UYOBHI 34

₂Yivani, nina zilumko, ukuthetha kwam;

Nina zâzi, ndibekeleni indlebe.

₃Ngokuba indlebe iyakucikida ukuthetha,

Ikhuhlangubo liyakuva ukudla.

₄Masizinyulele okusesikweni,

Sikwazi phakathi kwethu okulungileyo.

₅Ngokuba úthe uYobhi, Ndililungisa,

UThixo ulisusile ibango lam.

₆Kuthiwa ndiyaxoka, noko likhoyo ibango lam;

Liyabulala inxeba lam lotolo, noko ndingenalukreqo.

₇Úphi na umfo onjengoYobhi,

Yena ukuselayo ukugcula njengamanzi?

₈Athelele kubenzi bobutshinga,

Ahambe namadoda angendawo?

₉Kuba esithi, Akancedeki umfo

Ngokukholana noThixo.

₁₀Ngako oko, nina madoda okuqonda, phulaphulani kum;

Makube lee kuThixo ukuba ngongendawo;

KuSomandla, ukuba abe nobugqwetha,

₁₁Ke ukwenza komntu ukúbuyekeza kuye,

Amfumanise umfo ngokwehambo yakhe.

₁₂Hayi bo! UThixo akenzi ngokungendawo,

USomandla akakugwenxi okusesikweni.

₁₃Ngubani na omphathise ihlabathi?

Ngubani na omise elimiweyo lonke?

₁₄Ukuba ubebhekise kuye ngokwakhe yedwa,

Wawuhlanganisela kuye umoya wakhe, nokuphefumla kwakhe,

₁₅Ibiya kuphuma umphefumlo inyama yonke kunye,

Umntu abuyele eluthulini.

₁₆Wanga ungákuqonda, ungákuva oku,

Ulibekele indlebe izwi lokuthetha kwam!

₁₇Kanene, othiye okusesikweni ubengaphatha ngobukhosi, yini na?

Khona uSobulungisa wòmgweba na?

₁₈Kungáthiwa na kukumkani, Tshijolondini?

Nakumanene, Zintondini zingendawo?

₁₉Kangakanani na ke kongabanoneleliyo abathetheli,

Onganoneleli zinongonongo ngaphezu kwabasweleyo?

Kuba bangumsebenzi wezandla zakhe bona bonke.

₂₀Bafa ngephanyazo, phakathi kobusuku;

Bayahexiswa abantu, badlule,

Zisuswe iimbalasane kungengasandla.

₂₁Kuba amehlo akhe aphezu kweendlela zomntu,

Úyawabona onke amabanga akhe.

₂₂Akukho bumnyama, akukho thunzi lakufa,

Ukuba basithele kulo abenzi bobutshinga.

₂₃Ngokuba akazekeleli ukumngqinga umntu,

Ukuze eze ematyaleni noThixo.

₂₄Úyabashwaqa abaziinyathi engagocagocanga,

Amise ke abanye esikhundleni sabo.

₂₅Ngako oko úyazazi izenzo zabo,

Ababhukuqe ebusuku, batyumke.

₂₆Úyabamonxoza ngokwabangendawo

Endaweni yababoneli.

₂₇Ekungenxa yokuze kubekho oko, le nto batyekáyo ekumlandeleni,

Àbaziqiqa zonke iindlela zakhe;

₂₈Ukuze bakufikise kuye ukukhala kosweleyo,

Akuve ukukhala kweentsizana.

₂₉Akùzolisa, ngubani na oya kuxhalisa?

Akùsithelisa ubuso, ngubani na ongámbonayo?

Esenjenjalo, nokuba kungenxa yohlanga, nokuba kungenxa yomntu emnye,

₃₀Ukuze angabi ngukumkani umntu oyintshembenxa,

Angabi zizirhintyelo zabantu.

₃₁Ngokuba ubani angátsho na kuThixo ukuthi,

Ndiziphakamisile, andisayi kuba sona;

₃₂Endingakuboniyo, ndíyale ngako;

Ukuba ndithe ndenza ngobugqwetha, andiyi kuphinda?

₃₃Úya kuphindezela ngokwakho na yena, ngokuba usolile wena?

Ukuba unyule wena, kunganyuli mna.

Into oyaziyo yithethe.

₃₄Aya kuthi kum amadoda aziingqondi,

Nomfo osisilumko ondiphulaphulayo,

₃₅UYobhi uthetha engenakwazi,

Namazwi akhe akanangqiqo.

₃₆Tarhuni, makacikidwe uTobhi kuse ekupheleni,

Ngenxa yokuphendula kwakhe ngokwamadoda anobutshinga.

₃₇Kuba elongeza ukreqo kwisono sakhe;

Útyhwakraza izandla phakathi kwethu,

Awenze maninzi amazwi akhe ngoThixo.