MATIOSI 25

₁“Zwenezwo muvhuso wa Mudzimu ri nga u fanyisa na vhasidzana vha fumi vhe vha dzhia mbone dzavho vha yo ṱanganedza mukwasha. ₂Vhaṱanu vhavho vho vha vhe matsilu ngeno vhaṱanu vho vha vho ṱalifha. ₃Musi vha matsilu vha tshi dzhia mbone dzavho a vho ngo tsha dzhia na mapfura, ₄ngeno vho ṱalifhaho vho dzhia mbone dzavho khathihi na midzio ya mapfura. ₅Mukwasha a lenga u swika, vhoṱhe vha vhuya vha kumedza vha eḓela.

₆“Vhukati ha vhusiku ha ṱavhiwa mukosi ha pfi, ‘Mukwasha ngoyu o swika! Ibvani ni mu ṱanganedze!’ ₇Vhaḽa vhasidzana vhoṱhe vha mbo ḓi vuwa vha funga mbone dzavho. ₈Vhaḽa vha matsilu vha humbela vho ṱalifhaho vha ri, ‘Na ri fha-vho mapfura mbone dzashu dzi tshi khou dzima.’ ₉Vho ṱalifhaho vha fhindula vha ri, ‘Aiwa, khamusi ri si vhe na mapfura o eḓanaho riṋe na inwi; ndi khwiṋe ni tshi ya ha vharengisi na yo ḓirengela.’

₁₀“Musi vha tshee vho yo renga, mukwasha a mbo swika; zwenezwo vhaḽa vhe vha vha vho ḓilugisa vha dzhena nae munyanyani wa mbingano, vothi ḽa mbo hoṋwa.

₁₁“Ngavhuya vhaḽa vhaṅwe vhasidzana vha swika-vho vha ri, ‘Muṋe washu, muṋe washu, nga vha ri vulele!’ ₁₂Mukwasha a fhindula a ri, ‘Hee inwi, a thi ni ḓivhi!’ ₁₃Zwino-ha, dzulani no fhaṱuwa, a ni ḓivhi ḓuvha na tshifhinga.

₁₄“Muvhuso wa Mudzimu wa dovha wa fana na muthu we a fara lwendo. Musi a sa athu takuwa a vhidza vhashumi vhawe a vha kumedza thundu yawe; ₁₅muṅwe a mu fha thalennde ṱhanu, muṅwe mbili, muṅwe nthihi, muṅwe na muṅwe a tshi fhiwa nga u kona hawe. Ndi hone a tshi takuwa. ₁₆Uḽa mushumi we a kumedzwa thalennde ṱhanu a mbo ḓi ya a dzi shumisa a dzi bindulisa dziṅwe ṱhanu. ₁₇Uḽa o kumedzwaho mbili a ita zwenezwo a dzi bindulisa dziṅwe mbili. ₁₈Uḽa o wanaho nthihi a ya a bwa dindi a dzumba iyo tshelede ya muṋe wawe khaḽo.

₁₉“Zwino ho no fhela maḓuvha manzhi muṋe wa vhaḽa vhashumi a vhuya, a thoma u vhalelana navho tshelede. ₂₀Ha sendela uḽa o fhiwaho thalennde ṱhanu a dzi ḓisa khathihi na dziḽa dziṅwe ṱhanu a ri, ‘Muṋe wanga, vho nkumedza thalennde ṱhanu; zwino ndo vha bindulela dziṅwe ṱhanu asidzi.’ ₂₁Muṋe wawe a mu fhindula a ri, ‘A u vhoni-ha mushumi wanga wavhuḓi a fulufhedzeaho! Vhunga wo fulufhedzea kha hezwi zwiṱuku ndi ḓo u kumedza na zwiṅwe zwihulwane. Iḓa ri takale roṱhe!’ ₂₂Ndi hone hu tshi sendela na uḽa o fhiwaho thalennde mbili a ri, ‘Muṋe wanga, vho nkumedza thalennde mbili, zwino ndo vha bindulela dziṅwe mbili asidzi.’ ₂₃Muṋe wawe a mu fhindula a ri, ‘A u vhoni-ha mushumi wanga wavhuḓi a fulufhedzeaho! Vhunga wo fulufhedzea kha hezwi zwiṱuku ndi ḓo u kumedza na zwiṅwe zwihulwane. Iḓa ri takale roṱhe!’

₂₄“Uḽa o fhiwaho thalennde nthihi na ene a sendela a ri, ‘Muṋe wanga, ndo zwi ḓivha uri vha na tshiṱuhu; vha kaṋa he vha si lime, vha ḓifulela mitshelo he vha si sime muri. ₂₅Ndi zwe nda ofha ngazwo, nda sokou ya nda dzumba tshelede yavho mavuni. Thundu yavho asiyi.’ ₂₆Muṋe wawe a fhindula a ri, ‘Mushumi a sa ḓivhalei! Mubva ndiwe! Hufha wo zwi ḓivha uri ndi kaṋa he ndi si lime, nda ḓifulela mitshelo he ndi si sime muri. ₂₇Khezwi u songo vhea tshelede banngani zwayo, uri musi ndi tshi vhuya ndi wane i na nzwalelo. ₂₈Mu dzhieleni-ha thalennde ni fhe hoyu a re na fumi. ₂₉Ane a vha na zwawe u ḓo engedzwa uri a vhe na zwinzhi; hone a si na u ḓo dzhielwa na zwiṱukuṱuku zwine a vha nazwo. ₃₀Mushumi hoyu a sa ḓivhalei ni mu pose ngei nnḓa swiswini. Henefho hu ḓo vha na zwililo, vha shenganya maṋo nga vhuṱungu.’

₃₁“Musi Mubebwa-nga-muthu a tshi vhuya e vhugalani hawe e na vharuṅwa vhoṱhe, ndi hone a tshi ḓo dzula kha khuluṋoni yawe ya vhugala. ₃₂Tshakha dzoṱhe dzi ḓo kuvhanganywa khoroni yawe. Ndi hone a tshi ḓo khethekanya vhathu sa mulisa a tshi khethekanya nngu na mbudzi. ₃₃U ḓo khadela nngu thungo ya tshanḓa tshauḽa, mbudzi a dzi khadela thungo ya tshamonde. ₃₄Ndi hone Khosi i tshi ḓo amba na vhaḽa vha re thungo ya tshanḓa tshauḽa ya ri, ‘Iḓani inwi no shudufhadzwaho nga Khotsi anga, ni dzhene muvhusoni we na lugiselwa wone u bva tshee shango ḽa tewa. ₃₅Ndo vhuya nda pfa nḓala inwi na mpha zwiḽiwa; nda pfa ḓora na mpha maḓi; ndo vha ndo kovhelelwa inwi na ntswielela; ₃₆ndo vha ndi na tsiku inwi na ntshavhedza; ndi tshi lwala na ḓa na nṱola; musi ndi dzhele na ḓi ḓa u mmbona.’

₃₇“Ndi hone vhavhuya vhaḽa vha tshi ḓo mu fhindula vha ri, ‘Muṋe washu, ndi lini he ra wana vhe na nḓala ra vha ṋea zwiḽiwa kana vhe na ḓora ra vha ṋea maḓi? ₃₈Ndi lini he ra wana vho kovhelelwa ra vha swielela, kana vhe na tsiku ra vha shavhedza? ₃₉Ndi lini he ra wana vha tshi lwala kana vhe dzhele ra ḓa u vha ṱola?’

₄₀“Ndi hone Khosi i tshi ḓo vha fhindula ya ri, ‘Thetshelesani ndi ni vhudze: ndi ri zwenezwiḽa zwe na zwi itela muṅwe wa havha vharathu vhanga vha nyadzeaho, no zwi itela Nṋe.’

₄₁“A konou ḓo amba-vho na vhaḽa vha thungo ya tshanḓa tshamonde a ri, ‘Nṱutsheleni inwi no teketelwaho nga Mudzimu ni ye muliloni wo vhaselwaho diabolo na vharuṅwa vhawe. ₄₂Ndo vhuya nda pfa nḓala ni si mphe zwiḽiwa; nda pfa ḓora ni si mphe maḓi; ₄₃ndo vha ndo kovhelelwa ni si ntswielele, ndi na tsiku ni si ntshavhedze, ndi tshi lwala na musi ndi dzhele ni si ḓe na nṱola.’

₄₄“Ndi hone vha tshi ḓo mu fhindula-vho vha ri, ‘Muṋe washu, ndi lini he ra vha wana vhe na nḓala naho vhe na ḓora kana vho kovhelelwa kana vhe na tsiku kana vha tshi khou lwala naho vhe dzhele ri si vha londe?’

₄₅“Ndi hone a tshi ḓo vha fhindula a ri, ‘Thetshelesani ndi ni vhudze: henefhaḽa he na litsha u zwi itela muṅwe wa havha vha nyadzeaho, ḓivhani uri na Nṋe a no ngo nnyitela.’ ₄₆Zwenezwo ndi hone vha tshi ḓo ṱuwa vha ya tshengeloni i sa gumi, vhavhuya vha tshi ya vhutshiloni vhu sa gumi.”