Ingoma ka‐Solomone 1

₁INGOMA yengoma, eyeka‐Solomone.

₂Makandange ngokwanga kwomlomo wake: ngokuba utando lwako lumnandi pezu kweveyine. ₃Amafuta ako amnandi ngevumba; igama lako linjengamafuta atululwayo; kukona intombi zikutandayo. ₄Ndir̔ole, sobaleka emva kwako: ukumkani undingenisile ezinkambilini zake; siya kugcoba sivuye ngawe; utando lwako soluncoma ngapezu kweveyine; abalungileyo bayakutanda.

₅Ndimnyama, ndinobuhle noko, nina zintombi zase‐Yerusaleme! njengentente zakwa‐Kedare, njengezikuselo zika‐Solomone. ₆Ungandikangeli kuba ndimnyamaṙa, ngokuba ilanga lindibalelele: bati onyana bakama̔ bandiqumbela, bandenza umlindi wemiyezo; owam umyezo andiwulindanga. ₇Ndixelele, wena utandwayo ngumpefumlo wam! kupina apo walusayo? kupina apo ubutumisa kona emini enkulu? ngokuba kunganina ukuba ndibe njengogqubuteleyo, ngasemihlambini yamakolwane ako?

₈Ukuba akwazi, wena mhle pakati kwamankazana! puma uye emikondweni yomhlambi, uwaluse amatakane ako ngasezintenteni zabalusi.

₉Ndikufanisile, sihlobokazi sam! nehashe lam pakati kwawenqwelo zika‐Faro. ₁₀Zihle izidlele zako pakati kwezitsaba, nentamo yako pakati kwezidanga. ₁₁Sokwenzela izitsaba zegolide, kunye namaqulana esilivere.

₁₂Nxa ukumkani angasetafileni yake, inadusi yam iyanika ivumba layo. ₁₃Sisiqunyana semore isitandwa sam kum, esihlala pakati kwamabele am. ₁₄Sisipa sentyatyambo zekofere isitandwa sam kum, emiyezweni yase‐Henegedi.

₁₅Bona ke, umhle, sihlobokazi sam! bona ke, umhle; amehlo ako ngamahobe.

₁₆Bona ke, umhle, sitandwa sam! ewe, umnandi: kanjalo umandlalo wetu uluhlaza; ₁₇imiqadi yendlu yetu zisedare; isifulelo setu ziberoshe.