IZILILO 3

₁Ndim indoda eboné iintsizi,

ngentonga yokuphuphuma komsindo wakhe.

₂Úndikhokele wandihambisa ebumnyameni, akwaba sekukhanyeni.

₃Úbuyé wasiguqulela kum ndedwa isandla sakho imini yonke.

₄Úyonakalisile inyama yam nolùsu lwam; uwaphule amathambo am.

₅Úndakhele wandirhaqa ngenyongo nendiniso.

₆Úndibele ezindaweni ezimnyama, njengabafe ngonaphakade.

₇Úndibiyele ngeenxa zonke, andinakuphuma; uwenze aba nzima amakhamandela am obhedu.

₈Noko ndikhalayo, ndizibikayo, uyawuvingcela umthandazo wam.

₉Úzibiyele iindlela zam ngamatye aqingqiweyo, uzenzé goso iingqushu zam.

₁₀Kum úyibhere• elalelayo, úyingonyama esezintsithelweni.

₁₁Úzityekisile iindlela zam, wandidlavula; undenzé inxuwa.

₁₂Úsigobile isaphetha sakhe, wandimisa ndaba yitekeni• yotolo lwakhe.

₁₃Úzise ezintsweni zam iintolo zomphongolo wakhe.

₁₄Ndisuke ndayintlekisa kubantu bonke bakowethu; ndiyingoma yabo imini yonke.

₁₅Úndihluthise ngeento ezikrakra, wandiseza ndahlutha umhlonyane.

₁₆Úwaphule ngohlalu amazinyo am; undixinzelele phantsi eluthuthwini.

₁₇Ùwuhlambile umphefumlo wam, awaba naluxolo; ndiyilibele into elungileyo.

₁₈Ndathi, aphelile amandla am, nokulinda kwam kuYehova.

₁₉Zíkhumbule iintsizi zam, nokutshutshiswa kwam, umhlonyane nenyongo.

₂₀Umphefumlo wam uyazikhumbula unangoku ezo zinto, usibekekile kum.

₂₁Oko ndikunyamekèle ngentliziyo: ngenxa yoko ndilindile.

₂₂Kungeenceba zikaYehova le nto singagqityelwanga, ngokuba azipheli iimfesane zakhe.

₂₃Zintsha imisó ngemisó; kukhulu ukuthembeka kwakhe.

₂₄Isabelo sam nguYehova, utsho umphefumlo wam; ngenxa yoko ndilindele kuye.

₂₅UYehova ulungile kwabathembele kuye, kumphefumlo omquqelayo.

₂₆Kulungile ukuba umntu alulindele, ethe cwaka, usindiso lukaYehova.

₂₇Kuyilungele indoda ukuba iyithwale idyokhwe kwasebutsheni bayo.

₂₈Mayihlale yodwa ithe cwaka, xa iyithwalisiweyo.

₂₉Mayiwubeke eluthulini umlomo wayo; kungábakho ithemba mhlawumbi.

₃₀Mayisinikele isidlele sayo koyibethayo; mayihlùthe yingcikivo.

₃₁Ngokuba iNkosi yam ayiyi kumhlamba umntu ngonaphakade,

₃₂Ngokuba naxa imhlisele usizi, noko yoba nemfesane ngokobuninzi benceba yayo.

₃₃Ngokuba ayibacinezeli ngokuphuma entliziyweni yayo, ibènze babe nosizi oonyana babantu.

₃₄Ekutyunyuzweni kwababanjiweyo bonke behlabathi phantsi kweenyawo;

₃₅Ekulijikeni ityala lomfo phambi kobuso bOsenyangweni;

₃₆Ekuphenulweni komntu ekubambaneni kwakhe nomnye: iNkosi yam ayiboni na?

₃₇Ngubani na okhe wathetha, kwenzeka, iNkosi yam ingawisanga mthetho?

₃₈Akuphumi okubi nokulungileyo emlonyeni wOsenyangweni na?

₃₉Yini na ukuba umntu akhalaze ephilile?

Umfo makakhalaze ngenxa yezono zakhe.

₄₀Masiziphengulule iindlela zethu, sizigocagoce, sibuyele kuYehova.

₄₁Masizinyuse iintliziyo zethu kunye nezandla zethu, sizisé kuThixo emazulwini.

₄₂Thina sikreqile saba neenkani; wena akuxolelanga.

₄₃Ùzigqubuthele ngomsindo, wasisukela; ubuléle akwaconga.

₄₄Ùzigqubuthele ngelifu, ukuze ungaphumeli umthandazo wethu.

₄₅Ùsenzé inkunkuma, imvuthuluka esazulwini sezizwe.

₄₆Zisakhamisele umlomo wazo zonke iintshaba zethu.

₄₇Kokwethu ukunkwantya, nomgongxo, nesibatha, nokutshabalala, nokwaphuka.

₄₈Iliso lam lihla imijelo yamanzi, ngenxa yokwaphuka kwentombi yabantu bakowethu.

₄₉Iliso lam liyatyityizela, aliyeki, alinqamki,

₅₀Ade aqondele abone uYehova, esemazulwini.

₅₁Iliso lam liyawubulala umphefumlo wam, ngenxa yeentombi zonke zomzi wakowethu.

₅₂Zindizingele zandizingela njengentaka iintshaba zam ngelizé.

₅₃Zibubhangisile ubomi bam ngokundeyelisela emhadini, zandigibisela ngamatye.

₅₄Amanzi ahambe phezu kwentloko yam, ndathi, Ndinqanyulwe.

₅₅Ndinqulé igama lakho, Yehova, kongaphantsi umhadi.

₅₆Izwi lam waliva; musa ukuyifihla indlebe yakho ekubefuzeni kwam, ekuzibikeni kwam.

₅₇Wasondela ngemini yokukunqula kwam, wathi, Musa ukoyika.

₅₈Ùwathethile amatyala omphefumlo wam, Nkosi yam; ubukhulule ubomi bam ngokubumisela.

₅₉Ùkubonile, Yehova, ukuphenulwa kwam; lígwebe ityala lam.

₆₀Ùyibonile yonke impindezelo yabo, uzivile zonke iingcinga zabo ngam.

₆₁Ùkuvile ukungcikiva kwabo, Yehova, uzivile zonke iingcinga zabo ngam,

₆₂Umlomo wabo basukela phezulu kum, nezicamango zabo ngam yonke imini.

₆₃Ukuhlala kwabo nokusuka kwabo kúbheke; ndiyingoma yabo.

₆₄Bábuyisele imbuyekezo, Yehova, ngokwezenzo zezandla zabo.

₆₅Bánike ubumfama bentliziyo; intshwabulo yakho mayibe kubo.

₆₆Básukele ngomsindo, ubatshabalalise, bangabikho phantsi kwamazulu kaYehova.