VHAROMA 6

₁Ri ḓo ri mini-ha? Ri ḓi futelela u tshinya kani, uri tshilidzi tshi ande? ₂Na kathihi! Hufha ro fa siani ḽa vhutshinyi, ri nga kona hani u ḓi tshila khaho? ₃Kani a ni zwi ḓivhi uri musi ri tshi baḓekanywa na Khristo nga ndovhedzo ho vha u baḓekanywa na lufu lwawe? ₄U lovhedzwa ha mbo ḓi vha u fa na u swiṱwa nae, uri unga Khristo o vuswa vhafuni nga maanḓa a Khotsi, sa zwenezwo na riṋe ri tshile nga kutshilele kuswa.

₅Arali ro baḓekanywa nae nga u fa unga Ene, na kha u vuwa ri ḓo baḓekanywa nae. ₆A ri tshee phuli dza vhutshinyi, vhunga ri tshi zwi ḓivha uri muthu washu mulala o vhambiwa tshifhambanoni khathihi na Khristo, uri muthu mulala wa vhutshinyi a lovhe, ₇vhunga o faho iṱali o vhofhololwa kha vhutshinyi. ₈Arali ro fa na Khristo, ri fulufhela uri ri ḓo tshila nae. ₉Ri a zwi ḓivha uri Khristo ó vuwa vhafuni ha tsha fa; lufu a lu tshee na maanḓa khae. ₁₀A tshi fa ho vha u fhandekana na vhutshinyi, a fa luthihi zwa vha zwo fhela. U tshila hawe zwino ndi u tshilela Mudzimu. ₁₁Na inwi ivhani vho faho siani ḽa vhutshinyi, ni tshilele Mudzimu, vhunga ni vhathihi na Khristo Yesu.

₁₂Vhutshinyi vhu songo tsha vhusa mivhili yaṋu i faho; ni songo vhuswa nga nyemulo dzayo. ₁₃Nahone ni songo kumedza miraḓo yaṋu vhutshinyi uri i shume zwi songo lugaho; ḓikumedzeni Mudzimu vhunga ni vha tshilaho ni tshi bva vhafuni, na miraḓo yaṋu ni i kumedze Mudzimu uri i shume zwivhuya. ₁₄Vhutshinyi a vhu tsha ḓo ni langa, vhunga ni si tshee dangani ḽa Mulayo, nó no vha dangani ḽa tshilidzi.

₁₅Zwino ró no bva dangani ḽa Mulayo, ró no dzhena dangani ḽa tshilidzi, ri a tshinya zwashu na? Na kathihi! ₁₆A ni zwi ḓivhi uri onoyo ane na ḓikumedza ene uri ni mu pfe, ni tou vha phuli dzawe tshoṱhe? Arali na ḓikumedza u tshinya, ḓivhani uri phuli dza vhutshinyi dzi ḓo lovha; arali na ḓikumedza u pfa Mudzimu ni ḓo pfi vhavhuya. ₁₇Kha ri livhuhe Mudzimu ngauri naho kale no vha ni phuli dza vhutshinyi, no ri u dzhena kha pfunzo ya Tshikhriste na i ṱanganedza nga mbilu yoṱhe. ₁₈Zwino no vhofhololwa vhutshinyini, no ḓikumedza vhuvhuya. ₁₉Vhunga ni vhathu vha ṋama, litshani ndi ni fanyisedzele nga zwa vhathu, ndi ri: no vha no kumedza miraḓo yaṋu vhuaḓa na vhuvhi; i kumedzeni-ha kha vhuvhuya sa zwenezwo uri ni tshilele Mudzimu.

₂₀Zwiḽa ni tshee phuli dza vhutshinyi vhuvhuya ho vha vhu sa ni langi. ₂₁No wanani ngazwo? A si zwine zwino na vho shona ni tshi zwi humbula? Zwi guma nga u ḓisa lufu. ₂₂Zwino-ha vhunga no vhofhololwa kha vhutshinyi, nó no vha phuli dza Mudzimu, ni wana vhukhethwa, na guma nga u wana vhutshilo vhu sa gumi. ₂₃Malamba a vhutshinyi ndi lufu, tshifhiwa tshine Mudzimu a ri ṋea ndi vhutshilo vhu sa fheli nga Khristo Yesu Muṋe washu.