MARKOSI 2

₁Ho no fhela maḓuvha a si gathi Yesu a vhuelela Kapernaumi, zwa mbo ḓi pfala uri u hayani. ₂Huno ha kuvhangana vhathu vhanzhi, na muṱani hu si vhe na vhupfelo ha mare. Yesu o vha a tshi vha ḓivhadza mafhungo maḓifha. ₃Zwenezwo ha ḓa vhathu vha tshi ḓisa munna o omaho miraḓo, o hwalwa nga vhanna vhaṋa. ₄Vhenevho vha kundwa nḓila ya u mu fhirisela ha Yesu, nga u ḓala ha vhathu. Ndi hone vha tshi phula ṱhanga u livhana na he Yesu a vha e hone. Nga buli ḽeneḽo vha tsisa uyo munna e kha hingo. ₅Yesu a tshi vhona fulufhelo ḽavho, a amba na o omaho miraḓo, a ri, “Ṅwananga, no hangwelwa vhutshinyi haṋu.”

₆Vhaḓivhi vha Mulayo vhe vha vha vho dzula henefho vha elekanya vha ri, ₇“Nṋa uyu muthu u itelani a tshi tamba nga dzina ḽa Mudzimu? Ndi nnyi ane a kona u hangwela muthu vhutshinyi arali e si Mudzimu fhedzi?”

₈Yesu a mbo ḓi ḓivha zwine vha elekanya, a ri, “Ni elekanyelani zwo raloho? ₉Tshi sa konḓi kha izwi zwivhili ndi tshifhio? Ndi u vhudza uyu muthu o omaho miraḓo uri, ‘No hangwelwa vhutshinyi haṋu,’ kana ndi u ri, ‘Takuwani ni hwale hingo ḽaṋu ni tshimbile’?” _10-11Ndi hone Yesu a tshi amba na munna o omaho miraḓo a ri, “Takuwani ni hwale hingo ḽaṋu ni ye hayani,” u ralo ha vha u sumbedza uri Mubebwa-nga-muthu u na maanḓa fhano fhasi a u hangwela muthu vhutshinyi. ₁₂Uyo munna a peta hingo ḽawe maṱoni avho, a ḽi dzhia a ḓitshimbilela. Vhoṱhe vha akhamala zwihulu, vha khoḓa Mudzimu vha ri, “Ha, zwa u rali a ri athu vhuya ra zwi vhona!”

₁₃Yesu a dovha a ya khunzikhunzini ya Dzivha ḽa Galelia. Gogo ḽoṱhe ḽa ḓa khae, a ḽi funza. ₁₄Musi a tshi khou fhira a vhona muṅwe munna we a vha a tshi pfi Livi, ṅwana wa Alifiosi, e ofisini yawe ya muthelo. Ndi hone Yesu a tshi amba nae a ri, “Kha ri ṱuwe roṱhe ni vhe mufunziwa wanga.” Livi a mbo ḓi taku, a mu tevhela.

₁₅Musi Yesu e muḓini wa Livi, Ene na vhafunziwa vhawe vho ḽa na vhathelisi vhanzhi na vhatshinyi, ngauri iṱali vha no mu tevhela vho vha vho no ḓi vha vhanzhi. ₁₆Vhaṅwe vhaḓivhi vha Maṅwalo vhe vha vha vhe Vhafarisei vha ri u vhona Yesu a tshi khou ḽa na vhatshinyi na vhathelisi, vha vhudzisa vhafunziwa vhawe vha ri, “Nṋa u ita zwithu-ḓe a tshi ḽa na vhathu vho tou raliho?” ₁₇Yesu a tshi vha pfa a ri, “A sa lwali ha lili ṅanga; ṅanga i lilwa nga mulwadze. Nṋe a tho ngo ḓela vhavhuya, ndo ḓela vhone vhatshinyi.”

₁₈Muṅwe musi vhafunziwa vha Johanisi Mulovhedzi na Vhafarisei vho vha vha tshi khou ḓidzima; zwino vhaṅwe vhathu vha ḓa vha vhudzisa Yesu vha ri, “Khezwi vhafunziwa vhavho vha sa ḓidzimi, ngeno vha Johanisi Mulovhedzi na vha Vhafarisei vha tshi ḓidzima?” ₁₉Yesu a fhindula a ri, “Nṋa zwi a itea uri khonani dza mukwasha dzi ḓidzime zwiḽiwa mukwasha a tshee nadzo naa? A zwi itei. ₂₀Hone hu ḓo ḓa maḓuvha ane vha ḓo dzhielwa mukwasha wavho, ndi hone vha tshi ḓo ḓidzima.

₂₁“A hu na muthu ane a haswa tshiambaro tsha kale nga sila ḽiswa ḽi sa athu huma, ngauri musi tshi tshi kuvhiwa, tshihaswa tshi vho ḓo mamula na tshiambaro, buli ḽa endelela. ₂₂Nahone tuvhu ḽa waini a ḽi sheliwi mikhwamani ya mukumba wa kale, nga u ofha uri i nga balea musi ḽi tshi vhila, waini ya shuluwa, na mikhwama ya tshinyala. Tuvhu ḽi shelwa mikhwamani miswa!”

₂₃Ḽiṅwe ḓuvha nga Sabatha Yesu o vha a tshi khou buḓekanya nga vhukati ha masimu a goroi. Vhafunziwa vhawe vha ḓi tshimbila nae, vha thoma u ṱhukhula-ṱhukhula ṱhotshe dza goroi. ₂₄Ndi hone Vhafarisei vha tshi amba na Yesu vha ri, “Kha vha vhone zwine vhafunziwa vhavho vha khou ita nga Sabatha; Mulayo a u tendi!” ₂₅Yesu a vha fhindula a ri, “Kani fhaḽa hu no amba a musi Abiathara e tshifhe muhulu a no ngo vhuya na hu vhala? Ndi amba a musi Dafita na khonani dzawe vhe na nḓala, ₂₆vha tshi dzhena nḓuni ya Mudzimu vha ḽa vhurotho he ha vha ho sumelwa Mudzimu, Mulayo u sa tendi muthu a tshi ḽa musumo hoyo, arali vhe si vhotshifhe fhedzi – huno-ha Dafita o ri u ḽa hoho vhurotho, a ita na u ṋea khonani dzawe!” ₂₇Yesu a fhedza mafhungo nga u ri, “Sabatha yo itelwa muthu, a si muthu o itelwaho Sabatha. ₂₈Ngauralo Mubebwa-nga-muthu, na yone Sabatha ndi Ene Muṋe wayo.”