Ingoma ka‐Solomone 4

₁Bona ke, umhle, sihlobokazi sam! bona ke, umhle; amehlo ako ngamahobe ngasemva kwesigqubutelo sako; inwele zako zinjengomhlambi webokwe ezibonakalayo entabeni ye‐Gileyadi. ₂Amazinyo ako anjengomhlambi wegushakazi ezicetyiweyo, ezinyukayo endaweni yokuhlambela, eziti zonke ngezinye zizale amawele, nekungeko pakati kwazo efelweyo. ₃Udebe lwako lunjengomsonto wesibomvu, nomlomo wako unobuhle; isidlele sako sinjengeqezu legranate ngasemva kwesigqubutelo sako. ₄Intamo yako injengenqaba ka‐Davide, eyakelwa izixo̔bo; amakakana aliwaka axo̔mekile pezu kwayo, intlobo zonke zamakaka amaṙoti. ₅Amabele ako omabini anjengamatole mabini engamawele ebadikazi, adlayo pakati kwazo inyibiba.

₆Xeshekweni kupola imini, abaleke amatunzi, ndoya entabeni yemore, nasendulini yentlakamhlope.

₇Umhle kanye, sihlobokazi sam! akuko bala kuwe. ₈Wopuma nam e‐Lebanone, mtshakazi! wopuma nam e‐Lebanone; uya kusuka engcotsheni ye‐Amana, engcotsheni ye‐Shenire ne‐Heremone, ezindaweni zokuhlala zengonyama, ezintabeni zezingwe. ₉Undikalipisile, dade wam, mtshakazi! undikalipisile, ngelinye lamehlo ako, ngesambalo sinye sentamo yako. ₁₀Lumnandi kangakananina utando lwako, dade wam, mtshakazi! lulungile kangakananina utando lwako ngapezu kweveyine! nevumba lamafuta ako ngapezu kwezimnandi zonke! ₁₁Udebe lwako, mtshakazi! luyatontsela incindi; ubusi nobisi lungapantsi kwolwimi lwako; nevumba lezivato zako linjengevumba le‐Lebanone. ₁₂Usisitiya esivalelweyo, dade wam, mtshakazi! ulitende elivingcelweyo, umtombo oncanyatiselweyo. ₁₃Izityalo zako zingumyezo wegranate, kunye neziqa̔mo ezimnandi; ikofere, kunye nenadusi; ₁₄inadusi nesafrone, ikalame nekinamone, kunye nemiti yonke yentlakamhlope; imore neyahali, kunye nezimnandi zonke ezidumileyo; ₁₅umtombo wezitiya, iqula lamanzi apilileyo, nezelo zivela e‐Lebanone. ₁₆Vuka, moya wasenode! uze ke, moya wasesuyide! qutela isitiya sam, apume ke amavumba aso amnandi.

Masingene esitiyeni saso isitandwa sam, sidle iziqa̔mo zaso ezimnandi.