MIRERO 12

₁A funaho u laiwa u funa nḓivho;

a sa funi u kaidzwa ndi maphuu.

₂Muthu muvhuya u takadza Muṋe washu;

mudzia-vhukwila ene u ḓo laṱwa.

₃Vhuvhi a vhu khwaṱhisi muthu;

vhavhuya vha nga si tupulwe.

₄Musadzi wavhuḓi ndi tshiala tsha munna wawe;

a no ita zwi shonisaho ndi ṱhahala.

₅A thetshelesaho Mudzimu u ṱoḓa zwi sa solisei;

maano a muvhi ndi a vhufhura.

₆Zwiambo zwa muvhi ndi zwa u lalela vhathu na u fhaladza malofha;

maipfi a a si na vhufhura one ndi a u tshidza vhathu.

₇Vhavhi vha ḓo tekulwa vha si tsha vha hone;

nnḓu ya a thetshelesaho Mudzimu i ḓo sala yo ima.

₈Muthu u khoḓelwa ṱhalukanyo yawe;

o thanyelaho dubo u a nyadziwa.

₉Ndi khwiṋe u pfi mushai u na phuli,

u fhira u ḓiita muḓivhalea u si na tshine wa ḽa.

₁₀A no thetshelesa Mudzimu u londola tshifuwo tshawe;

muvhi ene u na tshiṱuhu.

₁₁A limaho tsimu yawe u ḓo ḽa a laṱa;

a no tevhela zwi sa ḓivhalei ene ha na ṱhalukanyo.

₁₂Muvhi u tama zwo wanalaho nga vhuvemu,

hone mitshelo i fulwa nga a thetshelesaho Mudzimu.

₁₃Muvhi u fashwa nga nyambo yawe mmbi;

a thetshelesaho Mudzimu ene u tinya khombo.

₁₄Muthu u ḽa zwivhuya zwe a wana nga u amba;

u pfufhiwa nga zwe a zwi shumela.

₁₅Tsilu ḽi vhona nḓila ye ḽa i fara i yone-yone;

muṱali u thetshelesa nyeletshedzo.

₁₆Zwine zwa dina tsilu a zwi lengi u vhonala;

wa vhuṱali u kanda mupfa a tshi u vhona.

₁₇Ṱhanzi ya ngoho i tikedza khaṱhulo mbuya,

ya mazwifhi yone i ṱuṱuwedza vhufhura.

₁₈Maipfi a veveru a runga unga pfumo;

lulimi lwa muṱali lu a fhodza.

₁₉Ngoho i ḓo ima lini na lini;

mazwifhi ha yi thambo.

₂₀Vhufhura ho fhaṱela mbiluni dza vha no luka vhunwa;

vha nyeletshedzo dzi ḓisaho mulalo vha dzula vho takala.

₂₁A no thetshelesa Mudzimu ha na mafhanza;

vhavhi vha dzula vhe khomboni.

₂₂Muṋe washu u nyala mulomo wa mazwifhi;

u takalela vha no fulufhedzea.

₂₃Muthu wa maano u dzumba nḓivho yawe;

tsilu ḽi anḓadza vhutsilu haḽo.

₂₄Mushumi wa biko u ḓo vhusa;

vhubva vhu guma nga vhupuli.

₂₅U ḽa mbilu lu lemedza muthu;

ipfi ḽavhuḓi ḽi a mu khuthadza.

₂₆A thetshelesaho Mudzimu a tshi konana na muthu u ranga u sedza,

hone nḓila ya vhavhi i a vha xedza.

₂₇Mubva u shaya na phukha ya u gotsha;

mushumi wa biko u wana lupfumopfumo.

₂₈U thetshelesa Mudzimu ndi yone nḓila i isaho vhutshiloni;

nḓila yeneyo a i na lufu.