DZIPHISALEMA 109

₁Mudzimu, ndi ḓi u renda,

u songa fhumula.

₂Vhavhi vha vhufhura vha khou mpomoka,

a vha nnyambi zwavhuḓi,

vha a nnzwifhelela;

₃vha ntanga nga maipfi a vengo,

vha lwa na nṋe ndi si na tshe nda tshinya.

₄Vha lifhedza vhukonani hanga nga vhuswina,

nṋe ngeno ndi tshi vha rabelela;

₅vha lifhedza zwivhuya zwanga nga zwivhi,

lufuno vha lu lifhedza nga vengo.

Vha ri,

₆“Mu livhanye na muhaṱuli muvhi,

mupomoki a mu ise tsengoni!

₇A tshi sengiswa nga a vhonwe mulandu,

na thabelo yawe nga i pfi ndi vhukhakhi.

₈Ngavhe maḓuvha awe a tshi vha mapfufhi,

mushumo wawe wa dzhiwa nga muṅwe.

₉Vhana vhawe ngavhe vha tshi vha tsiwana,

musadzi a vha tshilikadzi,

₁₀vhana vhawe vha tendeleka naḽo vha singila,

vha thathwa matumbani hune vha dzula hone,

₁₁ane a mu adzima thundu a mu kumbulula,

vhatsinda vha thukhutha mitshelo ya biko ḽawe,

₁₂hu si vhe na ane a mu itela vhuthu,

kana a khathutshela tsiwana dzawe.

₁₃Ngavhe vhana vhawe vha tshi fa vha fhela,

dzina ḽavho ḽa si tsha vhidzwa kha mirafho i ḓaho.

₁₄Ngavhe Muṋe washu a sa hangwi milandu ya vhokhotsi awe,

na vhutshinyi ha mme awe ha si thuthwe,

₁₅Muṋe washu a si vhuye a zwi hangwa,

a ite uri vha si tsha mu elelwa fhano shangoni.

₁₆Ho ngo vhuya a itela vhaṅwe vhuthu,

tshawe ho vha hu u tovhola vhaheḓana

na vhashai na vho kuleaho nungo vha vhuya vha fa.

₁₇O funesa u teketela vhaṅwe,

khombo nga i mu wele-vho;

ho ngo takalela vhaṅwe vha tshi wana mashudu,

na ene a songo a wana.

₁₈O ambara maṱamba unga nguvho,

eneo ngavhe a tshi nwelela malani awe,

a nwelela maramboni awe unga mapfura;

₁₉ngavhe a tshi nga nguvho ye a ambara,

a nga muzwa une a ḓivhofha misi yoṱhe.”

₂₀Vha mpomokaho na vhane vha nnyisela phungo,

ngavhe Muṋe washu a tshi vha lifhedza nga zwenezwo!

₂₁Hone Iwe Muṋe washu, Muṋe wa zwoṱhe,

ntonde u tshi itela dzina ḽau.

Hufha u na vhuthu,

lufuno lwau lu sa dzinginyei, ntshidze!

₂₂Thi na wanga, ndi mushai,

mbilu yanga i na matsivha.

₂₃Ndi nyamalala unga murunzi nga madekwana,

nda fhufhurwa unga nzie.

₂₄Khokhola dzanga dzi a lepalepa

nga u ḓidzima zwiḽiwa,

ndo ita na u fhelela.

₂₅Ndi tou vha tshikonelo tshavho;

vha tshi mmbona vha dzungudza ṱhoho.

₂₆Wa mpfarisaa,

Mudzimu Muṋe washu!

Ntshidze,

hufha lufuno lwau lu sa dzinginyei.

₂₇Vha sumbedze uri zwo itwa nga Iwe,

ndi Iwe Muṋe washu wo zwi itaho.

₂₈Vha litshe vha teketele,

tenda Iwe u tshi ntshudufhadza.

Vha tshi mmvutshela vha shonise,

nṋe mulanda wau ndi takale.

₂₉Ngavhe vhapomoki vhanga vha tshi nyadzea,

vha dzula vho ambara ṱhoni unga tshiambaro.

₃₀Ndi ḓo livhuha Muṋe washu zwinzhi,

nda mu renda ho kuvhanganiwa.

₃₁Ú tika mushai,

a mu tshidza zwanḓani zwa vha mu haṱulelaho lufu.