Joshua
1Joshua murwa wa Nunu
o vha muhali nndwani;
o vha muporofita vhudzuloni ha Mushe.
O vha mutshidzi muhulu wa vhanangiwa vha Mudzimu,
a lifhedza maswina e a imedzana nae,
uri Vhaisraele vha wane ifa ḽavho.
2O vha e na vhugala vhuhulu musi a tshi imisa tshanḓa tshawe
a imisa banga ḽawe ó sumba miḓi ya maswina!
3We a vha a tshi nga Joshua ndi nnyi, muhali a sa humi
musi a tshi lwa nndwa dza Muṋe washu?
4Ho ngo imisa ḓuvha nga tshanḓa tshawe, ḽa ima,
musi muthihi wa vha misi mivhili naa?
5O vhidzelela Waṱaḓuluṱaḓulu Mudzimu Ramaanḓa,
a tshi dia maswina masia oṱhe;
Ramaanḓa wa ṱaḓuluṱaḓulu a mu fhindula
nga u wisa matombo mahulu a tshifhango.
6Joshua a wela mmbi ya maswina,
a tou a swielela kule tshivhangani tsha Bethe Horoni,
uri tshakha dzoṱhe dzi ḓivhe vhuhali hawe nndwani,
dzi ḓivhe uri ndi nndwa dza Muṋe washu.
Khalebe
7Joshua o ḓi kanda ṋayoni dza Mushe,
misi ya Mushe ene na Khalebe murwa wa Jefune
vha sumbedza u ofha Mudzimu
nga u imedzana na tshivhidzo tsha mavhanga,
a dzivhisa vhathu u tshinya,
vhathu vha tshi gungula
vha tshi shandukela Mudzimu a vha dzivhisa.
8Vhenevho vhavhili fhedzi ndi vhone vhe vha sa fe
kha vhanna vhoṱhe vho faraho lwendo
vha zwigidi zwa maḓana maṱanu na ḽithihi.
Vho endedza vhathu
vha swika shangoni ḽe vha kovhelwa,
shango ḽi elelaho mukhaha na ṋotshi.
9Khalebe na ene Muṋe washu o mu ṋea nungo a ḓi vha nadzo a vhuya a kalaha,
uri a kone u dzula dzithavhani ḽa ḓi vha ifa ḽa vhana vhawe,
10uri Vhaisraele vhoṱhe vha vhone
zwauri ndi zwavhuḓi u ḓiṋekedza Muṋe washu.
Vharangaphanḓa
11Vharangaphanḓa na vhone nga vha dzule vha tshi khoḓiwa!
Ndi vhanna vha songo vhuyaho vha shandukela Muṋe washu kana vha mu furalela.
12Ngavhe marambo avho a tshi dovha a tshila he vha swiṱwa hone,
ngavhe vhana vha vhanna avho vha bvumo
vha sa shonisi madzina a vhokhotsi avho!
Samuele
13Samuele o vha a tshi funwa nga Muṋe wawe,
a vha muporofita wa Muṋe washu, a imisa muvhuso wa mahosi,
a vhea vhavhusi vha vhathu vha hawe.
14O haṱula tshivhidzo
a tshi tevhedza mulayo wa Muṋe washu,
Muṋe washu a linda Jakopo.
15O vhonala e muporofita nga u fulufhedzea hawe,
a ḓivhea e muvhoni a fulufhedzeaho nga maipfi awe.
16O vhidzelela Muṋe washu Ramaanḓa,
musi maswina o mu tinga masia oṱhe,
a mu ṋekedza tshiṱhavhelo tsha ngwana i kha ḓi mamaho,
17Muṋe washu a bvuma e ṱaḓulu,
ha pfala ipfi ḽawe ḽi tshi ngindii.
18O lozwa vharangaphanḓa vha maswina,
na mahosi oṱhe a Vhafilista.
19Musi a tshi yo eḓela tshoṱhe o vhidza tshivhidzo,
a ṱanzilela a tshi pfiwa nga Muṋe washu
na nga Saulo we a mu vhumba khosi,
a ri, “Nṋe a tho ngo vhuya nda ṱanganedza tshanḓanguvhoni
kana nda dzhiela muthu tshithu na navhula zwadzo!”
Hu si vhe na muthu we a linga u mu pomoka.
20Samuele na musi o no swiṱwa a ḓi dovha a porofita,
a vhudza Saulo uri u ḓo fa;
o porofita e fhasi-fhasi mavuni,
uri a fhelise vhuvhi ha vhathu vhawe.
