1Nda pfa muya wanga wo vhaisala, nda gomela, nda honḓa. Ndi hone ndi tshi rabela ndi tshi khou tswimila nda ri,
Thabelo ya Thobithi ya u humbela u fa
2“Muṋe washu, Iwe u muvhuya;
mishumo yau yoṱhe a i khakhi;
nḓila dzau dzoṱhe dzi sumba tshilidzi na ngoho;
ndi Iwe Muhaṱuli wa shango.
3Zwino, Muṋe washu, nnyelelwe,
u ntsedze nga vhuthu.
U songo ntambudzela
zwe nṋe na vhokhotsi anga ra tshinya,
na zwe ra khakha nga u shaya nzhele.
4Ro u khakhela ra nyadza milayo yau.
Ndi zwe wa ri kumedza u ṱangulwa
na u thubwa na lufu,
ra vhuya ra tou vha ṱano
na tshisolo na tshinyadzo
kha tshakha dzoṱhe
he wa ri balanganyela hone.
5Ee, khaṱhulo dzau
na u anda hádzo ndi dza ngoho;
ngoho, zwine wa nnyita
zwo fanela vhuvhi hanga;
nṋe na vhokhotsi anga
a ro ngo vhulunga milayo yau,
a ro ngo tshimbila nḓilani ya ngoho
maṱoni au.
6Zwino, nnyite zwine wa funa;
vhudza muya wanga u bve kha nṋe,
ndi tsiruwe ḽifhasini, ndi vhe buse.
Ndi khwiṋe ndo ḓifela u fhira u tshila;
ndo vhudzwa samba ḽa zwi siho,
ndo ziamedzwa nga vhuṱungu.
Muṋe washu, itou amba
ndi bve kha vhuṱungu uho,
ndi ye vhuaweloni ha lini na lini.
Muṋe washu, u songo mpfuralela.
Ndi khwiṋe ndi tshi fa
u fhira u konḓelela maṱungu a vhutshilo,
na u pfa maṱamba aya!”
Sara a tshi vhudzwa samba
7Musi wonoyo, muḓini wa Ekhibathana kha ḽa Media, zwo itea uri musidzana muṅwe a vhudzwe samba nga muṅwe wa vhashumi vha khotsi awe vha vhasidzana. Musidzana onoyo ndi Sara ṅwananyana wa Reguele. 8O vha o no ḓi vhingwa nga vhanna vhaṱanu na vhavhili, hone Asimodiosi, ḽidimoni ḽivhi, ḽa vha vhulaha vha sa athu mu dzhenisa nḓuni. Musidzana wa mushumi a vhudza Sara a ri, “Ndi inwi ni no somba vhanna vhaṋu! Edzonu vhona! No no ḓi vhingwa luṱana na luvhili, hone a ni athu vhuya na vha na mashudu na muthihi wa vhanna vhaṋu. 9Ni ri rwelani? Ndi riṋe ro vhulahaho vhanna vhaṋu? Khefha ni sa vha tevheli? Ngavhe ni tshi fa ní songo vhuya na vha na ṅwana wa mutuka kana wa musidzana!”
10Musi uyo Sara o pfa o vhaisalesa mbiluni. A livha rumuni ya nṱha nḓuni ya khotsi awe a tshi khou rothisa miṱodzi, a tshi ṱoḓa u ḓinembeledza. Hone a elekanya, a ḓivhudza a ri, “Aiwa nandi. Khamusi vhathu vha nga nyadza khotsi anga vha ri, ‘Vhone vho vha vhe na ṅwananyana muthihi ane vha mu funesa, hone o ḓinembeledza nge a welwa nga khombo’. Huno ndi nga ita uri khotsi anga vho no ḓi kalaha vho rali ndi vha khokhovhedze, vha dzhene tshaloni vho ziamedzwa nga vhuṱungu. Ndi khwiṋe ndi sa ḓinembeledzi, ndi tshi tou humbela Muṋe washu uri ndi ḓifele zwanga, ndi fhambane na maṱamba aya ane nda a pfa.” 11Zwenezwo Sara a ṱharamudza zwanḓa, a livhana na winndi, a rabela a ri,
Thabelo ya Sara ya u humbela u fa
“Nga hu rendwe Iwe, Mudzimu wa tshilidzi!
Dzina ḽau nga ḽi rendwe, i huliswe lini na lini;
ngavhe mishumo yau yoṱhe i tshi endela u renda Iwe.
12Zwino Muṋe washu,
tshifhaṱuwo tshanga ndi tshi livhisa kha Iwe,
nda liladza maṱo anga.
13Itou amba ndi tsiruwe ḽifhasini
ndi si tsha ḓo dovha nda pfa maṱamba o raloho.
14Muṋe wanga, Iwe u a zwi ḓivha uri ndi tshee phorelele,
a thi athu ḓivha munna,
15na uri a thi athu shata dzina ḽanga tshika
kana dzina ḽa khotsi anga
shangoni ḽe nda thubelwa khaḽo.
Ndi nṋe ṅwananyana muthihi fhedzi wa khotsi anga;
a vha na ṅwana muṅwe a no ḓo vha muḽaifa wavho;
a vha na murathu kana shaka ḽiṅwe ḽa tsini
ane nda nga mu lindela uri a mmbinge.
Ndo no ḓi felwa nga vhanna vhaṱanu na vhavhili;
zwino ndi kha ḓi ḓo tshilelani?
Hone Muṋe washu,
arali u sa funi ndi tshi fa,
mpfele vhuṱungu
ndi si tsha dovha nda pfa samba iḽi.”
Phindulo ya dzithabelo
16Nga tshifhinga tshenetsho thabelo dza avho vhavhili dza mbo ḓi pfala vhugalani ha Mudzimu. 17Ndi hone hu tshi rumiwa muruṅwa Rafaele uri a vha fhodze vhuvhili havho: Thobithi a bviswe tshilavhi tshitshena maṱoni awe, a kone u vhona tshedza tsha Mudzimu, Sara ṅwananyana wa Reguele ene a vhingwe nga Thobiasi murwa wa Thobiti, a kone u thatha ḽidimoni ḽivhi Asimodiosi ḽi ṱutshele Sara. Ndi uri Sara o vha o bebelwa Thobiasi, a hu na munna muṅwe we a vha e na pfanelo ya u mu dzea. Nga tshifhinga tshenetsho tsha musi Thobithi a tshi humela nḓuni yawe a tshi bva muṱani, Sara ṅwananyana wa Reguele a vha a tshi khou tsela fhasi a tshi bva rumuni ya nṱha.
