VHUṰALI 2

₁Vhavhi vha ḓikhakhisa vha ri,

“Vhutshilo hashu a vhu yi thambo,

a vhu na tshi takadzaho;

lufu a lu na mushonga,

a hu na o no vhuyaho

a tshi bva dindini.

₂Ro sokou tshenuwa ro bebiwa;

ri ḓo fhedza ra nga a ro ngo vhuya ra vha hone.

Mufemo u re ningoni dzashu ndi vhutsi,

muhumbulo ndi ṱhase yo fungwaho nga u rwa ha mbilu dzashu;

₃musi i tshi dzima,

mivhili yashu i ḓo vha milora,

mimuya ya balangana tshikhalani.

₄Dzina ḽashu ḽi ḓo vhuya ḽa hangwiwa,

ha si tsha vha na ane a humbula mishumo yashu.

Vhutshilo hashu vhu ḓo fhira unga murunzi wa gole,

ha balangana unga khuli ḓuvha ḽi tshi ṱavha.

₅Hufha maḓuvha ashu a tshi nga u fhira ha murunzi,

ra lovha ra si tsha vhuya.

Ho shatelwa nga phula,

ra fa a ri tsha vhuya.

₆Zwino iḓani ri ḓiphiṋe nga zwithu zwavhuḓi

zwi re hone ṋamusi;

ri tshee vhaswa,

nga ri ḓiphiṋe nga zwisikwa.

₇Nga ri nwe waini ya mutengo muhulu ri fure,

ri ḓole zwinukheleli;

ri songo fhirwa nga dzuvha na ḽithihi ḽa ṱhumalurere.

₈Nga ri ambare khare dza maluvha a sa athu puta.

₉Hu songo vha na ane a kundwa

mukovhe wawe wa u ḓiphiṋa;

hoṱhe nga ri sie zwiga zwa u pembela hashu,

ngauri uyu ndi mukovhe washu,

ndi zwashu!

₁₀Nga ri kandeledze mushai a si na mulandu,

na tshilikadzi ri i sale murahu;

ri songo hulisa mukalaha o tshenaho ṱhoho.

₁₁Tshine ra kona ndi tshone tshine ra vhona tshi tshone,

ngauri u shaya nungo hu tou vha hu sa farisi tshithu.

₁₂Nga ri lalele muthu a si na mulandu;

u a ri dina, u lwa na zwine ra ita,

u ri kaidzela u pfuka Mulayo,

u ri ro laṱa ndayo ya vhabebi.

₁₃U ri u ḓivha Mudzimu,

u ḓiita ṅwana wa Muṋe washu.

₁₄Riṋe ri vhona a tshi sanda mihumbulo yashu;

u tou mu vhona fhedzi zwi a ri konḓela,

₁₅ngauri vhutshilo hawe

a vhu fani na ha vhathu vhaṅwe, na nḓila dzawe ndi dziṅwe.

₁₆U ri vhona ri si vha vhukuma;

u tinya nḓila dzashu dza nga ndi dza tshika.

U ri vhavhuya

vha ḓo fhedza vhe na mashudu,

u a ṱonga a tshi ri Mudzimu ndi Khotsi awe.

₁₇Nga ri dzou vhona arali a tshi amba ngoho;

nga ri dzou mu linga

ri vhone uri u ḓo gumafhi.

₁₈Arali muvhuya e ṅwana wa Mudzimu,

Mudzimu u ḓo mu tsireledza,

a mu lamulela zwanḓani zwa maswina.

₁₉Nga ri mu linge nga u mu itela tshiṱuhu,

ri mu tambudze,

ri linge vhuthu hawe,

ri vhone arali a sa fheli mbilu.

₂₀Nga ri mu haṱulele lufu lu shonisaho,

hufha Mudzimu a tshi ḓo mu lamulela

a thi ri u khou ralo?”

₂₁Iyo yo vha i mihumbulo yavho,

hone vho ḓixedza;

vho swingiswa nga vhunwa havho.

₂₂A vha ḓivhi nzudzanyo ya Mudzimu yo dzumbamaho,

a vho ngo lavhelela pfufho ya vhukhethwa,

a vha vhoni uri vha si na mulandu vha ḓo pfufhiwa.

₂₃Hufha muthu o vhumbelwa

u sa lovha;

Mudzimu o mu ita a tshi fanyisa vhunṋe hawe.

₂₄Lufu lu tshi dzhena shangoni

ndi nga vivho ḽa diabolo fhedzi;

vha re vhawe vha ḓo vhona zwo ralo.