SIRAKHA 19

₁Mutsila a kambwaho

ha nga pfumi;

ane a tambisa zwiṱuku zwine a vha nazwo,

u ḓo ḓi mbwandamela a tshi ya.

₂Waini na vhasadzi zwi xedza vhaṱali;

a no konana na phombwe ha tsha londa.

₃Maḽaifa au

a ḓo vha mbungu na u sina,

mushaaṱhoni u ḓo lovha.

₄Muthu a no sokou tenda muṅwe na muṅwe

ndi tshaamaano,

u tshinya hu vhaisa ene mutshinyi.

₅A no takalela vhuvhi u ḓiovhela mulandu;

₆a no vhenga zwitshele u tinya vhuvhi.

₇U songo isa phungo mmbi,

ndi hone na iwe matshelo i sa ḓo u ela.

₈A nga vha khonani, kana swina,

u songo vhuya we zwi munyu,

arali u zwi dzumba hu si u khakhela Mudzimu,

u songo zwi bula.

₉Wa amba vha ḓo sokou thetshelesa,

hone vha sala vha tshi u humbulela vhuvhi.

₁₀Zwine wa zwi pfa nga zwi fele kha iwe. U songo ofha,

zwi nga si u kukumuse wa balea!

₁₁Veveru ndi ḽone ḽi no ri u pfa zwitshele,

ḽa zwi khuba ḽa pfa vhuṱungu vhu no nga ha musadzi a tshi beba.

₁₂Tshisolo tshí mbiluni ya tsilu

tshi nga musevhe wo mu rungaho tshirumbi;

a sa ṱomola u a fa.

₁₃Wa pfa khonani i tshi khou soliwa, i vhudzise;

zwi nga vha zwi zwitshele fhedzi;

kana naho zwi zwone,

a nga si tsha dovha.

₁₄Kana wa pfa upfi muṅwe o u amba, mu vhudzise,

zwi nga vha zwi zwitshele fhedzi;

kana naho zwi zwone,

a nga si tsha dovha.

₁₅Mu vhudzise ene muṋe,

zwitshele a zwi fheli;

u songo sokou tenda zwoṱhe zwine wa zwi pfa.

₁₆Muthu a nga tshenuwa o sokou amba,

hone u si wone muhumbulo wawe.

Ndi nnyi washu

a sa athu vhuya a tshinya nga lulimi?

₁₇U sa athu shushedza muthu,

ranga u mu vhudzisa u vhe na ngoho;

ndi hone u tevhedza mulayo wa Waṱaḓuluṱaḓulu.

₂₀Vhuṱali hoṱhe ndi u ofha Muṋe washu,

u khunyeledza Mulayo ndi vhuṱali ho khunyelelaho.

₂₂U vha mufunzi wa vhuvhi a si vhuṱali,

nyeletshedzo dza vhavhi a dzi na vhuronwane khadzo.

₂₃Hu na u thanya hune ha nengisa;

a shayaho vhuṱali ndi tsilu.

₂₄A songo thanyaho

hone a tshi ofha Mudzimu

u fhira o thanyaho zwihulu hone a ḓi pfuka mulayo.

₂₅Hu na muvhi o thanyaho,

hone a sa fulufhedzei,

ha dovha ha vha na vhaṅwe vhane vha vhona ú na vhuthu,

vha vhona u tshi nga wo vuḓesa, vha nga u kunda tsengoni.

₂₆Hu na muvhi ane a ṱungufhala khole,

ngeno mbiluni vhu vhufhura fhedzi.

₂₇U kotamisa ṱhoho,

a ḓiita dzinganḓevhe.

Wa sa mu dzumbulula u ḓo u fhura.

₂₈Hu na ane a sa tshinye

nge a shaya nungo dza u tshinya;

a tou wana nzanyo, u a tshinya.

₂₉Muthu u nga mu ḓivha nga tshifhaṱuwo tshawe;

muthu wa vhuṱali u vhonala tshifhaṱuwoni tshawe.

₃₀Kuambarele kwa muthu,

na kusetshele kwawe,

na kutshimbilele,

zwoṱhe zwi sumbedza zwine a vha zwone.