MATIOSI 27

₁Nga matshelonitsheloni vhotshifhe vhahulwane vhoṱhe na vhahulwane vha lushaka vha vha na khoro vha luka vhukwila ha u vhulahisa Yesu. ₂Vha vhofha Yesu nga dzigeḓane vha ṱuwa nae vha mu kumedza muvhusi Pilato.

₃Judasi, uḽa o mu fheṱaho, a tshi pfa uri Yesu o haṱulwa, a ḓisola, a vhuedzedza aḽa maseṱha a 30 ha vhotshifhe vhahulwane na vhahulwane vha lushaka, ₄a ri, “Ndo tshinya nga u fheṱa muthu a si na mulandu.” Vha fhindula vha ri, “Ayo a si mafhungo ashu, ndi aṋu.” ₅A mbo laṱa iḽa tshelede henefho nḓuni ya Mudzimu a ṱuwa, a ya a ḓinembeledza.

₆Vhotshifhe vhahulwane vha dobela iḽa tshelede vha ri, “Iyi tshelede a ro ngo tendelwa u i longa bogisini ḽa mitendelo ngauri yo renga malofha.” ₇Vha funzedzana vha langana uri vha ḓo renga ngayo tsimu ya muvhumbi wa dzikhali, uri hu vhe hone hune ha ḓo swiṱwa vhatsinda. ₈Ndi zwine na ṋamusi tsimu iyo ya kha ḓi pfi “Yamalofha”. ₉Ha mbo vha u khunyeledza zwo ambiwaho nga muporofita Jeremia a tshi ri, “Vho dzhia maseṱha a 30, wone mutengo we Vhaisraele vha langana uri vha ḓo mu renga ngawo, ₁₀vha renga ngao tsimu ya muvhumbi wa dzikhali. Ndi zwone zwe Muṋe washu a nndaedza.”

₁₁Yesu a imiswa phanḓa ha muvhusi, uyo a mu vhudzisa a ri, “Nṋa inwi ni khosi ya Majuda?” Yesu a mu fhindula a ri, “Vha khou amba ḽavho naa?” ₁₂Vhotshifhe vhahulwane na vhahulwane vha lushaka vha mu pomoka zwithu zwinzhi, hone a si fhindule tshithu. ₁₃Pilato a mu vhudzisa a ri, “Nṋa a ni pfi uri vha khou ni pomoka zwithu zwingafhani?” ₁₄Yesu a si tsha mu fhindula na ipfi na ḽithihi; muvhusi a wana zwi tshi mu kanukisa.

₁₅Zwino nga Paseka iṅwe na iṅwe muvhusi o vha a tshi ḓi vhofhololela vhathu tshivhotshwa tshe vha vha vha tshi tshi humbela. ₁₆Nga honoho vhuṱambo ho vha hu na tshiṅwe tshivhotshwa tshe tsha vha tshi tshi ḓivhea hoṱhe-hoṱhe ḽi ḽivemu, tshi no pfi Yesu Barabasi. ₁₇Pilato a tshi vhona vho kuvhangana a vha vhudzisa a ri, “Ni funa ndi tshi ni vhofhololela nnyi? Yesu a no pfi Barabasi kana Yesu a no pfi Mesia?” ₁₈A tshi ralo ndi uri o vha a tshi zwi ḓivha uri vha tshi mu kumedza Yesu vho vha vha tshi itwa nga vivho.

₁₉Zwino Pilato a tshee o dzula tshidzuloni tsha khaṱhulo mufumakadzi wawe a mu laedzela a ri, “Hoyu ha na tshe a khakha, vha songo mu ita tshithu. Ndo mu lora madekwe nda tambula zwinzhi.”

₂₀Hone vhotshifhe vhahulwane na vhahulwane vha lushaka vho vha vho no rumeledza vhathu uri vha humbele Barabasi, Yesu a vhulawe. ₂₁Zwino muvhusi a tshi dovha u vha vhudzisa a ri, “Kha avha vhavhili ni funa ndi tshi ni vhofhololela ufhio?” Vhone vha fhindula vha ri, “Barabasi!” ₂₂Pilato a vha vhudzisa a ri, “Uyu Yesu a no pfi Mesia ndi iteni ngae?” Vha amba mazha vha ri, “Nga' vhambiwe kha tshifhambano!” ₂₃Pilato a vhudzisa a ri, “O tshinyani?” A tshi ralo vhone vha tou ṋaṋa u zhamba vha ri, “Nga' vhambiwe kha tshifhambano!”

₂₄Pilato a tshi vhona uri a zwi tsha farisa tshithu, zwi tou vusa mufhirifhiri, a dzhia maḓi a ṱamba zwanḓa mavhuthu a tshi zwi vhona a ri, “A thi na mulandu kha malofha a uyu munna; ni ḓo ḓifhindulela inwi vhaṋe.” ₂₅Vhathu vhoṱhe vha fhindula vha ri, “Mulandu wa malofha awe nga u vhe washu na vhana vhashu!”

₂₆Ndi hone a tshi vha vhofhololela Barabasi, a ita uri Yesu a rwiwe, a konou mu kumedza uri a vhambiwe kha tshifhambano.

₂₇Maswole a muvhusi a dzhia Yesu a dzhena nae nḓuni ya khaṱhulo, a tou tangwa nga gomane yoṱhe. ₂₈Vha mu bvula zwiambaro vha mu ambadza phuraphura. ₂₉Vha luka na khare ya mipfa vha mu ambadza kha ṱhoho, vha mu farisa luṱanga nga tshanḓa tshauḽa, vha mu gwadamela vha mu losha muhoyo vha ri, “Khosi ya Majuda nga i lalame!” ₃₀Vha mu pfela mare, vha dovha vha dzhia luḽa luṱanga vha mu rwa kha ṱhoho. ₃₁Musi vho no fhedza u mu kolela nga u ralo vha mu bvula phuraphura vha mu ambadza nguvho dzawe, vha konou bva nae vha yo mu vhamba kha tshifhambano.

₃₂Vha tshi khou bva vha ṱangana na munna a no bva Kirene a no pfi Simoni, vha mu kombetshedza u hwala tshifhambano tsha Yesu.

₃₃Vha tshi swika fhethu hu no pfi Golgotha (zwine zwa amba uri “Fhethu hu no nga dethele ḽa muthu”), ₃₄vha mu ṋea mushonga wa u dzidzivhadza wa waini yo ṱanganaho na ndulu, hone a tshi i thetshela a hana u nwa. ₃₅Ndi hone vha tshi mu vhamba kha tshifhambano, vha konou kovhekana nguvho dzawe nga u tou ita mamvaṱe. ₃₆Vha dzula fhasi henefho vha mu linda.

₃₇Vho vha vho ombela na luṅwalo lwa mulandu wawe nga nṱha ha ṱhoho yawe. Lwo vha lu tshi ri, “Hoyu ndi Yesu khosi ya Majuda.”

₃₈Vha mu vhamba na mavemu mavhili, ḽiṅwe ḽi thungo ya tshauḽa, ḽiṅwe tshamonde. ₃₉Vhafhiri vha gondo vha tshi mu vhona vha dzungudza dziṱhoho vha mu holedza ₄₀vha ri, “A si iwe we wa ri u nga thutha nnḓu ya Mudzimu wa dovha wa i fhaṱa nga maḓuvha mararu. Itsa-ha afho kha tshifhambano u ḓitshidze arali u Murwa wa Mudzimu!” ₄₁Na vhotshifhe vhahulwane na vhaḓivhi vha Mulayo na vhahulwane vha lushaka vha mu kolela vha ri, ₄₂“O vha a tshi kona u tshidza vhaṅwe, zwino u ḓitshidza zwi vho mu kunda! Hufha e khosi ya Vhaisraele, nga a tse-ha kha tshifhambano zwino, ri tende uri ndi ene. ₄₃O ḓitika nga Mudzimu; Mudzimu nga a mu lamulele zwino arali a tshi mu funa. Hufha o amba a ri, ‘Ndi Murwa wa Mudzimu!’ ” ₄₄Vhaḽa vhe vha vha vho vhambiwa nae na vhone vha ḓi mu holedza nga u ralo.

₄₅Masiari tshivhangalala shango ḽoṱhe ḽa mbo ḓi tibwa nga swiswi ha fhela awara tharu zwo ḓi ralo. ₄₆Nga tshifhinga tsha vhuraru Yesu a ṱavha mukosi a ri, “Eli, Eli, lama sabaxthani?” Ndi u ri, “Mudzimu wanga, Mudzimu wanga, wo nndaṱelani?” ₄₇Vhaṅwe vhe vha vha vho ima henefho vha tshi pfa a tshi ralo vha ri, “Ipfani u vho vhidza Elia!” ₄₈Muṅwe wavho a mbo ḓi gidima a dzhia tshiponnzhi a tshi mbwandamedza kha waini yo vhiluluwaho a tshi ṱoma kha thanda a konou tshi isa mulomoni wa Yesu uri a swiswine; ₄₉hone vhaṅwe vha ri, “Mu litsheni ri vhone arali Elia a tshi ḓo ḓa a mu tshidza.” ₅₀Hone Yesu a ṱavha mukosi ha mbo ḓi vha u welela. ₅₁Lupila lwe lwa vha lwo tsira Hukhethwakhethwa lwa mbo ḓi kheruwa nga vhukati u bva nṱha u swika fhasi, shango ḽa dzinginyea, matombo a fhanduwa. ₅₂Zwalo zwa mbo vulea, mivhili ya vhathu vhanzhi vha Mudzimu vho ri siaho ya vuwa, ₅₃musi Yesu o no vuwa vhafuni vha bva zwaloni vha dzhena muḓini mukhethwa vha vhonwa nga vhathu vhanzhi.

₅₄Mulangagomane na vhaṅwe vhe vha vha vha tshi khou linda Yesu vha tshi pfa mudzinginyo, na u vhona zwoṱhe zwo iteaho, vha ofha nga maanḓa vha ri, “Nangoho uyu muthu o vha e Ene Murwa wa Mudzimu!”

₅₅Henefho ho vha hu na vhasadzi vhanzhi vho ima fhaḽa kulenyana vho lavhelesa; ndi vhaḽa vhe vha ḓa na Yesu a tshi bva Galelia vha tshi khou mu shumela. ₅₆Vhaṅwe vhavho ndi Maria Magadalina, na Maria mme a Jakopo na Josefa, na mme a Jakopo na Johanisi, musadzi wa Zebedia.

₅₇Musi ḽi tshi vho kovhela ha ḓa munna o pfumaho wa Arimathia a no pfi Josefa. Na ene o vha e mufunziwa wa Yesu. ₅₈A ya ha Pilato a humbela tshitumbu tsha Yesu, Pilato a ri vha mu fhe. ₅₉Josefa a tshi dzhia a tshi pombedza nga lukhaha, ₆₀a tshi swiṱa tshaloni tshawe tshe tsha vha tsho korwa kha tombo, tshi sa athu swiṱwa muthu. O no ralo a dzhia tombo ḽihulu a ḽi kungulusela mulomoni wa tshalo a tshi tiba ngaḽo a ṱuwa.

₆₁Hezwi a tshi khou swiṱa Yesu, na Maria Magadalina na uḽa muṅwe Maria vho vha vho dzula henefho tsini ha tshalo.

₆₂Ḽi tshi tou tsha nga Sabatha vhotshifhe vhahulwane na Vhafarisei vha kuvhangana vha ya ha Pilato vha mu vhudza ₆₃vha ri, “Muṋe washu, ri kha ḓi elelwa zwe uḽa mudzia-u-xedza-vhathu a vhuya a amba musi a tshi kha ḓi tshila a ri, ‘Ndi ḓo vuwa nga ḓuvha ḽa vhuraru.’ ₆₄Kha vha rume vhathu uri vha yo linda tshalo u swika nga ḓuvha ḽa vhuraru, uri vhafunziwa vhawe vha sa ḓo ḓa vha mu tswa vha ḓo konou vhudza vhathu uri o vuwa vhafuni, ha vho vha u xedza vhathu u fhira zwiḽa zwa u ranga.” ₆₅Pilato a vha fhindula a ri, “Ndi zwone, vhalindi khevha; ṱuwani navho ni linde tshalo nga hune na kona.” ₆₆Vha mbo ya vha tiba tshalo nga tombo, vha ḽi shatela uri ḽi si kunguluswe nga muthu, vha sia vhalindi vha tshi linda.