IMIZEKELISO 15

₁Impendulo ethambileyo ibuyisa ubushushu;

Ilizwi elidubulayo linyusa umsindo.

₂Ulwimi lwezilumko lulungisa ukwazi;

Umlomo wezinyabi umpompoza ukumatha.

₃Asezindaweni zonke amehlo kaYehova,

Ebonisela abanobubi nabalungileyo.

₄Ukuphola kolwimi ngumthi wobomi;

Ke ukuphenula kwalo kwaphula umoya.

₅Isimathane sigiba uqeqesho lukayise;

Osigcinileyo isohlwayo uba nobuqili.

₆Indlu yelungisa nguvimba omkhulu;

Ke ngongeniselo longendawo kukho ukuhlisa ishwangusha.

₇Umlomo wezilumko uhlwayela ukwazi:

Ke yona intliziyo yezinyabi ayindawo.

₈Umbingelelo wabangendawo lisikizi kuYehova;

Umthandazo wabathe tye ngowona akholwa nguwo.

₉Ilisikizi kuYehova indlela yongendawo;

Ke ophuthuma ubulungisa uyathandwa nguye.

₁₀Uqeqesho olubi lolowushiyayo umendo;

Othiya isohlwayo uya kufa.

₁₁Elabafileyo nenzonzobila ziphambi koYehova;

Zibeké phi na ke iintliziyo zoonyana babantu!

₁₂Umgxeki akakuthandi ukohlwaywa kwakhe,

Akayi kwizilumko.

₁₃Intliziyo evuyileyo iyabuchwayithisa ubuso;

Ekubulalekeni kwentliziyo umoya uthi dakumba.

₁₄Intliziyo enengqondo ifuna ukwazi;

Umlomo wesinyabi usukelana nokumatha.

₁₅Yonke imihla yosizana mibi;

Intliziyo echwayithileyo inesidlo ngamaxesha onke.

₁₆Ilungile intwana encinane kunye nokoyika uYehova,

Ngaphezu kwendyebo eninzi kunye nokuxhalaba.

₁₇Ulungile umxhesho womfuno kunye nothando,

Ngaphezu kwenkomo etyetyisiweyo kunye nentiyo.

₁₈Indoda enobushushu ixhaya ingxabano;

Ezeka kade umsindo idambisa imbambano.

₁₉Indlela yevila ngathi ibiyelwe ngemitholo;

Ke umendo wabathe tye ubekelelwe.

₂₀Unyana olumkileyo uyamvuyisa uyise;

Umntu osisinyabi udela unina.

₂₁Ukumatha luvuyo koswele intliziyo;

Ke indoda enengqondo ithi tye ukuhamba.

₂₂Iingcinga ziyatshitsha ngokungabikho kokucweya;

Ke zona zima ngamaphakathi amaninzi.

₂₃Indoda inovuyo ngempendulo yomlomo wayo;

Ilizwi elithethwe ngexa elililo, azi lihle!

₂₄Koqiqayo umendo wobomi usinga phezulu,

Ukuze emke kwelabafileyo elingaphantsi.

₂₅UYehova uyayincothula indlu yabanekratshi,

Amise umlimandlela womhlolokazi.

₂₆Zingamasikizi kuYehova iingcinga ezimbi;

Ke ahlambulukile amazwi amnandi.

₂₇Uyihlisela ishwangusha indlu yakhe obawela inzuzo embi;

Ke yena othiya isicengo, uya kuphila.

₂₈Intliziyo yelungisa iya kucamanga ukuphendula;

Ke wona umlomo wabangendawo umpompoza ububi.

₂₉UYehova ukude nabangendawo;

Ke wona umthandazo wamalungisa uyawuva.

₃₀Ukukhanya kwamehlo kuvuyisa intliziyo;

Iindaba ezimnandi zityebisa amathambo.

₃₁Indlebe esivayo isohlwayo sobomi

Ihlala phakathi kwezilumko.

₃₂Ophulukene noqeqesho ucekisa umphefumlo wakhe;

Osivayo isohlwayo urhweba ukuqonda.

₃₃Ukoyika uYehova luqeqesho lobulumko;

Ngaphambi kozuko lululamo.