VHUṰALI 14

₁Muṅwe u ḓilugisela lwendo lwa maḓini

a tshi ṱoḓa u buḓekanya magabelo o halifhaho

u vhidzelela danda ḽi sa lengi u pwashea,

ḽi no fhirwa nga tshikepe tsho mu hwalaho.

₂Ndi zwone, tshikepe tshi tshi fhaṱwa ndi nga u tama u bindula;

tshi tshi fhaṱwa zwi sumbedza vhuṱali ha mufhaṱi watsho,

₃hone tshi endedzwa nga vhulondo hau, Khotsi ashu,

Iwe we wa phula nḓila lwanzheni,

na gondo ḽi tshimbileaho magabeloni,

₄u sumbedza uri

u kona u tshidza muthu khomboni dzoṱhe,

uri na a si na vhutsila a kone u namela.

₅A u funi mishumo ya vhuṱali hau i tshi shaya mitshelo,

ndi zwine vhathu vha pfa vho tsireledzea

na ngomu ha thanda iyo ṱhukhusa,

vha buḓekanya magabelo nga gungwa

wa vha vhulunga vha si welwe nga tshithu.

₆A thi ri na kale

zwiḽa miswonḓa ya u ḓihudza i tshi lozwiwa,

Nua, mufulufhelwa wa shango o ḓi shavhela gungwani,

a endedzwa nga tshanḓa tshau,

a siela shango mbeu ya mirafho i ḓaho.

₇Zwenezwo, mashudu gungwa

ḽine ḽa shumela vhuvhuya,

₈hone tshitungulo tsho itwaho nga muthu

tsho teketelwa khathihi na muiti watsho.

Ene o teketelwa nge a tshi ita;

tshone tsho teketelwa

nge naho tshi tshithu tshi sinaho, tsha pfi mudzimu.

₉Mudzimu u nyala muvhi na vhuvhi hawe;

₁₀muvhaḓi na tshivhaḓwa zwi ḓo lovha kathihi.

₁₁Zwenezwo na zwone zwitungulo

zwa dzitshakha zwi ḓo haṱulwa,

ngauri zwo vha zwi nengisaho

vhukati ha zwivhumbwa zwa Mudzimu;

ndi zwifu zwi no fasha mimuya ya vhathu,

ndi zwikwekwe zwi no fasha milenzhe ya vha si na nzhele.

₁₂Vhupombwe ho thoma

nga muhumbulo wa u ita zwitungulo;

u zwi ita

ho mbo ḓi vha u tshinya vhutshilo.

₁₃Zwo vha zwi siho mathomoni,

nahone shango ḽi tshi fhela a zwi tsha ḓo vha hone.

₁₄Zwo ḓa shangoni

nga u ḓihudza ha vhathu ha mahandana,

zwenezwo zwi ḓo ṱavhanya u fheliswa.

₁₅Hu na khotsi we a pfesa vhuṱungu nga lufu lwa tshivutshela;

zwenezwo u vhaḓisa tshifanyiso tsha ṅwana wawe

we a ṱavhanya a zhuvhulwa khae;

zwino itsho tshe mulovha tsha vha tshitumbu

u vho tshi luvha sa mudzimu,

vhaṱunḓelwa vhawe a vha ṋekedza

khundaṱhalukanyo na vhuṱambo.

₁₆Zwino u ya na u ya,

maitele ayo mavhi a vho vha nḓowelo,

a tevhedzwa sa mulayo.

₁₇Vhavhusi na vhone vho ita mulayo

wa uri hu rerelelwe zwifanyiso zwavho,

nga u vhona uri vhaṅwe vha dzula kulesa,

a vha koni u vha luvha vhó livhana zwifhaṱuwo.

Ndi zwe vha vhumba tshifanyiso tsha khosi ine vha i hulisa,

tshine vha kona u vhona nga maṱo

vha hoya a siho, a tshi nga u henefho.

₁₈Vha sa ḓivhi khosi na vhone vho ṱuṱuwedzwa

nga u fungelela ha mutsila uyo,

vha vho anḓadza vhurereli uho,

₁₉ngauri ene nga u funa u takadza muvhusi,

o ḓidina

a vhumba tshifanyiso tsho nakaho

u fhira khosi yone iṋe,

₂₀magogo a vhathu a kungwa

nga lunako lwa mushumo uyo, zwa vha khakhisa,

onoyo ane a kha ḓi bva u huliswa sa muthu,

vha vho mu rerelela sa mudzimu.

₂₁Itsho tsha mbo ḓi vha tshikwekwe tsha vhutshilo havho hoṱhe:

vhathu vho itwa dziphuli

nga khombo dzo vha welaho,

kana u kandeledzwa nga khosi,

vha vho ṋea thanda na matombo Dzina iḽo ḽi sa ambiwi.

₂₂Huno a vho ngo fushea

nga u humbula zwo shandeaho nga Mudzimu;

vhe nndwani dzavho dza u shaya ṱhalukanyo

vho phapha mbulu kha iṅwe,

vhuvhi hoho vhu ofhisaho

vha ri ndi wone mulalo.

₂₃Vho ḓi rerelela nga u vhulaha vhana,

vha ita vhuṱambo ha tshidzumbe,

vha dovha vha rerelela nga u ita zwa vhuḓabaḓaba

na vhuhwarahwara ha maitele asili.

₂₄Zwa ita uri vha si tsha ila vhuaḓa kha kutshilele kwavho kana kha mbingano,

vha vho sokou vhulahana

na u khakhelana nga u ita vhupombwe.

₂₅Hoṱhe-hoṱhe ndi vilinga ḽa malofha,

bulayo, vhufobvu, vhufhura, vhuaḓa,

u shandukelana, mufhirifhiri,

u anela mazwifhi,

₂₆u dina vhathu-vhathu,

u sa livhuha,

u tshinya mihumbulo ya vhathu,

vhupaṱi vhu lwaho na tsiko ya muthu;

munna na mufumakadzi a vha tsha pfana,

ndi vhupombwe na u kambiwa.

₂₇Ndi zwenezwo:

u luvha zwitungulo zwi sa ambiwi

ndi tshone tshiitisi na mathomo

na magumo a vhuvhi hoṱhe.

₂₈Vhukuma vhathu avho vha tshi pembela

vha kalula vha vhuya vha tou ḓipengisa,

kana vha porofita mazwifhi,

kana vha tshila vhutshilo vhu nengisaho,

kana vha anela mazwifhi vha sa timatimi.

₂₉Vha fulufhela zwitungulo zwi si na muya,

ndi zwe vha vho anela mazwifhi vha sa ofhi ṱhamu.

₃₀Vho tshinya vha dovha:

vho shanda kuhumbulele

kwa u humbula Mudzimu,

vha ḓikumedza zwitungulo;

vho nyadza zwikhethwa

vha anela mazwifhi nga khole;

huno nge vha tshinya vha dovha

vha ḓo rwiwa vha dovha.

₃₁Vhukuma a si maanḓa

a zwithu zwine vha ana ngazwo a no ḓo vha ḓisela mafhanza,

ndi ṱhamu ya Mudzimu ya u rwa vhavhi;

vha nga si i tinye.