UYOBHI 13

₁Yabona, konke oko likubonile iliso lam,

Yakúva indlebe yam, yakúqonda.

₂Njengoko nazi ngako, ndiyazi nam;

Andiwi nganeno kwenu.

₃Kodwa mna ndinga ndingathetha kuSomandla,

Ndifuna ukuzihlamba kuThixo.

₄Kodwa ke nina ningabadyobha ngobuxoki,

Ningamagqirha angento nonke niphela.

₅Anaba benithe tu kanye;

Nibe niya kuba nilumkile.

₆Khaniphulaphule ke ukuzihlamba kwam,

Ukuphika komlomo wam nikubazele indlebe.

₇UThixo niya kumthethelela ngobugqwetha na,

Nimthethelele ngenkohliso na?

₈Niya kumnonelela na,

Niphikele uThixo na?

₉Kólunga na xa athe wanigocagoca?

Ninokumgculela na, njengokuba enokugculelwa umntu?

₁₀Wonohlwaya inene,

Ukuba nithe ngasese nanonelela umntu.

₁₁Ubungangamela bakhe abuyi kunidandathekisa na,

Kuniwele ukunkwantyisa kwakhe?

₁₂Izikhumbuzo zenu yimizekeliso yothuthu;

Iingqolo zenu zoba ziingqolo zodaka.

₁₃Yithini tu! Ndiyekeni, ukuze ndithethe,

Kundihléle okundihlelayo.

₁₄Kungani na ukuba ndiyiphathe inyama yam ngamenyo am,

Umphefumlo wam ndiwubeke ezandleni zam?

₁₅Yabona, nokuba úthe wandibulala, ndolindela kuye;

Kodwa ndozihlamba iindlela zam ebusweni bakhe.

₁₆Kwaoko koba lusindiso kum:

Okuba intshembenxa ingayi kuza ebusweni bakhe.

₁₇Yivani, nikuve ukuthetha kwam,

Nengxelo yam, ngeendlebe zenu.

₁₈Khanibone, ndilicacisile ityala lam;

Ndiyazi ukuba ndiya kugwetyelwa mna.

₁₉Ngubani na ke ongabambana nam?

Kuba bendiya kuthi tu kaloku, ndiphume umphefumlo.

₂₀Kodwa izinto ezimbini musa ukuzenza kum,

Ndize ndingazisithelisi ebusweni bakho:

₂₁Isandla sakho síse kude kum,

Nesothuso sakho singandidandathekisi.

₂₂Biza ke, ndisabele mna;

Mhlawumbi ndithethe, undiphendule.

₂₃Zingaphi na izenzo ezigwenxa, nezono zam?

Ndázise isikreqo sam, nesono sam.

₂₄Yini na ukuba ubusithelise ubuso bakho,

Ubè ndilutshaba kuwe?

₂₅Ùya kungcangcazelisa ugxothe igqabi eliphetshethwayo na,

Usukele umququ owomileyo na?

₂₆Ngokuba uzibhalela kum izinto ezikrakra,

Undidlisa ilifa lezenzo ezigwenxa zobutsha bam;

₂₇Uzifaka esitokisini• iinyawo zam,

Uwugqala wonke umendo wam;

Uzikrwelela umda ojikelezayo izithende zeenyawo zam:

₂₈Mna lo, uhageleyo njengevithi,

Njengengubo edliwe ngamanundu.