonzi ukulawula abathetheli!

₁₁Ingqiqo yomntu imenza azeke kade umsindo;

Sisihombo sakhe ukulugqitha ukreqo.

₁₂Kukugquma kwengonyama entsha ukujala kokumkani;

Sinjengombethe emfunweni isisa sakhe.

₁₃Ngumeyeliselo kuyise unyana osisinyabi;

Luqhoqhozo oluxikileyo ingxabano yomfazi.

₁₄Indlu nobutyebi lilifa looyise;

Ke yena umfazi onengqondo uvela kuYehova.

₁₅Ubuvila buwisela ebuthongweni obukhulu;

Umphefumlo odangeleyo uyalamba.

₁₆Ogciné umthetho ugcine umphefumlo wakhe;

Ozidelayo iindlela zakhe uya kufa.

₁₇Uboleka uYehova obabala isisweli;

Umbuyekeza ukuphatha kwakhe okuhle.

₁₈Mqeqeshe unyana wakho, xa kusekho ithemba;

Kodwa ungangxameli kumbulala.

₁₉Onomsindo omkhulu umelwe kukuhlawula;

Kuba xa ùthe wamhlangula, wóba mandundu.

₂₀Live icebo, ulwamkele uqeqesho,

Ukuze ulumke ngexesha elizayo.

₂₁Zininzi iingcinga entliziyweni yomntu;

Noko ke licebo likaYehova eliya kuma.

₂₂Umnqweno womntu yinceba yakhe;

Ke lilungile ihlwempu ngaphezu kwendoda enamanga.

₂₃Ukoyika uYehova kusa ebomini;

Onako uya kuhlala ehluthi.

₂₄Ivila lisifaké isandla salo esityeni,

Alibi sasibuyisela emlonyeni walo.

₂₅Umbethíle umgxeki, siba nobuqili isiyatha;

Umohlwayíle onengqondo, wóqonda azi.

₂₆Ombhuqayo uyise, omgxothayo unina,

Ngunyana owenza okuziintloni, ongcikivayo.

₂₇Yeka, nyana wam, ukuthi uve uqeqesho,

Kanti uya kusuka ulahlekane nentetho yokwazi.

₂₈Ingqina elilitshijolo ligxeka isiko;

Umlomo wongendawo uginya ubutshinga.

₂₉Izigwebo zilungiselwe abagxeki;

Imivumbo ilungiselwe umhlana wesinyabi.