ISAHLUKO I.
1IMIZEKELISO ka‐Solomone, unyana ka‐Davide, ukumkani wo‐Sirayeli; 2yokuba kwaziwe ubulumko nemfundiso; yokuba kuqondwe iziteto zengqondo; 3yokuba kwamkelwe imfundiso yobutelekelelo; ubulungisa, nobugwebo, nolungelelwano; 4yokunika izidenge ubuciko, nomfana ukwazi nentelekeleliso. 5Ilumko liya kuva, landise ufundo; noqondayo uya kuzuza amaqinga alumkileyo: 6kuze kuqondwe umzekeliso nenteto esiteleyo, amazwi amalumko nezintsonkotelo zawo.
7UKWOYIKA uyehova kusisiqalo sokwazi: ubulumko nemfundiso amahilihili ayazidela.
8Yiva, nyana wam! imfundiso kayihlo, ungalahli umteto kanyoko. 9Ngokuba ziya kuba sisitsaba esihle zona kuyo intloko yako, nemixokelelwane entanyeni yako.
10Nyana wam! ukuba aboni bayakuhenda, zungavumi ke. 11Ukuba bati: Hamba nati, masilalele igazi, masizifihlele ofumana engenatyala; 12masibaginye behleli njengayo ihadesi; kwa besapilile, babe njengabahleleyo esihogweni: 13yonke impahla enobomi soyifumana; siya kuzalisa izindlu zetu ngamaxoba: 14iqashiso lako uya kulenza pakati kwetu; inxowa inye yoba kuti sonke: 15nyana wam! zungahambi nabo endleleni; nqanda unyawo lwako emizileni yabo: 16ngokuba inyawo zabo zibalekela ububi, zinxamela ukupalaza igazi. 17Ngenyaniso kufumana kusanekwa utambo emehlweni enye intaka: 18kanti bona bayalalela elabo igazi, bayazifihlela obabo ubomi. 19Zinjalo ke indlela zabo bonke ababawela impango; iyasusa ubomi bomniniyo.
20UBULUMKO buyadanduluka ngapandle; buyapakamisa ilizwi labo ezitarateni: 21kwezinkulu indawo zembutumbutu buyabiza, ezitubeni zamasango; esixekweni buyateta iziteto zabo, busiti: 22Kwoba kade kangakananina, zidenge! niya kutanda ubudenge, nabagxeki bazinqwenele ukugxeka, namageza atiye ukwazi? 23Ziguquleni ngokwohlwaya kwam; bona ke, ndiya kunigalelela umoya wam; ndiya kunazisa amazwi am.
24Ngokokuba ndibizile, nala nina; ndolulile isandla sam, kungabangako owapulapulayo; 25koko nilahlile lonke icebo lam, nesohlwayo sam ningasivumanga; 26nam ndiya kuhleka ilishwa lenu; ndiya kugculela kwakufika isoyiko senu; 27kwakufika isoyiko senu njengalo uquta, liti ilishwa lenu lize njengaso isaqwiti; kwakufika pezu kwenu ubunzima nesitukutezi. 28Baya kwandul’ ukundibiza, kanti andiyi kusabela; baya kundifuna msinya, kanti abasayi kundifumana: 29ngenxa yokuba betiyile ukwazi, nokuba bengaqashanga ukwoyika uyehova. 30Abavumanga icebo lam; badela konke ukwohlwaya kwam: 31ngako baya kutya kwisiqa̔mo seyabo indlela, badikwe ngawabo amacebo. 32Ngokuba ukupambuka kwezidenge kuya kuzibulala, nokungakatali kwamageza kuya kuwabubisa. 33Kodwa ondivayo mna wohlala ngokunqaba; uya kwonwaba, kungeko kwoyika ububi.
