DZIPHISALEMA 79

₁Mudzimu,

vhannḓa vho tshoṱhela shangoni ḽau,

thembele yau khethwa vho i kumadza,

vho phusukanya Jerusalema a sala e matumba.

₂Zwitumbu zwa vhalanda vhau

vho zwi ṋea maanga uri a ḽe,

ṋama ya vhathu vhau vha fulufhedzeaho

vho i ṋea phukha dza ḓaka;

₃vho shulula malofha avho unga maḓi,

Jerusalema wa ḓala malofha;

a hu na na ane a swiṱa vhafu.

₄Vhahura vhashu vha a ri holedza,

vhe ra ṋekana navho masakha vha a ri sea vha ri goḓa.

₅Muṋe washu,

u ḓo ri sinyutshela u swika lini?

Mbiti dzau dzi ḓo duga lini na lini naa?

₆Mbiti dzau dzi shululele vhannḓa vha sa u luvhi,

na mivhuso i sa u rabeli;

₇hufha vho mila Jakopo,

vha phusukanya shango ḽa hawe.

₈U songo ri lifhedzela vhuvhi ha vhokhotsi ashu,

ṱavhanya u ri khathutshela,

mbilu dzashu dzo ṋoka.

₉Mudzimu Mutshidzi washu,

ri farise,

u tshi itela vhuhulu ha dzina ḽau;

ri vhofholole,

u ri hangwele vhukhakhi hashu,

u tshi itela dzina ḽau.

₁₀U tendelani vhannḓa vha tshi ri,

“Mudzimu wavho u ngafhi?”

Vha sumbedze ri tshi zwi vhona uri u lifhedzela hani malofha

a vhalanda vhau o shululwaho.

₁₁Ngavhe zwigomelo zwa mathubwa zwi tshi swika ha Iwe;

nga maanḓa au mahulu,

lamukisa vho haṱulelwaho lufu.

₁₂Muṋe wa zwoṱhe,

maṱamba e vhahura vhashu vha a posa ha Iwe,

vha lifhedze kaṱanu na kavhili.

₁₃Ndi hone riṋe vhathu vhau,

dzone nngu dzine wa dzi lisa,

ri tshi ḓo u renda lini na lini,

ra u renda nga nyimbo

zwi tshi ya nga mirafho na mirafho.