UYOHANE 11

₁Ke kaloku, kwaye kusifa umntu othile, uLazaro waseBhetani, umzi wakulooMariya, noMarta udade wabo. ₂Yaye ke inguloo Mariya, wayithambisayo iNkosi ngamafutha aqholiweyo, wazisulayo iinyawo zayo ngeenwele zakhe, omnakwabo uLazaro wayesifa. ₃Bathumela ngoko oodade babo kuye, besithi, Nkosi, uyabona, lowo ùmthandayo uyafa.

₄Evile ke uYesu wathi, Esi sifo asiyelele kufeni; singenxa yozuko lukaThixo, ukuze uNyana kaThixo azukiswe ngaso. ₅Ke uYesu wayebathanda ooMarta nomsakwabo noLazaro. ₆Uthe ngoko akuva ukuba uyafa, wakha okunene wahlala kuloo ndawo abekuyo iintsuku ezimbini. ₇Waza emveni koko wathi kubo abafundi, Masibuye siye kwelakwaYuda. ₈Bathi abafundi kuye, Rabhi,• amaYuda ebefuna ngoku ukukuxuluba ngamatye nje, ùbuya uye khona na? ₉Waphendula uYesu wathi, Àkalishumi elinamabini na amaxa emini? Ukuba umntu uthi ahambe emini, akakhubeki; ngokuba elubona ukhanyiselo lweli hlabathi. ₁₀Ke ukuba umntu uthi ahambe ebusuku, uyakhubeka; ngokuba ukukhanya kungekho kuye.

₁₁Wazithetha ezi zinto; aze emveni koko athi kubo, ULazaro, umhlobo wethu, ulele; ndiyaya ukuba ndimvuse. ₁₂Bathi ngoko abafundi bakhe, Nkosi, ukuba ulele, wósinda. ₁₃Ke yena uYesu ubethetha ukufa kwakhe. Bona ke bebeba uthetha ngokulala ubuthongo. ₁₄Wandula ngoku uYesu wathi kubo ngokungafihilisiyo, ULazaro ufile. ₁₅Ndiyavuya ke ngenxa yenu, ukuba ndibé ndingekho khona, ukuze nikholwe. Noko ke masiye kuye.

₁₆Uthe ngoko uTomas, okuthiwa nguDidimo, kubafundi kunye naye, Masiye nathi, ukuze sife naye.

₁₇Efikile ngoko uYesu, wafika eselesengcwabeni iintsuku zoné. ₁₈(Ke kaloku iBhetani ibikufuphi neYerusalem, umgama wayo uzizitadiya• ezingathi zilishumi elinazihlanu.) ₁₉Kwakufike abaninzi bakumaYuda, kwabo babenoMarta noMariya, ukuze babakhuze ngaye umnakwabo.

₂₀Akuva ngoko uMarta ukuba uYesu uyeza, wamhlangabeza; ke yena uMariya wahlala endlwini. ₂₁Wathi ngoko uMarta kuYesu, Nkosi, ukuba ubulapha, umnakwethu ange engafanga. ₂₂Nangoku ndiyazi ukuba, ongáthi ukucele kuThixo, oko wokunika uThixo.

₂₃Athi kuye uYesu, Umnakwenu uya kubuya avuke. ₂₄Athi uMarta kuye, Ndiyazi ukuba uya kubuya avuke eluvukweni, ngomhla wokugqibela. ₂₅Wathi uYesu kuye, Ndim uvuko, ndim ubomi; lowo ukholwayo kum, nokuba ubethé wafa, wodla ubomi. ₂₆Bonke abadla ubomi bekholwa kum, abasayi kufa naphakade; ùyakholwa na koko? ₂₇Athi kuye, Ewe, Nkosi, mna ndiyakholwa ukuba wena unguye uKristu,• uNyana kaThixo, lowo uzayo ehlabathini.

₂₈Waza etshilo wemka, waya wabiza uMariya umsakwabo ngasese, wathi, UMfundisi ukho, úyakubiza. ₂₉Uthi yena, akuva oko, asuke kamsinya eze kuye. ₃₀(Ke kaloku, uYesu ebengekangeni phakathi komzi; wayesekuloo ndawo uMarta wamhlangabeza ekuyo.) ₃₁Athe ngoko amaYuda abenaye endlwini emkhuza, akumbona uMariya, ukuba usuke kamsinya waphuma, amlandela esithi, Úya engcwabeni, ukuya kulila khona.

₃₂UMariya ngoko, akufika apho uYesu ebekhona, akumbona, wawa ezinyaweni zakhe, esithi kuye, Nkosi, ukuba ubulapha, ange engafanga umnakwethu. ₃₃Uthe ngoko uYesu, akumbona elila, namaYuda abeze naye elila, wafutheka, wakhathazeka. ₃₄Wathi, Nimbeke phi na? ₃₅Bathi kuye, Nkosi, yiza ubone. UYesu walila. ₃₆Ayesithi ngoko amaYuda, Yabonani ke ukumthanda kwakhe! ₃₇Ke abathile kuwo bathi, Ubengenako na lo, wawavulayo amehlo emfama, ukwenza ukuba naló angafi?

₃₈Abuye ke uYesu afutheke ngaphakathi kwakhe, eze engcwabeni. Laye ke lingumqolomba, kubekwe ilitye kuwo. ₃₉Athi uYesu, Lisuseni ilitye. Athi kuye uMarta, udade wofileyo, Nkosi, uselenuka, kuba untsuku-né efile. ₄₀Athi uYesu kuye, Anditshongo na kuwe ukuthi, Ukuba uthe wakholwa, wolubona uzuko lukaThixo? ₄₁Balisusa ngoko ilitye apho abelele khona ofileyo.

Wawaphakamisa ke amehlo uYesu, wakhangela phezulu, wathi, Bawo, ndiyabulela kuwe kuba undivile. ₄₂Mna ke bendisazi ukuba uhleli undiva; ke nditsho ngenxa yesihlwele esixhonteleyo, ukuze bakholwe ukuba wena wandithuma. ₄₃Etshilo ke, wadanduluka ngezwi elikhulu, wathi, Lazaro, phuma. ₄₄Waphuma ofileyo, ebotshiwe iinyawo nezandla ngezithandelo, nobuso bakhe bujikelwe ngeqhiya. Athi kubo uYesu, Mkhululeni, nimyeke ahambe.

₄₅Ithe ngoko into eninzi kumaYuda, ebizé kuMariya, yakuzibona izinto azenzileyo uYesu, yakholwa kuye. ₄₆Ke abathile kuwo bemka baya kubaFarisi, babaxelela izinto azenzileyo uYesu.

₄₇Bahlanganisa ngoko ababingeleli abakhulu nabaFarisi intlanganiso yamatyala, bathi, Senza ntoni na? Ngokuba lo mntu wenza imiqondiso emininzi. ₄₈Ukuba sithe samyeka ngokunje, bonke baya kukholwa kuye; athi ke amaRoma eze, athimbe indawo yethu, kwanohlanga lwethu.

₄₉Ke kaloku omnye wabo, uKayafa, engumbingeleli omkhulu ngaloo mnyaka, wathi kubo, Anazi nto nina; ₅₀kananjalo aniqondi ukuba kusilungele, ukuba kufe umntu abe mnye ngenxa yabantu, ukuze lungatshabalali uhlanga luphela. ₅₁Oku ke akakuthethanga kuphuma kuye; wathi, kuba ebengumbingeleli omkhulu ngaloo mnyaka, waprofeta ukuba uYesu uza kulufela uhlanga; ₅₂kungabi ngenxa yohlanga olo lodwa, kube ngenxa yabantwana bakaThixo abalusali, ukuba abahlanganisele ndawonye. ₅₃Kususela kuloo mini ngoko babhunga ukuba bambulale.

₅₄Ngoko uYesu akabanga sahamba ekuhléni phakathi kwamaYuda; wasuka wemka apho, waya ezweni elikufuphi nentlango, emzini ekuthiwa kukwaEfrayim; walibala khona apho nabafundi bakhe.

₅₅Ke kaloku yayikufuphi ipasika• yamaYuda; kwenyuka into eninzi iphuma kwelo zwe, yaya eYerusalem phambi kwayo ipasika, ukuze izenze nyulu. ₅₆Ayemfuna ngoko uYesu, ethetha odwa, emi etempileni, esithi, Nithini na? akasayi kuza na emthendelekweni? ₅₇Ke kaloku ababingeleli abakhulu nabaFarisi babewise umthetho wokuthi, ukuba umntu uthe wazi apho akhona, maze axele, ukuze bambambe.