THOBITHI 5

₁Ndi hone Thobiasi a tshi fhindula khotsi awe Thobithi a ri, “Khotsi anga, zwoṱhe zwe vha nndaya ndi ḓo zwi ita. ₂Zwino siliva iyo ndi ḓo i wana hani kha munna uyo ndi sa mu ḓivhi, na ene a sa nnḓivhi? Ndi ḓo mu sumbedza mini uri a tende zwauri ndi ṅwana wa Thobithi, a nṋee iyo siliva? Hufha na nḓila dza u ya Media ndi sa dzi ḓivhi.”

₃Thobithi a fhindula murwa wawe Thobiasi a ri, “Vhuvhili hashu ro saina ḽiṅwalo, ḽa bva zwipiḓa zwivhili, muṅwe na muṅwe washu a vhulunga tshawe, khophi yawe nda i vhea na siliva. Zwi a kanukisa: u bva tshee nda sia siliva iyo nae ho no ḓi fhela miṅwaha ya mahumi mavhili. Zwino ṅwananga, iyo wana munna ane a fulufhedzea, u ḓo u fhelekedza. Vhukuma musi u tshi vhuya ri ḓo mu holela, hone iyo dzhia siliva iyo kha Gabaele u vhuye nayo.”

₄Thobiasi a yo ṱoḓa muthu a no ḓivha magondo ane a ḓo mu fhelekedza. Musi a tshi tou kwaṱa a mbo ḓi tangana na muruṅwa Rafaele, hone Thobiasi o vha a sa ḓivhi uri ndi muruṅwa wa Mudzimu. ₅Thobiasi a mu vhudzisa a ri, “Khonani, ni bva ngafhi?” Rafaele a fhindula a ri, “Ndi Muisraele nga iwe. Ndo ḓa fhano u ṱoḓa mushumo.” Thobiasi a ri, “Nḓila ya u ya Media ni a i ḓivha?” ₆Muruṅwa a fhindula a ri, “Ee, ndo no ḓi ya lunzhi. Fhethu afho ndi a hu ḓivha zwavhuḓi, na nḓila dza hone ndi a dzi ḓivha dzoṱhe. Ndi anzela u ya Media, ndo no ḓi dzula na shaka ḽa haṋu Gabaele ane a dzula Ragese kha ḽa Media. Ndi lwendo lwa maḓuvha mavhili u bva Ekhibathana u ya Ragese. Ragese ndi dzithavhani, Ekhibathana ndi luvhalani.” ₇Thobiasi a mu vhudza a ri, “Khonani, nndindeleni ndi thome ndi yo vhudza khotsi anga, ndi ṱoḓa uri ni mphelekedze. Vhukuma ndi ḓo ni holela.” ₈Rafaele a fhindula a ri, “Ndi zwone, ndi ḓo ni lindela, ni songo lenga.”

₉Thobiasi a huma a yo vhudza khotsi awe zwe zwa itea, a vha vhudza a ri, “Ndo wana Muisraele nga riṋe!” Thobithi a ri, “Vhidza munna uyo uri ndi ḓivhe zwauri ndi wa muṱa ufhio na tsinde ḽifhio, ndi ḓivhe arali a tshi fulufhedzea lune a nga u fhelekedza iwe ṅwananga.” Thobiasi a bva a yo vhidza munna uyo a ri, “Khonani, khotsi anga vha ṱoḓa u ni vhona.”

₁₀Rafaele a dzhena nḓuni, Thobithi ndi ene we a thoma u mu resha. Rafaele a fhindula a ri, “Ngavhe zwi tshi vha nakela, vha takala!” Thobithi a fhindula a ri, “Ndi kha ḓi vha na dakalo ḽifhio? Ndí fhano ndo pofula, a thi tsha kona u vhona tshedza tsha Mudzimu, ndi fanela u dzula swiswini nda nga vhafu vha si tsha vhona tshedza! Nangwe ndi tshi khou tshila, ndi tshifa ndo swiṱwa. Ndi sokou pfa ipfi ḽa muthu, hone a thi mu vhoni.” Rafaele a ri, “Vha songo fulufhuwa! Mudzimu u ḓo ṱuwa a tshi vha fhodza, vha songo kulea nungo!” Ndi hone Thobithi a tshi ri, “Nwananga Thobiasi u ṱoḓa u ya Media. Ni nga mu fhelekedza na mu sumbedza nḓila? Wa hashu, vhukuma ndi ḓo ni holela”. Rafaele a fhindula a ri, “Ee, ndi nga mu fhelekedza, nḓila dzoṱhe ndi a dzi ḓivha. Media ndo no ḓi ya lunzhi, nda pfukekanya midavhi yoṱhe na dzithavha, a hu na gondo ḽine nda si ḽi ḓivhe.” ₁₁Thobithi a vhudzisa a ri, “Wa hashu, edzonu mmbudza, ni wa muṱa ufhio na tsinde ḽifhio?” ₁₂Rafaele a vhudzisa a ri, “Vha vhudziselani tsinde na muṱa?” Thobithi a fhindula a ri, “Wa hashu, vhukumakuma ndi ṱoḓa u ḓivha uri ni ṅwana wa nnyi na uri ni pfi nnyi?”

₁₃Rafaele a fhindula a ri, “Ndi pfi Azaria, murwa wa shaka ḽavho Ananiasi muhulwane.” ₁₄Thobithi a ṱavha mukosi a ri, “Yawee! Ndi hayani! Wa hashu, nga u vhe mulalo! Ni songo dinalea, wa hashu, nge nda vhudzisa muṱa wa haṋu na tsinde ḽa haṋu. Ni wa hashu, ni bva kha lutsinga lwavhuḓi lwa vhaḓivhalea! Ananiasi na Nathania ndi a vha ḓivha, ndi vharwa vhavhili vha Shemaya muhulwane, ro vha ri tshi tshimbila roṱhe ri tshi ya Jerusalema u yo luvha Mudzimu. Vhone a vho ngo vhuya vha pambuwa nḓilani ya ngoho; vha haṋu ndi vhathu vhavhuḓi. Vhukumakuma ni wa tsinde ḽavhuḓi, no ṱanganedzwa!”

₁₅Thobithi a dovha a ri, “Ni ḓo hola muholo wo eḓanaho ri tshi vhala maḓuvha e na shuma, nda dovha nda inga tshinyalelo i no eḓana na ya ṅwananga. ₁₆Arali na khunyeledza lwendo nae, ndi ḓo phaphelela zwiṅwe kha muholo waṋu!” Rafaele a fhindula a ri, “Ri ḓo tshimbila roṱhe ra vhuya ra vhuya, vha songo ofha tshithu. Ri ḓo ṱuwa ro takala ra dovha ra vhuya ro takala; nḓila ya hone a i ofhisi.” ₁₇Thobithi a ri, “Wa hashu, Mudzimu a ni shudufhadze.” Ndi hone a tshi vhidza murwa wawe a ri, “Ṅwananga, dzhia zwa lwendo u ṱuwe na shaka ḽau. Ngavhe Mudzimu wa ḽiṱaḓulu a tshi u tsireledza lwendoni lwau, a u vhuisa wo takala, muruṅwa wawe a u fhelekedza no tsireledzea.”

Vha tshi vho ṱoḓa u dzhena nḓilani, Thobiasi a kuvhatedza khotsi awe na mme awe. Thobithi a mu vhudza a ri, “Ni tshimbile zwavhuḓi.” ₁₈Hone mme a Thobiasi vha thoma u lila. Vha vhudza Thobithi vha ri, “Ndi mini vho ruma ṅwananga? A si ene mugo washu wa u gogoḓela a no ri endedza? ₁₉Hufha ri sa tshili nga u vhona mali nnzhi. Hufha murwa washu e lupfumo lu no fhira mali! ₂₀Zwe Muṋe washu a ri ṋea uri ri tshile ngazwo ndi vhona uri zwo ri eḓana.” ₂₁Thobithi a vha kaidza a ri, “Ni songo ḓelwa nga muhumbulo wo raloho. Murwa washu u ḓo ṱuwa o takala a vhuya o takala. Ni ḓo zwi vhona nga aṋu maṱo a tshi vhuya o takala. ₂₂Zwino khaladzi anga, ni songo dinalea ngavho. Muruṅwa wavhuḓi u ḓo mu fhelekedza, lwendo lwawe lu ḓo naka, a vhuya á songo huvhala.”