DZIPHISALEMA 103

₁Kha ndi rende Muṋe washu

nga mbilu yanga yoṱhe,

ndi khoḓe dzina ḽawe ḽikhethwa

nga zwoṱhe zwine nda vha zwone.

₂Kha ndi rende Muṋe washu nga mbilu yanga yoṱhe,

ndi si hangwe zwivhuya zwoṱhe zwe a nnyitela.

₃U nkhangwela milandu yanga yoṱhe,

a fhodza maṱungu anga oṱhe.

₄U ntshidza ndó ingamela tshalo;

lufuno lwawe lu sa dzinginyei,

na tshilidzi,

ndi tshone tshiala tshanga.

₅U mpfusha nga zwivhuya,

nda pfa ndo humela hanani,

ndi na nungo dzi no nga dza goni ḽi tshi fhufha.

₆Muṋe washu u lwela vhoṱhe vha kandeledzwaho,

vha tshi hwelelwa a vha sengela.

₇O ḓivhadza Mushe zwe a vha o dzudzanya,

a sumbedza Vhaisraele mishumo yawe.

₈Muṋe washu u na khathutshelo na tshilidzi,

ha fheli mbilu,

lufuno lwawe ndi luhulu,

a lu dzinginyei;

₉ha dzuli a tshi sengisa vhathu,

ha sinyuwi tshoṱhe;

₁₀ri tshi khakha ha ri rwi nga ṱhamu yo eḓanaho vhutshinyi hashu,

ha vhili milandu yashu.

₁₁Vhane vha mu ofha u vha funa nga lufuno luhulu,

lwo hula unga lutombo lu nṱha-nṱha ha shango.

₁₂Vhutshinyi hashu u vhu sudzulusela kule na riṋe,

zwa nga vhubvaḓuvha vhu kule na vhukovhela.

₁₃Muṋe washu u khathutshela vhane vha mu ofha,

unga khotsi a tshi khathutshela vhana.

₁₄U ḓivha tsiko yashu,

ha hangwi uri ri buse.

₁₅A vha muthu,

vhutshilo hawe vhu nga hatsi;

u aluwa unga dzuvha tsimuni,

₁₆muya wa ḽi vhudzula ḽi a fa,

he ḽa vha ḽi hone ha hangwiwa.

₁₇Vhane vha ofha Muṋe washu u vha funa

nga lufuno lu sa dzinginyei lini na lini,

a lwela na vhana vha vhana vhavho;

₁₈ndi vhane vha si pfuke mulanga wawe,

vha ita zwine milayo yawe ya vha laya.

₁₉Muṋe washu o imisa khuluṋoni yawe ḽiṱaḓulu,

muvhuso wawe u vhusa vhoṱhe.

₂₀Rendani Muṋe washu,

inwi vharuṅwa vhawe,

inwi vhahali vha maanḓa ni itaho zwine a amba,

inwi ni mu thetshelesaho!

₂₁Rendani Muṋe washu,

inwi mara awe oṱhe a ḽiṱaḓulu,

inwi vhaḓinḓa vhawe vha itaho zwine a funa!

₂₂Rendani Muṋe washu,

inwi zwisikwa zwawe zwoṱhe,

hoṱhe-hoṱhe hune a vhusa.

Na nṋe kha ndi rende Muṋe washu nga mbilu yanga yoṱhe!