MIRERO 27

₁U songo zuwa zwa matshelo,

hufha u sa ḓivhi

zwine ḓuvha ḽa ḓo ḓa nazwo.

₂U songo ḓikhoḓa nga wau mulomo,

litsha vhaṅwe vha u khoḓe.

₃Tombo ḽi a lemela;

muṱavha ndi muhwalo;

u konḓelela tsilu zwi lemela u fhira na hezwo.

₄Mbiti dzi na tshiṱuhu;

u sinyuwa ndi muḓalo wa maḓi,

u a kumba;

vivho ḽone ḽi nga konḓelelwa nga nnyi?

₅Ndi khwiṋe u kaidza muthu a tshi zwi pfa,

u fhira u dzumba,

wa fhumula nge wa mu funa.

₆Khonani i tshi u pfula mbonzhe i a u funa;

swina ḽi tshi u kuvhatedza u vhone.

₇A no lamba mutoli ndi o furaho;

a na nḓala, na tshinyai u a ḽa.

₈Munna ó shavha muḓi

u nga tshiṋoni tsho shavha tshiṱaha.

₉Zwiḓolo zwi nukhelelaho u ḓifha, na zwioro, zwi takadza mbilu;

vhukonani hone vhu takadza nga u eletshedzana.

₁₀U songo ṱamba khonani yau na ya khotsi au;

wa welwa nga khombo

u songo yo lilela ṅwana wa mme au;

mutsinda a re tsini a nga u farisa u fhira ṅwana wa mme au a re kule.

₁₁Ṅwananga, ivha na vhuṱali u takadze mbilu yanga,

ndi hone ndi tshi ḓo kona u fhindula muṅwe na muṅwe ane a nnyadza.

₁₂Wa maano u ri u vhona khombo a dzumbama;

a shayaho nzhele ha humi, u lifha nga ṱhoho yawe.

₁₃Mutsinda ane a ḓivhofha u lifha mulandu une muṅwe a nga ita,

nga a dzhielwe nguvho, ha ḓivhiwi.

₁₄Ane a resha muṅwe nga u ṱavha mukosi maḓautsha,

u ḓo pfi u khou mu teketela.

₁₅Musadzi wa luambo

u nga ṱhanga i no sokou tho, tho, tho, musi wa mvula;

₁₆u tshi mu kaidza uri a fhumule

zwi nga u thivha muya,

zwi nga u puta ole nga tshanḓa.

₁₇Tsimbi dzi a ṱuṱulana;

vhathu vha a fhaṱana.

₁₈Ane a londola muhuyu u ḓo fula mahuyu awo;

a no londola muṋe wawe u ḓo huliswa.

₁₉Ri ḓivhona tshifhaṱuwo sambeloni ḽa maḓi;

tshivhoni tsha muthu tshone ndi mihumbulo yawe.

₂₀Lufu na ndozwo a zwi furi;

na maṱo a muthu o ralo, ha furi.

₂₁Siliva i bviswa manyelo nga khali ya tsimbi,

tsha musuku ndi ṋanḓo;

muthu ene u ḓihwa nga phungo kana bvumo.

₂₂Tsilu nangwe wa tou ḽi sinḓa mutulini,

wa ḽi kuya guyoni,

vhutsilu haḽo a vhu swotowi.

₂₃Sedza mutakalo wa nngu dzau,

londola kholomo dzau;

₂₄hafhu lupfumo a lu yi thambo;

na vhuhosi a vhu ratheli kha mirafho yoṱhe.

₂₅Musi hatsi ha zwifuwo ho hwivhiwa,

hó no mela vhuswá,

na hatsi ha mivhunduni ho no kuvhanganywa,

₂₆ndi hone ngwana dzi tshi ḓo u ṋea

vhukuse ha u luka nguvho,

wa rengisa mbudzi wa renga tsimu.

₂₇U ḓo hama mafhi a mbudzi a si na vhukono,

wa ḽa wa fura na muṱa wau,

phuli dzau dza vhasidzana wa dzi lela ngao.