MIRERO 22

₁Dzina ḽavhuḓi

ḽi fhira lupfumo luhulu;

u takalelwa hu fhira siliva na musuku.

₂Muṋe washu u vhona mupfumi na mushai vha tshi fana;

ndi Muvhumbi wavho vhoṱhe.

₃Wa maano u ri u vhona khombo a dzumbama;

mushaanzhele ha humi, u lifha nga ṱhoho yawe.

₄A no ḓiṱukufhadza na u ofha Muṋe washu,

u pfufhiwa nga lupfumo, na khuliso, na vhutshilo.

₅Nḓila ya a sa ḓivhalei yo ḓala mipfa na zwikwekwe;

ane a ḓilondola u ḓo vha kule nayo.

₆Funza ṅwana kutshilele a tshee nga hawe;

na musi o no kalaha u ḓo ḓi zwi nambatela.

₇Mupfumi u vhusa mushai;

mupambi ndi phuli ya muadzimisi.

₈Wa zwala mbeu ya u kandeledza vhaṅwe,

u ḓo kaṋa khombo;

ṱhamu yau i ḓo vunḓea.

₉Mapakulile u ḓo vha na mashudu,

hufha a tshi kovhekana zwiḽiwa na vhashai.

₁₀Wa thatha munyefuli, khakhathi i ḓo fhela;

hu ḓo fhela mufhirifhiri na lunyadzo.

₁₁A sa funi zwa vhufhura, wa nyambo ya vhulenda,

u ḓo konana na khosi.

₁₂Muṋe washu u londola nḓivho ya ngoho,

a piringanya nyambo ya a sa fulufhedzei.

₁₃Mubva u ri,

“Afho nnḓa hu na ndau;

nda bva ndi a pondwa!”

₁₄Mulomo wa musadzi a si wau ndi khunḓa,

i fasha we a teketelwa nga Muṋe washu.

₁₅Mbilu ya ṅwana yo ḓala vhutsilu;

ṱhamu i a mu laṱisa.

₁₆Ane a andisa lupfumo nga u kandeledza vhashai,

a ṋea vhapfumi zwifhiwa, u ḓo shaya.

₁₇Thetshelesa u pfe maipfi a vhaṱali,

pfunzo yanga i dzhene mbiluni yau.

₁₈Zwi a ḓifha arali wa zwi vhulunga mbiluni yau,

wa kona u zwi bula nga tshifhinga tsho teaho.

₁₉Ndi ṱoḓa u ri u fulufhele Muṋe washu,

ndi zwine nda funza iwe ṋamusi.

₂₀A thi ri ndo u ṅwalela mirero ya mahumi mararu,

mirero ya nyeletshedzo na nḓivho.

₂₁Ndo vha ndi sa khou u funza maipfi a ngoho a fulufhedzeaho?

Ndo vha ndi sa khou itela uri u kone u vhuya

na phindulo yavhuḓi u tshi rumiwa?

₂₂U songo fhura mushai

nga u vhona e mushai;

u songo vhaisa muheḓana tsengoni;

₂₃Muṋe washu u ḓo vha sengela,

a zhaka vha no vha zhaka.

₂₄U songo konana na mudziambiti,

u songo ḓowelana na muthu wa mbilwana,

₂₅u sa ḓo guda maitele awe,

wa vho fashiwa wa fa.

₂₆U songo ḓivhofha

u lifhela muṅwe mulandu

une a nga u ita,

₂₇u sa ḓo ri wo kundwa u lifha wa dzhielwa mmbete u tshee wo lala nṱha hawo.

₂₈U songo sudzulusa mikano ya kale

yo vhewaho nga vhomakhulukuku wau.

₂₉U a mu vhona muthu a shumaho nga vhutsila?

Onoyo u ḓo vhuya a shumela mahosi,

ha nga shumeli vhalanda.