Amaculo 115

₁MAKUNGABI kuti, Yehova! makungabi kuti, makube kwigama lako ekunikelwa ubungcwalisa, ngenxa yobubele bako, nangenxa yenyaniso yako. ₂Yinina ukuba abaheyideni babe nokuti: Upina ke utixo wabo? ₃Kodwa utixo wetu usezulwini: konke akutandayo uyakwenza.

₄Izitixo zabo zezesilivere negolide, umsebenzi wezandla zabantu. ₅Zinemilomo, kanti aziteti; zinamehlo, kanti aziboni; ₆zinendlebe, kanti aziva; zinempumlo, kanti azijoji; ₇zinezandla, kanti azipati; zinenyawo, kanti azihambi; azivakalisi ngomqala wazo. ₈Abo bazenzayo bayafana nazo; nabo bonke abatembela kuzo.

₉Sirayeli! tembela kuyehova; ungumncedi wabo yena, nekaka labo. ₁₀Ndlu ka‐Arone! tembelani kuyehova; ungumncedi wabo yena, nekaka labo. ₁₁Nina bamoyikayo uyehova! tembelani kuyehova; ungumncedi wabo yena, nekaka labo.

₁₂Uyehova usikumbule; uya kutamsanqelisa: uya kutamsanqelisa indlu ka‐Sirayeli; uya kutamsanqelisa indlu ka‐Arone. ₁₃Uya kutamsanqelisa abamoyikayo uyehova, kwa abancinane nabakulu. ₁₄Uyehova uya kwongezelela pezu kwenu; pezu kwenu napezu kwabantwana benu. ₁₅Ningabatanyusanqelweyo nguyehova, owenzayo izulu nomhlaba.

₁₆Okwezulu, izulu le likayehova; kodwa umhlaba uwunikile konyana babantu. ₁₇Abafileyo abadumisi uyehova, kwa nabo bonke abehlele ekutini cwaka. ₁₈Kodwa tina siya kubonga uyehova, kwa kaloku nje, nakude kube ngunapakade. — Dumisani uyehova!