UYOBHI 27

₂Ehleli nje uThixo, olisusileyo ibango lam,

USomandla, owenzé krakra umphefumlo wam

₃(Kuba kusekum ukuphefumla kwam konke,

Nomoya kaThixo usemathatheni am),

₄Umlomo wam awuthethi bugqwetha,

Nolwimi lwam aluxeli nkohliso.

₅Makube lee kum ukuthi, niyalungisa;

Ndoda ndiphume umphefumlo, ndingayisusi kum ingqibelelo yam.

₆Ndobambelela ebulungiseni bam, andiyi kubuyeka;

Intliziyo yam ayiyi kungcikiva mini eziminini zam.

₇Malube njengongendawo utshaba lwam,

Nósukela phezulu kum abe njengogqwethayo.

₈Kuba liyintoni na ithemba lentshembenxa, xa athe wawunqumla,

Xa athe wawurhola uThixo umphefumlo wayo?

₉Wókuva na uThixo ukuhlahlamba kwayo,

Xa ifikelwe yimbandezelo?

₁₀Khona inokuziyolisa na ngoSomandla?

Ingamnqula na uThixo ngamaxesha onke?

₁₁Ndiya kuniyala ngokusingisele esandleni sikaThixo;

OkunoSomandla andiyi kukukhanyela.

₁₂Yabonani, nonke niphela ngokwenu nikubonile;

Yini na ke ukuba nithethe into engento yakonto?

₁₃Siso esi isabelo somntu ongendawo kuThixo,

Nelifa labaziingqwangangqwili, abalamkelàyo kuSomandla.

₁₄Ukuba bathe banda oonyana bakhe, bandiselwa ikrele;

Nabaphume embilinini wakhe àbahluthi kukutya.

₁₅Amaqongqolo akhe aya kungcwatywa kukufa,

Abahlolokazi bakhe bangalili.

₁₆Ukuba úthe wafumba isilivere njengothuli,

Wazilungisela izambatho njengodaka:

₁₇Angázilungisa, koko ziya kwambathwa lilungisa,

Nesilivere leyo babelane ngayo abamsulwa.

₁₈Uyakha indlu yakhe njengenundu,

Njengephempe elenziwe yimboniseli.

₁₉Ulala phantsi esisityebi, akaphindi;

Uvula amehlo akhe, angabikho.

₂₀Kumthabatha njengamanzi ukukhwankqa,

Simbé ebusuku isaqhwithi.

₂₁Luyamfukula ulophu lwasempumalanga, emke,

Lumqweqwedise endaweni yakhe.

₂₂UThixo umgibisela angamcongi;

Usibaleka asibaleke isandla sakhe.

₂₃Bamtyhwakrazela izandla,

Bamenzele umsondlo, emke endaweni yakhe.