IDUTERONOMI 32

₁Bekani indlebe, mazulu, ndithethe;

Live ihlabathi amazwi omlomo wam;

₂Ichaphàze njengemvula imfundiso yam,

Ihle njengombethe intetho yam,

Njengomkhumezelo phezu kohlaza,

Njengamathontsi phezu kotyani.

₃Ngokuba ndiya kuvakalisa igama likaYehova:

Mnikeni ubukhulu uThixo wethu!

₄NguLiwa; ugqibele umsebenzi wakhe,

Ngokuba zonke iindlela zakhe zisesikweni;

NguThixo wentembeko, tu ubugqwetha;

Lilungisa, uthe tye yena.

₅Isizukulwana esijibilizayo, esibhijeleneyo,

Sizonakalisile kuye — singenyana bakhe, sisiphako sabo.

₆Nènjenje na ukumphatha uYehova?

Bantundini banobudenge, bangenabulumko,

Akanguye na uyihlo okudalileyo,

Okwenzileyo, okusekileyo?

₇Khumbula iimini zasephakadeni,

Qonda iminyaka yezizukulwana ngezizukulwana.

Buza kooyihlo, bakubalisele,

Kumadoda amakhulu akowenu, akuxelele.

₈Ekuzabeleni kOsenyangweni iintlanga ilifa,

Ekubahlulahluleni kwakhe oonyana baka-Adam,

Wayimisa imida yezizwe

Ngokwenani loonyana bakaSirayeli.

₉Kuba isabelo sikaYehova ngabantu bakhe,

UYakobi licandelo lelifa lakhe.

₁₀Wamfumana ezweni eliyintlango,

Enyanyeni, enkangala ebhombolozayo;

Wamwola, wamondla,

Wamlondoloza njengokhozo lweliso lakhe.

₁₁Njengokhozi lususela,

Lundanda phezu kwamathole alo,

Wawolula amaphiko akhe, wamthabatha,

Wamthwala ngamaphiko akhe.

₁₂Wamkhokela uYehova yedwa,

Engenathixo wolunye uhlanga naye.

₁₃Wamkhwelisa emimangweni yehlabathi;

Wadla ke iziveliso zamasimi;

Wammunyisa ubusi engxondorheni,

Neoli eweni leqhwitha;

₁₄Amasi eenkomo, nobisi lwempahla emfutshane,

Kunye namanqatha eemvana;

Neenkunzi zezimvu, amatakane aseBhashan, neebhokhwe,

Kunye namanqatha ezintso zengqolowa;

Negazi lediliya walisela, liyiwayini enegwebu.

₁₅Watyeba ke uYeshurun, wakhaba;

Watyeba wena, wanesibili, wathi fithi;

Wamlahla uThixo owamenzayo,

Walenza isidenge iLiwa lokusindiswa kwakhe.

₁₆Bamkhweletisa ngoothixo basemzini,

Bamqumbisa ngamasikizi.

₁₇Babingelela kwiidemon ezingeThixo,

Koothixo abangabaziyo,

Kwabatsha abasandula ukufika,

Ababengabahlonele ooyihlo.

₁₈ILiwa elakuzalayo walihilizela,

Wamlibala uThixo owaba nenimba ngawe.

₁₉Wabona uYehova, wabalahla,

Ngokuqunjiswa ngoonyana bakhe neentombi zakhe.

₂₀Wathi, Ndiya kubusithelisa ubuso bam kubo,

Ndibòne ukuba koba yintoni na ukuphela kwabo;

Ngokuba basisizukulwana sempenduka,

Ngoonyana abangenantembeko.

₂₁Bona bandikhweletisa ngongeThixo,

Bandiqumbisa ngamampunge abo.

Nam ndiya kubakhweletisa ngabangebantu,

Ndibaqumbise ngohlanga olunobudenge.

₂₂Ngokuba kuphenjwé umlilo emathatheni am;

Utsha ude use kwelingaphantsi labafileyo,

Ulidle ihlabathi neendyebo zalo,

Uvuthise iziseko zeentaba.

₂₃Ndiya kufumba ububi phezu kwabo,

Iintolo zam ndiziphelelisele kubo;

₂₄Omakhanywa kukulamba, omadliwa kukurhala,

Nembubhiso ekrakra.

Ndiya kubathumela izinyo lamarhamncwa,

Nobuhlungu bezinambuzane zothuli.

₂₅Ngaphandle kophanga ikrele,

Ezingontsini kuphange izothuso,

Kufane indodana nentombi,

Kufane owanyáyo nengwevu.

₂₆Ngendiba ndithi, Ndiya kubaphephetha,

Ndisiphelise isikhumbuzo sabo ebantwini;

₂₇Koko ndinxungupheleyo kukuqunjiswa lutshaba,

Hleze ababandezeli babo bangaqondi;

Hleze bathi, Kuphakamé isandla sethu;

Àkwenziwe nguYehova oku konke.

₂₈Ngokuba luhlanga oluphelelwe ngamacebo,

Tu ingqondo kubo.

₂₉Akwaba babelumkile; ngebekuqiqa oku,

Basiqonde isiphelo sabo.

₃₀Yo! Ebengayi kuthi na emnye kubo asukele iwaka,

Bebabini bagxothe amawaka alishumi,

Ukuba belingathengisanga ngabo iLiwa labo,

Wabanikela uYehova?

₃₁Kuba alinjengeLiwa lethu iliwa lazo,

Iintshaba zethu zingabagwebi boko.

₃₂Kuba umdiliya wabo ngowomdiliya waseSodom,

Ngowamasimi aseGomora.

Iidiliya zabo ziidiliya ezinobuhlungu,

Izihloko zazo zinobukrakra.

₃₃Bubuhlungu benyushu iwayini yabo,

Yinyongo enobujorha yamaphimpi.

₃₄Oku àkubekwe kum na,

Kwavingcelwa koovimba bam?

₃₅Yeyam impindezelo nembuyekezo

Ngexesha lokutyibilika konyawo lwabo;

Ngokuba usondele umhla wokusindeka kwabo,

Kuyakhawuleza abakumiselweyo.

₃₆Ngokuba úya kugweba phakathi kwabantu bakhe uYehova,

Azohlwaye ngenxa yabakhonzi bakhe,

Xa abonayo ukuba ethile amandla,

Uphelile ovalelweyo novulelweyo.

₃₇Wóthi ke, Baphi na kaloku oothixo babo,

Iliwa ababezimela ngalo:

₃₈Ababesidla amanqatha emibingelelo yabo,

Ababesela iwayini yeminikelo yabo ethululwayo?

Mabasuke banincede,

Kubekho isithe phezu kwenu.

₃₉Bonani ngoku, ukuba mna ndinguye;

Tu thixo unam.

Ndiyabulala, ndidlise ubomi;

Ndiyaphalusa, ndiphilise mna;

Tu uhlangulayo esandleni sam.

₄₀Ngokuba ndisiphakamisela emazulwini isandla sam;

Ndithi, Ndihleli nje mna ngonaphakade,

₄₁Ukuba ndithe ndalilola ikrele lam elingumbane,

Sabambelela elugwebeni isandla sam,

Ndoyibuyisela impindezelo kubabandezeli bam,

Ndibuyekeze kubathiyi bam.

₄₂Ndozinxilisa iintolo zam ngegazi,

Ikrele lam liyidle inyama

Ngegazi labahlatyiweyo nabathinjiweyo,

Ngentloko enesihlwitha yotshaba.

₄₃Memelelani, zintlanga, ngenxa yabantu bakhe,

Ngokuba eliphindezelela igazi labakhonzi bakhe,

Abuyisele impindezelo kubabandezeli bakhe,

Awucamagushele ke umhlaba wakhe nabantu bakhe.