VHAROMA 9

₁Ndi amba ngoho ndi wa Khristo, a thi zwifhi; na luvalo lwanga lu a ṱanzilela lu tshi vhonetshelwa nga Muya Mukhethwa ndi tshi ri ₂ndi pfa vhuṱungu vhuhulu, na mbilu yanga i dzula i tshi vhavha misi yoṱhe ₃i tshi vhavhela lushaka lwa hashu lwa Majuda vhane nda vha malofha mathihi navho, lune nda vhuya nda ri ngavhe hu tshi teketelwa nṋe zwanga nda vha kule na Khristo, ha tshidzwa vhone. ₄Ndi Vhaisraele, ndi vhone vhe Mudzimu a vha nanga uri vha vhe vhana vhawe, a vha sumbedza lupenyo lwawe, a vhofha navho milanga, a vha ṋea Mulayo wawe, a vha funza kuluvhele kwa u luvha Mudzimu, a vha fulufhedzisa zwihulwane. ₅Ndi vhone vhane vhokhotsi a Vhaisraele vha vha vhomakhulukuku wavho. Ndi vhone vhe Mesia a bebwa khavho – Ene a re Mudzimu wa ṱaḓulu ha zwoṱhe, Murendwa wa lini na lini! Amen!

₆A zwi ambi uri ipfi ḽa Mudzimu ḽo pfuvha; a si uri vhoṱhe vha lutsinga lwa Israele ndi Vhaisraele vhukuma. ₇Nahone a si uri vhoṱhe vha lutsinga lwa Abrahamu ndi vhana vhawe vhukuma. Hufha hu tshi pfi, “Vhane vha ḓo pfi vhana vhau ndi vha ha Isaka fhedzi.” ₈Ndi uri vha re vhana vha Mudzimu a si vhaḽa vhe vha sokou bebwa kha lutsinga lwa Abrahamu; vhane vha pfi vhana vha Abrahamu ndi avho vhe Mudzimu a fulufhedzisa. ₉Huno Mudzimu a tshi fulufhedzisa Abrahamu o ri, “Mwakani nga tshifhinga tshenetshi ndi tshi vhuya ndi ḓo wana Sara e na ṅwana wa mutukana.”

₁₀A si izwo fhedzi. Zwo ralo na kha Rabeka musi o ḓihwala nga aḽa malwelavanḓa a khotsi muthihi, Isaka makhulukuku washu; _11-12avho vhana vha sa athu na u bebwa, vha sa athu na u ita tshivhuya kana tshivhi, Rabeka o vhudzwa upfi, “Mukomana u ḓo luvha murathu.” Zwo ambelwa uri tshe Mudzimu a ta a tshi nanga, tshi si pfuvhe. Ho ngo vha ta nge a thoma u vhona mishumo yavho, o tou vha ta nga he a dzula o dzudzanya Ene muṋe, ₁₃unga ho ṅwalwa ha pfi, “Jakopo ndo mu funa, Esau ndo mu sanda.”

₁₄Zwino ri ri mini? Kani Mudzimu u a khakha a tshi khetha? Na kathihi! ₁₅Hufha a tshi vhudza Mushe o ri, “Ndi ḓo khathutshela ane nda funa, nda pfela vhuṱungu ane nda funa.” ₁₆Asizwo-ha, a zwi yi nga u funa ha muthu kana nga u ḓinetisa sa vha re mbambeni, zwi ya nga khathutshelo ya Ene Mudzimu. ₁₇Maṅwalo a tshi amba Farao a ri, “Ndi tshi u vhumba khosi ndo itela zwenezwi zwa uri ndi vhonadze maanḓa anga nga iwe, na uri dzina ḽanga ḽi ḓivhee shangoni ḽoṱhe.” ₁₈Asizwo-ha, u khathutshela ane a funa, a rindidza ane a funa.

₁₉Zwino u ḓo ri, “Arali zwo ralo, Mudzimu u kha ḓi vhetshelani muthu mulandu? Ndi nnyi ane a nga kha ḓi pikisa Mudzimu kha zwe a dzula o dzudzanya?” ₂₀Hee muthu, u nnyi iwe une wa ri ndi ṱaṱa khani na Mudzimu? Kani mvuvhelo i nga sengisa muvhumbi wayo ya ri, “Vho mmbumbelani nga u rali?” ₂₁Kani muvhumbi ha koni u ita tshine a funa nga vumba, vumba ḽi ḽeneḽo ḽithihi a vhumba mvuvhelo ya madzanga, a ḓi dovha a vhumba na gambiṱa ngaḽo?

₂₂Mudzimu na Ene o ralo. O konḓelela magambiṱa a u nengisa o fanelwaho nga u laṱwa, a sa fheli mbilu, a tshi funa u sumbedza ngao u halifha hawe na u vhonadza maanḓa awe, ₂₃a tshi funa na u vhonadza vhuhulu ha vhugala hawe kha mvuvhelo dze a dzi tonda, dze a dzula o dzi lugisela zwa vhugala. ₂₄Ndi amba riṋe vhe a ri vhidza, a sa vhidzi Majuda fhedzi, a tshi vhidza na vhannḓa. ₂₅Ndi zwine a amba kha Hosia a ri,

₂₇Yesaya ene a tshi ṱavhela Israele mukosi u ri, “Naho tshivhalo tsha Vhaisraele tsha nga muṱavha wa lwanzhe, hu ḓo tshidzwa vha si gathi, ₂₈ngauri Muṋe washu a tshi haṱula mafhungo shangoni u ḓo tshea a a fhedza khathihi.” ₂₉A nga maṅwe e Yesaya a amba-vho a u ri, “Ngavhe Muṋe washu Mulangazwoṱhe a si ri siele vhaṅwenyana, ndi musi ro nga Sodoma, ndi misi ri tshi fana na Gomora.”

₃₀Ri ḓo fhedza nga ḽifhio? Ri ḓo fhedza nga ḽa uri vhannḓa vhe vha sa londe vhuvhuya ndi vhone vhe vha pfi vhavhuya. Vho pfi vhavhuya nga lutendo. ₃₁Vhone Vhaisraele vhe vha londa mulayo wa u pfi vhavhuya ngawo, a vho ngo swikelela. ₃₂Vho kundwa nga mini? Vho kundwa nge vha edzisa u zwi wana nga mishumo yavho, hu si nga lutendo. Vho khukhulwa nga tombo ḽa tshikhukhuliso, ₃₃sa zwe ha ṅwalwa ha pfi,