U‐Jobi 12

₁WAZA wapendula u‐Jobi, wati:

₂Asi nokuba ningabantu ke nina! ubulumko bofa nani kambe! ₃Kodwa nam ndinokuqonda njengani; andiwi mna pantsi kwenu; he, ngubanina ongenazo izinto ezinjalo? ₄Ndinguye osisihlekiso esihlotyeni sake, obizayo kutixo, oti ampendule: usisihlekiso lowo ulungisayo, ofezekileyo. ₅Isibane, esinokudelwa ekuzindleni kwonwabileyo, siyalungiselwa abanyawo zityibilikayo.

₆Intente zabafaci zinqabile; nabo bamqumbisayo utixo banokupumla; ati utixo azise kubo ngesandla sake.

₇Kodwa kaubuze izilo, zokufundisa ke; kwa nentaka zezulu, zokutyela ke; ₈yiti umhlaumbi utete kumhlaba, wauya kukwazisa; zoti nentlanzi zolwandle zikubalisele. ₉Ngubanina ongakwazanga ngezi zonke, ukuba isandla sikayehova senzile oku; ₁₀okusesandleni sake umpefumlo wako konke okupilileyo, nomoya walo uluntu lwonke?

₁₁Indlebe ayilingi amazwi na, njengokuba ikuhlangubo lisiva ukutya? ₁₂Kuwo amaxego kuko ubulumko, nasebudeni bemihla kuko ukuqonda. ₁₃Kuko naye ubulumko namandla; unecebo nokuqonda. ₁₄Bona ke, uyacita yena, kungabuyi kwakiwa; uyamvalela umntu, kungavulwa ke. ₁₅Bona ke, uyabamba amanzi, atshe ke; uyabuya awandulule, asuke apenule umhlaba. ₁₆Kuko naye ubomelelo nobucebo: ngabake olahlekayo nolahlekisayo. ₁₇Uyawemkisa amapakati ehlubulukile, nabagwebi uyabamatisa. ₁₈Umbambo wokumkani uyawutukulula, nezinqe zabo uyazinxiba ngombinqo. ₁₉Uyemkisa abaperisite behlubulukile, nabasemandleni uyabeyelisa. ₂₀Uyabahluta abanyanisekileyo umlomo, nengqiqo yabadala uyayisusa. ₂₁Uyapalaza udelo pezu kwazo inkosi, noqwemesha lwabanamandla uyaluxengaxengisa. ₂₂Uyatyila izinto ezinzulu ezirelisa ebumnyameni, asiti gqi emhlotsheni isitunzi sokufa. ₂₃Uyakulisa izizwe, andule azibubise; uyazitwabulula izizwe, andule azifuduse. ₂₄Uyabahluta abazintloko zelizwe intliziyo, abadungudelise ebugxwayibeni obungenandlela. ₂₅Bayaputaputa ebumnyameni, kungeko ukukanya; uyabagexisa njengenxila.