UYOBHI 41

₁Ùnokuyirhola na ingwenya ngegwegwe,

Ulutshonise elutyeni ulwimi lwayo?

₂Ùnokuyifaka intambo yomzí empumlweni yayo na,

Ugqobhoze izidlele zayo ngentola?

₃Ingátarhuzisa kunene na kuwe,

Ithethe amazwi athambileyo kuwe?

₄Ingénza umnqophiso na nawe,

Wokuba uyithabathe ibe ngumkhonzi waphakade?

₅Ùngádlala na nayo njengentaka,

Uyikhulekele amantombazana akho?

₆Angárhweba ngayo na amahlulelana abambisayo,

Ayabe phakathi kwabarhwebi?

₇Unokusizalisa na isikhumba sayo ngeenyembe,

Nentloko yayo ngezikhali zeentlanzi?

₈Beka isandla sakho kuyo;

Khumbula imfazwe, ungaphindi.

₉Yabona, ukulinda kobambisayo ngamanga;

Inene, úqethuka kwaesayibona.

₁₀Akukho sijorha sokuyixhokonxa;

Ngubani na ke ongazimisa phambi kwam?

₁₁Ngubani na ondiphangeleyo, wandinika ukuba ndibuyekeze?

Okuphantsi kwamazulu onke kokwam.

₁₂Andiyi kuthi tu ngamalungu ayo,

Neendawo zobugorha bayo, nezimbo zezintlu zayo.

₁₃Ngubani na onokuwutyhila umphambili wesambatho sayo?

Ezintlwini ezimbini zemihlathi yayo, ngubani na onokuya?

₁₄Iingcango zobuso bayo, ngubani na onokuzivula?

Ngeenxa zonke emazinyweni ayo sisothuso.

₁₅Iliqhayiya imiqela yeengweletshetshe zayo,

Zivalwé ngetywina eliqinileyo.

₁₆Zisondelene enye nenye,

Akungeni moya phakathi kwazo.

₁₇Zinamathelene enye kwenye,

Zibambene, zingabi nakwahlukana.

₁₈Ukuthimla kwayo kukhupha imitha,

Namehlo ayo anjengeenkophe zesifingo.

₁₉Emlonyeni wayo kuphuma izikhuni zomlilo ezitshangazayo,

Kuthaphuke iintlantsi zomlilo.

₂₀Emathatheni ayo kuphuma umsi,

Njengowongxawu okhwezelwa ngemizi.

₂₁Umphefumlo wayo uvuthisa amalahle,

Kuphuma amalangatye emlonyeni wayo.

₂₂Entanyeni yayo kuphuma amandla,

Ebusweni bayo kuxhina ukuncama.

₂₃Imihlubulo yenyama yayo inamathelene,

Iqinile kuyo, ayishukumi.

₂₄Intliziyo yayo iqine njengelitye,

Iqine njengelokusila langaphantsi.

₂₅Ekuphakameni kwayo, ziyanxunguphala iinjengele,

Zithi makatha ngokuqhiphuka umbilini.

₂₆Lifike kuyo ikrele, àlimi;

Nantshuntshe, namkhonto, nankonjane.

₂₇Ithi síngumququ isinyithi,

Livithi ubhedu.

₂₈Utolo lwesaphetha aluyibalekisi;

Ajika abe ngumququ amatye okusawula kuyo.

₂₉Ithi imivinqi ziindiza,

Ikuhleke ukutyityimba kwenkcula.

₃₀Ngaphantsi kwayo ziinkamba ezitsolo;

Yaneka impahla yokusizila eludakeni.

₃₁Iyibiliza inzulu njengembiza,

Ulwandle ilwenza njengehlàla loqholo.

₃₂Emva kwayo kukhanya indlela;

Anga amanzi anzongonzongo zizimvi.

₃₃Ehlabathini akukho nto ifana nayo,

Le yenziwáyo ayaba nakuqhiphuka umbilini.

₃₄Ibona konke okuphakamileyo;

Ingukumkani yona kwizilo zonke ezinyalasayo.