UYOBHI 20

₂Ngako oko iingcingangcinga zam ezi ziyandiphendula,

Ngenxa yokuthabatheka kwam ngaphakathi kwam.

₃Ukuthethisa okundihlazayo ndiyakuva,

Ke umoya uyandiphendula engqondweni yam.

₄Oku ùyakwazi na kambe kwanini,

Kususela koko lwabekwayo uluntu ehlabathini:

₅Ukuba ukumemelela kwabangendawo kufutshane,

Ukuvuya kweentshembenxa kokwephanyazo?

₆Nokuba kuthe kwenyuka kwaya ezulwini ukuphakama kwakhe,

Intloko yakhe wayifikisa emafini:

₇Njengelindle lakhe uya kudaka kuphele,

Abambonayo bathi, Úphi na?

₈Úya kuphaphazela emke njengephupha, angafunyanwa,

Aphekuzwe njengombono wobusuku.

₉Iliso elikhe lambona, aliyi kuphinda;

Indawo yakhe ayisayi kumalama.

₁₀Abantwana bakhe baya kungxengxezela abasweleyo,

Izandla zakhe zibuyise imfuyo yakhe.

₁₁Amathambo akhe ebezele bubutsha;

Bolaliswa phantsi naye eluthulini.

₁₂Nokuba ububi bebunencasa emlonyeni wakhe,

Wabugusha phantsi kolwimi lwakhe,

₁₃Wabuconga akabuyeka,

Wabuthintela ekhuhlangubeni lakhe;

₁₄Isonka sakhe sibhuqukile emathunjini akhe,

Yinyongo yamaphimpi embilinini wakhe.

₁₅Úginye ubutyebi, wabuhlanza;

Úyabukhupha esiswini sakhe uThixo.

₁₆Wómungunya ubuhlungu bamaphimpi,

Lumbulale ulwimi lwenyushu.

₁₇Akayi kubona mijelo,

Milambo, zihlambo zobusi namasi.

₁₈Ebuyisa awakuxelengayo, akakuginyi;

Angavuyi ngangobutyebi aburhwebileyo.

₁₉Kuba wabathi viki, wabalahla, abasweleyo;

Waxhakamfula indlu, angayakhanga.

₂₀Kuba engalwazanga uxolo esiswini sakhe,

Akayi kusinda nezinto zakhe ezinqwenelekayo.

₂₁Bekungekho nto isindayo emqaleni wakhe;

Ngenxa yoku, aziyi kuhlala izinto zakhe ezilungileyo.

₂₂Ekuzalisekeni kokumaneleyo ubandezelekile,

Izandla zonke zabangento ziyamfikela.

₂₃Kothi, ukuze sizaliswe isisu sakhe,

UThixo athumele kuye ukuvutha komsindo wakhe,

Awunise phezu kwakhe enyameni yakhe.

₂₄Ebaleka isikrweqe sesinyithi,

Lomphumela utolo lwesaphetha sobhedu.

₂₅Lurholiwe, lwaphuma emzimbeni,

Nenyembe ebengezelayo enyongweni yakhe;

Uyemka, izothuso ziphezu kwakhe.

₂₆Ubumnyama bonke bubekelwe iingqwebo zakhe;

Udliwa ngumlilo ongavuthelwanga;

Ugqibe okusindileyo ententeni yakhe.

₂₇Izulu lobutyhila ubugwenxa bakhe,

Nehlabathi lisukele phezulu kuye.

₂₈Iya kufuduswa indyebo yendlu yakhe,

Ikhukuliswe ngomhla womsindo wakhe.

₂₉Siso eso isabelo somntu ongendawo, sivela kuThixo,

Nelifa alimiselweyo yena nguThixo.