VHUṰALI 16

₁Ndi zwe vhathu avho

zwa vha zwo vha fanela

musi vha tshi tambudzwa

nga zwipuka zwo raloho,

vha pfiswa vhuṱungu

nga lutsinga lwa zwikhokhonono.

₂Hone vhathu vhau a wo ngo vha rwa,

tshau wo vha itela vhuthu,

wa vha ṋea khwali vha ḽa

zwone zwiḽiwa zwi rothisaho nthe

uri vha fure

vha si tsha tambula nga nḓala.

₃Ngauralo Vhaegipita

vha tshi vhona zwithu zwi nengisaho

zwo rumelwaho u vha tambudza

vha pfe vha sa tsha funa u ḽa,

ngeno vhathu vhau

vho ri u dziṅwa zwiḽiwa tshifhinganyana

vha vho avhelwa zwi ḓifhesaho.

₄Ngauralo zwo vha zwi tshi ṱoḓea uri vhakandeledzi vhavho

vha welwe nga nḓala i sa vha humeli,

lwe vhathu vhau vha sumbedzwa

uri vhakandeledzi vha khou ṱungufhadzwa hani.

₅Naho vho welwa nga mbiti dzi ofhisaho

dza zwivhanda,

vha tshi khou lovha

nga u luṅwa nga ṋowa dzo sombekanaho,

hone mbiti dzau a dzo ngo swika magumoni.

₆Vho tambudzwa tshifhinganyana

vha tshi kaidzwa,

vha konou ṋewa tshiga tsha u vha tshidza

nga u vha humbudza ndayo ya mulayo wau;

₇muṅwe na muṅwe we a tshi sedza o tshidzwa

hone a sa tshidzwi nga tshone tshiga

o tou tshidzwa nga Iwe Mutshidzi wa vhoṱhe.

₈Huno nga zwenezwo

wo sumbedza maswina ashu

uri ndi Iwe ane a tshidza muthu khomboni dzoṱhe,

₉ngauri vhone vho ri u luṅwa nga nzie na phuvhe, vha fa,

ha si wanale mushonga wa u vha fhodza,

ngauri vho vha vho fanela u laṱiswa

nga zwithu zwo raloho,

₁₀hone vhana vhau,

na maṋo a ṋowa dza vhuṱungu ho ngo vha vhulaha,

ngauri wo vha khathutshela

wa vha fhodza.

₁₁Vho ri u luṅwa

hu u vha humbudza ndayo dzau,

vha mbo ḓi tshidzwa kathihi,

uri vha sa ḓo hangwa tshoṱhe, vha kundwa u vhona vhuthu hau.

₁₂Vhukumakuma a vho ngo fhodzwa

nga mushonga kana phamba,

vho tshidzwa nga ipfi ḽau

ḽi tshidzaho vhoṱhe, Muṋe washu.

₁₃Vhukuma ndi Iwe Mulangavhutshilo na Mulangalufu;

Iwe u ri isa khoroni dza hele, wa dovha wa ri vhuisa.

₁₄Muthu a nga vhulaha muṅwe nga vhunwa,

hone ha tsha kona u vhuisa muya wo ṱuwaho,

ha koni u vhofholola muya

wo no hoṋelwaho dindini.

₁₅Vhukuma tshanḓa tshau a tshi tinyiwi nga muthu.

₁₆Vhavhi vhe vha u landula

vho pfiswa vhuṱungu nga maanḓa a tshanḓa tshau,

vha pandamedzwa nga mvula dzi no sokou na na tshifhango,

na mibvumbi i sa pfuli,

vha swa nga mulilo vhe lore.

₁₇Hu kha ḓi vha na zwimangadzo zwi no fhira izwo, ngezwi:

Mulilo wo ḓi gegeḓa u tshi ya

ngomu maḓini ane a dzimula zwoṱhe;

ngauri iṱali tsiko i tshi lwela vhavhuya.

₁₈Zwino khavhu tshifhinga tshiṅwe yo vha yo fhungudzwa,

uri i si fhise zwivhanda

zwo rumelwaho u tambudza vhavhi,

hu tshi itelwa uri vhavhi vha zwi vhone,

vha ḓivhe uri vha khou tovholwa

nga khaṱhulo ya Mudzimu;

₁₉tshifhinga tshiṅwe

mulilo wo vha u tshi khou dugesa ngomu maḓini,

uri u fhise zwiliṅwa zwa tsimu ya vhavhi.

₂₀Zwo fhambana hani

na zwe wa ita vhathu vhau!

Vhone wo vha fusha nga zwiḽiwa zwa vharuṅwa,

wa vha ṋea zwiḽiwa zwo no bikwaho

zwi bvaho ḽiṱaḓulu,

zwi sa shai muḓifho na muthihi,

zwine zwa ḓifhela muṅwe na muṅwe,

wa vha fha u sa neti.

₂₁Zwiḽiwa izwo zwau

zwo vha dzumbululela vhuthu hau;

zwo ḓishandula

zwi tshi takadza muḽi wazwo,

muṅwe na muṅwe a pfa zwi na muḓifho une ene a u funa.

₂₂Mana, ane a nga gabugu na mahaḓa, ho ngo ṋoka muliloni;

ho vha u vha sumbedza

uri mulilo we wa duga tshifhangoni

wa vhengemisa lupenyo mvulani,

₂₃wonoyo mulilo

wa hangwa maanḓa awo

musi u tshi ṱangana na vhana vhau

uri vhavhuya vha wane zwiḽiwa.

₂₄Ndi uri tsiko yau i shumela Iwe Muvhumbi wayo,

ndi zwine ya akha vhura hayo u lwa na vhavhi,

hone vhane vha u fulufhela a i tsha vha pfula.

₂₅Ndi zwe nga tshifhinga tshenetsho

ya shanduka nga zwivhumbeo zwo fhambanaho

i tshi shumela vhuthu hau ha u fusha vhoṱhe,

zwi tshi ya nga zwine vha zwi ṱoḓa

na zwine vha zwi tama,

₂₆u itela uri vhana vhau

vhe Iwe Muṋe washu wa vha funa,

vha gude uri zwine zwa fusha muthu a si mitshelo yo fhambanaho,

tshine tsha vhulunga vhane vha u tenda

ndi ipfi ḽau!

₂₇Vho funzwa uri

tshe mulilo wa kundwa u tshi lozwa,

tsho mbo ḓi ṋoka

musi tshi tshi tou dudedzwa

nga maṱalazaza a ḓuvha,

₂₈uri vhathu vha zwi ḓivhe

zwauri muthu o fanela u u livhuha

ḓuvha ḽi sa athu bvisa mulomo,

a u rabele mapfuvhi a tshi tswuka.

₂₉na uri zwilavhelelwa zwa vha sa livhuhi

zwi ṋoka sa mahaḓa a vhuriha,

zwa elela sa maḓi a sa sheledzi tshithu.