UYOBHI 16

₂Ndivé izinto ezininzi ezinjengezo;

Ningabathuthuzeli abayindinisa, nonke niphela.

₃Aphelile na amazwi angumoya?

Ùxhokonxwa yintoni na, ukuba uphendule?

₄Nam ndibe ndingathethayo njengani.

Ukuba umphefumlo wenu ubusendaweni yomphefumlo wam.

Ndibe ndinganiqukela ukuthetha,

Ndinihlunguzele intloko;

₅Ndibe ndinganikhaliphisa ngomlomo wam,

Nokukhuza komlomo wam kulunqande usizi lwenu.

₆Nokuba ndithe ndathetha, àwunqandwa umvandedwa wam;

Nokuba ndithe ndayeka, kumka ntoni na kum?

₇Hayi, ngoku úndidinisile;

Ùliphanzisile lonke ibandla lam.

₈Ùndintshwenyisile, kwaba lingqina oko;

Kwandimela ukubhitya kwam,

Kwaphendula ebusweni bam.

₉Umsindo wakhe wandiqwenga, wanditshutshisa;

Úditshixizele amenyo akhe;

Engumbandezeli wam, uwenzé abukhali amehlo akhe kum.

₁₀Bandakhaméle umlomo;

Ngengcikivo bandibetha ezidleleni;

Bonke bayathelelana ukundichasa.

₁₁UThixo wandinikela kumakhwenkwe,

Wandijulela ezandleni zabangendawo.

₁₂Ndibi ndichulumacha, wándivithavitha,

Wandibamba ngentamo, wandihlekeza,

Wandimisa ndaba yitekeni• kuye.

₁₃Bandirhawula abatoli bakhe,

Wazityanda izintso zam, engenalufefe,

Wayiphalazela emhlabeni inyongo yam.

₁₄Wandenza iinduma ngeenduma,

Wandigila njengegorha.

₁₅Ndathungela iingubo ezirhwexayo enkwaneni yolùsu lwam,

Ndalugquba ngothuli uphondo lwam.

₁₆Ubuso bam bubomvu kunene kukulila,

Phezu kweenkophe zam lithunzi lokufa;

₁₇Nakuba kungekho kugonyamela ezandleni zam,

Uqaqambile umthandazo wam.

₁₈Mhlaba, musa ukuliselela igazi lam,

Kungabi nasikhundla ukuhlahlamba kwam.

₁₉Nangoku, yabona, lisemazulwini ingqina lam;

Ondivumelayo usezindaweni eziphezulu.

₂₀Abandigxekayo ngabethu aba;

Iliso lam liyengezela kuThixo,

₂₁Ukuba alungisele umfo kuThixo,

Ahlule phakathi komntu nommelwane wakhe.

₂₂Kuba iminyaka embalwa iza kudlula,

Ndihàmbe ke umendo endingayi kubuya ngawo.