I‐Duteronomi 1

₁NGAWO la amazwi abewateta u‐Mosesi kubo bonke o‐Sirayeli, nganeno kwe‐Yoredane, entlango, etafeni malungana ne‐Sufe, pakati kwe‐Parane, ne‐Tofeli, ne‐Labane, ne‐Hatserote, ne‐Dizahabi. ₂(Yihambo yemihla elishumi linesinye kusuka e‐Horebe ukuya ngendlela yentaba ye‐Sehire e‐Kadeshe‐baneha.) ₃Kwaye kute ngomnyaka wamashumi mane, ngenyanga yeshumi linesinye, ngowokuqala umhla wenyanga, wateta u‐Mosesi elusatsheni luka‐Sirayeli, njengako konke abemyalezela kona uyehova kulo: ₄emvenikweni wabebulele u‐Sihone ukumkani waba‐Amori, owahlala e‐Heshebone, no‐Hogi ukumkani we‐Bashane, owahlala e‐Hashetarote nase‐Edrehi. ₅Nganeno kwe‐Yoredane, ezweni le‐Mowabi, waqala u‐Mosesi ukushumayela lomteto, esiti:

₆Uyehova, utixo wetu, wateta kuti e‐Horebe, esiti: Kwanele ukuhlala kwenu kulentaba: ₇jikani, nihambe ke, niye entabeni yaba‐Amori, nakubo bonke abamelwane babo, etafeni, ezintabeni, ezihlanjeni, nasesuyide, naselunxwemeni lwolwandle; ezweni laba‐Kanane, nase‐Lebanone, kude kube ngumlambo omkulu, umlambo ongum‐Ferate. ₈Bona ke, ndilibekile pambi kwenu ilizwe elo: ngenani nifuye ilizwe owabefunga ngalo uyehova koyihlo benu, u‐Abrahame, u‐Yisake, no‐Yakobi, ukuba uya kulinika kubo, nakwinzalo yabo emva kwabo.

₉Ndaye ndibe nditeta kuni ngeloxesha, ndisiti: Ndikohliwe ndindedwa kukunitwala: ₁₀uyehova, utixo wenu, unenze baninzi; kekaloku, nanku namhla nje ninjengenkwenkwezi zezulu ngobuninzi. ₁₁(Wanga uyehova, utixo woyihlo benu, anganandisa ngokuliwaka pezu kwokuba njalo kwenu, anitamsanqele, njengokuba etshilo kuni!) ₁₂Ndingati nina ukutwala ndedwa indiniso yenu, nomtwalo wenu, nempikiswano yenu? ₁₃Kupani amadoda alumkileyo, anokuqonda, anokwazeka ezizweni zenu, ndize ndiwamise abe zintloko zenu. ₁₄Naye nindipendula, nati: Ilungile lonto uyitetileyo, ukuba yenziwe. ₁₅Ndaza ndatabata intloko zezizwe zenu, amadoda alumkileyo, anokwazeka, ndawenza intloko pezu kwenu, inkosi zamawaka, nenkosi zamakulu, nenkosi zamashumi mahlanu, nenkosi zamashumi manye, namagosa pakati kwezizwe zenu. ₁₆Ndaye ndiyalela abagwebi benu ngeloxesha, ndisiti: Pulapulani amatyala akoyo pakati kwabazalwana benu, nilungise ukugweba pakati kwomntu nomzalwana wake, nowasemzini onaye. ₁₇Aniyi kugqalisela ubuso ekugwebeni; niya kupulapula abancinane njengokuba nipulapula abakulu; aniyi kwoyika ubuso bomntu; ngokuba umgwebo ungo katixo: nendawo eninqabelayo, yisondezeni kum, ndandiya kuyipulapula. ₁₈Kanjalo ndabendiyalela nina ngeloxesha zonke izinto eninge nizenza.

₁₉Sati sakunduluka e‐Horebe, sandula sacanda kuyo yonke leyontlango inkulu neyoyikekayo, enaniyibona endleleni yentaba yaba‐Amori, njengokuba ebesiyalele uyehova, utixo wetu; sada safika e‐Kadeshe‐baneha. ₂₀Ndaza ndati kuni: Nifikile entabeni yaba‐Amori, esiyipiwayo nguyehova, utixo wetu. ₂₁Kangela ke, uyehova, utixo wako, ubekile elozwe pambi kwako; nyuka, libambe, njengokuba uyehova, utixo woyihlo bako, etshilo kuwe; ungoyiki, ungatuswa nokutuswa.

₂₂Naza nasondela kum nonke, nati: Siya kususa amadoda aye pambi kwetu, aya kusipandela ilizwe, asibuyisele ilizwi ngendlela esiya kunyuka ngayo, nangezixeko esiya kufika kuzo. ₂₃Kekaloku leyonto ibilungile emehlweni am; ndaza ndacapula kuni amadoda alishumi linamabini, indoda nye ngesizwe ngesizwe: ₂₄ajika ke, enyukela ngasentabeni, aza kufika entilini ye‐Shekole, ayihlola ke. ₂₅Ati kanjalo atabata kwisiqa̔mo selizwe ezandleni zawo, asihlisela kuti, asibuyisela ilizwi, ati: Lilungile elozwe asipayo uyehova, utixo wetu.

₂₆Noko naningavumi ukunyuka, kodwa nalivukela ilizwi likayehova, utixo wenu. ₂₇Naye nibe niseya ezintenteni zenu, nati: Ngokuba uyehova esitiyile, usipumisile elizweni le‐Jipete, ukuba asinikele ezandleni zaba‐Amori, ukusitshabalalisa. ₂₈Sesiya kunyuka ukuya pina? abazalwana betu banyibilikisile intliziyo zetu, besiti: Abantu ngabakulu nabade kuti; izixeko zezikulu nezinqatyiselweyo kwada kwasezulwini; kanjako nosapo lwama‐Hanaki sasilubona apo.

₂₉Ndaza ndati kuni: Ningankwantyi, ningaboyiki nokuboyika. ₃₀Uyehova, utixo wenu, ohambayo pambi kwenu, nguye oya kunilwela; njengako konke wanenzelayo e‐Jipete pambi kwamehlo enu, ₃₁nasentlango, apo nibonileyo okokuba uyehova, utixo wenu, unitwele, njengokuba umntu etwala unyana wake, kuyo yonke indlela benihamba ngayo, nada nafika kulendawo.

₃₂Kodwa nangalento beningakolwa nguyehova, utixo wenu, ₃₃obehamba pambi kwenu endleleni, ukuya kunihlolela indawo yokuti waca kwenu, ngomlilo ebusuku, ukuba anibonise indlela eniya kuhamba ngayo, nangelifu emini.

₃₄Wati uyehova akuva ilizwi lamazwi enu, waqumba kunene, wafunga, esiti: ₃₅Ngenyaniso akuyi kubako nanye kulamadoda esisizukulwana sikohlakeleyo, eya kubona elolizwe lilungileyo, endandifunga ngalo ukuba ndiya kulinika koyihlo benu, ₃₆ngapandle kwo‐Kalebi, unyana ka‐Jefune! yena wolibona, nakuye ndowunika umhlaba abenyatela pezu kwawo, nakubo abantwana bake, ngenxa yokuba ekolisile ukulandela uyehova. ₃₇Kanjalo nam wandiqumbela uyehova ngenxa yenu, esiti: Nawe akuyi kungena kona: ₃₈u‐Yoshuwa, unyana ka‐Nune, omiyo ebusweni bako, yena uya kungena kona; lowo momeleze ke: ngokuba eya kubamkelisa o‐Sirayeli ilifa lalo. ₃₉Nentsapo zenu, enanisiti: Zoba lixoba; nabantwana benu, abangakwaziyo namhla okulungileyo nokukohlakeleyo, aba baya kungena kona, nakubo bona ndiya kulinika, baye bona beya kulifuya. ₄₀Kodwa nina, jikani, nihambele ngasentlango, ngendlela yaselwandle olubomvu.

₄₁Naza napendula nati kum: Sonile ngakuye uyehova tina; sesiya kunyuka silwe, njengako konke asiyaleleyo uyehova, utixo wetu. Xeshikweni nise nibinqile abanye ngabanye ngempahla zabo zokulwa, ninxamile nje ukunyukela entabeni, ₄₂wandula wati uyehova kum: Yiti kubo: Ningenyuki, ningalwi kanjako, ngokuba ndingeko mna pakati kwenu; ukuze ningoyiswa pambi kwentshaba zenu. ₄₃Koko ndakuteta kuni, nibe ningapulapuli; kodwa navukelana nelizwi likayehova, nenza nger̔atshi, nenyukela entabeni. ₄₄Bandul’ ukupumela ngakuni aba‐Amori, abebehlala kulontaba, banisukela, njengokuba zisenje njalo inyosi, banicitela e‐Sehire, nakude kwase‐Horema. ₄₅Nada nabuya ke, nalila pambi kwoyehova: kanti uyehova akapulapula ilizwi lenu, akanibekela indlebe kanjako. ₄₆Kwa njalo nibe nihlala e‐Kadeshe imihla yamininzi, njengemihla enibe nihlala ngayo.