Eyokuqala yezikronike 14

₁KEKALOKU u‐Hirame, ukumkani we‐Tire, watuma izigidimi ukuya ku‐Davide, nemiti yesedare, nencibi zendonga, nencibi zemiti, ukuze akelwe indlu. ₂Waza wanakana u‐Davide ukuba uyehova ebemqinisile ukuba ngukumkani pezu kwo‐Sirayeli; ngokuba ubukumkani bake bebupakanyiselwa pezulu, ngenxa yabantu bake o‐Sirayeli.

₃Walekela u‐Davide ukuzeka abafazi e‐Yerusaleme; walekela u‐Davide nokuzala onyana nentombi. ₄Ngawo la amagama abo abantwana abenabo e‐Yerusaleme: u‐Shamuha, no‐Shobabe, no‐Natane, no‐Solomone, ₅no‐Yibare, no‐Elishuha, no‐Elifelete, ₆no‐Noga, no‐Nefege, no‐Yafiya, ₇no‐Elishama, no‐Beliyada, no‐Elifelete.

₈KWATI kwakuviwa ngama‐Filistiya ukuba u‐Davide utanjisiwe abe ngukumkani pezu kwo‐Sirayeli bonke, andula enyuka onke ama‐Filistiya ukuya kumfuna u‐Davide. Waza u‐Davide, akuva oko, wapuma ngakuwo. ₉Ada eza ama‐Filistiya, azitwabulula emhlanjeni wama‐Rafa. ₁₀Waza u‐Davide wabuza kutixo, esiti: Ndiya kunyuka na ngakuwo ama‐Filistiya? wowanikela esandleni sam na? Wayesiti uyehova kuye: Nyuka; ngokuba ndiya kuwanikela esandleni sako. ₁₁Kwati kwakunyukelwa e‐Bali‐peratsime, wawabeta kona u‐Davide. Wandula wati u‐Davide: Utixo utyobozele ezintshabeni zam ngesandla sam njengesityobozelo samanzi. Ngako oko kwabizwa igama lalondawo ngokuti yi‐Bali‐peratsime. ₁₂Ayeshiya kona otixo bawo; waza waxela u‐Davide, batshiswa ngomlilo.

₁₃Apinda kanjako ama‐Filistiya azitwabulula emhlanjeni lowo. ₁₄Ngako u‐Davide wabuya wabuza kutixo; waye utixo esiti kuye: Ungenyuki emva kwawo; jika umke kuwo, uye uwafikele malungana nemiti yebaka. ₁₅Kwakuya kuti, nxa uvayo isandi sokuhanjwa ezincameni zemiti yebaka, wandule ukupuma ukulwa; ngokuba selepumile utixo pambi kwako, ukubeta umkosi wama‐Filistiya. ₁₆Wenje njalo u‐Davide, njengokuba utixo ebemyalele: kwaza kwabetwa umkosi wama‐Filistiya kwa se‐Gibeyone kude kwase‐Gezere.

₁₇Lwandula udumo luka‐Davide lwapumela emazweni onke; wati uyehova wabeka ukwoyikwa kwake pezu kwezizwe zonke.