VHAROMA 13

₁Vhathu vhoṱhe nga vha luvhe vhavhusi vhavho; a hu na maanḓa a u vhusa a sa bvi kha Mudzimu. Hune vhavhusi vha vha hone vho vhewa nga Mudzimu. ₂Khezwo, a lwaho na muvhuso u lwa na zwe zwa vhewa nga Mudzimu; u lwa nawo ndi u ḓiovhela mulandu. ₃Muitazwivhuya u vhona vhavhusi vha sa ofhisi, vha ofhisa a tshinyaho. A funaho u dzula a sa ofhi muvhusi a ite zwivhuya, ndi hone muvhusi a tshi ḓo mu takalela. ₄Muvhusi ndi muḓinḓa wa Mudzimu wa u tonda iwe. Hone arali wa tshinya u ofhe; ho ngo fara pfumo lwa fhedzi; ndi muḓinḓa wa Mudzimu wa u lifhedza a tshinyaho. ₅Ndi zwine ha pfi tshashu ndi u luvha vhavhusi, hu si nga u ofha ṱhamu fhedzi, ri tou itiswa nga luvalo. ₆Ndi zwine na thela: vhavhusi ndi vhaḓinḓa vha Mudzimu, vha ḓinetisela mushumo wawe. ₇Zwino-ha vhoṱhe ni vha ṋee zwo vha fanelaho; vhathelisi ni vha fhe muthelo; vhane vha ḓela kosekose ni vha fhe yone; vho fanelaho u ofhiwa ni vha ofhe; vho fanelaho u huliswa ni vha hulise.

₈Ni songo ḽa mulandu wa muthu; mulandu waṋu nga u vhe u funana fhedzi. A funaho vhaṅwe o khunyeledza Mulayo wa Mudzimu. ₉Hu tshi pfi, “U songo ita vhupombwe,” “U songo vhulaha,” “U songo tswa,” “U songo emula,” na musi u ufhio mulayo, wo katelwa henefha kha ḽa uri, “Funa muṅwe unga iwe muṋe.” ₁₀A re na lufuno ha khakheli muṅwe; ndi zwine ha pfi lufuno ndi u khunyeledza Mulayo.

₁₁Hezwo ni zwi ite ni tshi ḓivha uri tshifhinga ndi tshone tsha u karuwa, ngauri u tshidzwa hashu hu ḓo ṱuwa hu tshi khunyelela, a zwi tsha nga zwiḽa ri kha ḓi bva u vha vhatendi. ₁₂Ho no vha maḓautsha, mapfuvhi a ḓo ṱuwa a tshi tswuka. Nga ri litshe-ha mishumo ya swiswi, ri dzhie mafumo a tshedza. ₁₃Ri tshile ro ḓifara sa vha tshimbilaho masiari, ri songo tshila nga u ḽela vhuḓabaḓaba na u kambiwa, na nga vhupombwe na vhuaḓa, na nga khani na vivho. ₁₄Ambarani Muṋe washu Yesu Khristo, ni songo londa zwa tsiko yaṋu mmbi ya kale na ita zwine ya emula zwone.