UYOBHI 14

₁Umntu, into ezelwe ngumfazi,

Imihla yakhe mifutshane, izele ziinkathazo.

₂Uphuma njengentyantyambo, abune;

Ubaleka njengethunzi, angemi.

₃Onjalo ùmvelela ngeliso lakho,

Undimise mna ematyaleni phambi kwakho?

₄Akwaba bekukho ohlambulukileyo ophume koyinqambi!

Akukho nokuba abe mnye.

₅Imisiwe nje imihla yakhe,

Liyaziwa nguwe inani leenyanga zakhe;

Umenzéle ke umda wakhe ongenakugqithwa.

₆Susa amehlo akho kuye, aphumle,

Ade akholiswe njengomqeshwa yimini yakhe.

₇Kuba kukho ithemba emthini;

Ukuba uthe wagawulwa, wóbuya uhlume,

Igatya lawo lingapheli.

₈Ukuba ithe yaba ndala ingcambu yawo emhlabeni,

Safa isibili sawo eluthulini:

₉Ngevumba lamanzi wódubula,

Wenze amasebe njengesithodlana.

₁₀Ke yena umfo ufa angquleke;

Umntu uphuma umphefumlo; abe phi na ke?

₁₁Amanzi aselwandle ayemka;

Umlambo uyatsha, wome:

₁₂Umntu ulala phantsi ke, angavuki;

Lide izulu lingabikho, bangàqabuki,

Bangàvuswa ebuthongweni babo.

₁₃Akwaba ubungandigushayo kwelabafileyo,

Undisithelise ude ubuye umsindo wakho;

Undimisele umda, undikhumbule ke!

₁₄Ukuba úthe umfo wafa, wóphila na?

Yonke imihla yokuphuma kwam umkhosi, bendinga ndingalinda,

Kude kufike ukukhululwa kwam.

₁₅Ubungábizayo ke, ndisabele mna,

Uwulangazèle umsebenzi wezandla zakho.

₁₆Kuba ngoku uyawabala amabanga am,

Àkuzigcinile ngenxa yesono sam.

₁₇Sitywiniwe savingcelwa engxoweni isikreqo sam;

Wahlomela ebugwenxeni bam.

₁₈Kodwa intaba, isíwa, iyagubeka;

Iliwa liyashenxa endaweni yalo;

₁₉Amanzi ayawadla amatye;

Iziphango zawo ziyalukhukulisa uthuli lomhlaba;

Ithemba lomntu ùyalidakisa ke.

₂₀Ùthi gaga phezu kwakhe kuphele, emke;

Uguqula ubuso bakhe, umgxothe.

₂₁Bayazuka abantwana bakhe, angazi yena;

Baba ziimbedlenge, angagqali yena.

₂₂Kuye yedwa ibuhlungu inyama yakhe,

Umphefumlo wakhe uyalila ngaphakathi.