MATIOSI 10

₁Yesu o vhuya a vhidza vhafunziwa vhawe vha 12, a vha fha maanḓa a u pandela thuṅwa dza Saṱhane na u fhodza malwadze oṱhe na maṱungu oṱhe. ₂Madzina a vhaapostola vha 12 ngea: Wa u thoma ndi Simoni ane ḽiṅwe a pfi Pitrosi, ha tevhela Andrisi murathu wawe; ha tevhela Jakopo ṅwana wa Zebedia na Johanisi murathu wawe, ₃na Filipi, na Batholomio, na Thomasi, na Matiosi uḽa wa muthelisi, na Jakopo ṅwana wa Alifiosi, na Thadiosi, ₄na Simoni Muhali-wa-Mudzimu, na Judasi Iskariote we a vho ḓo fheṱa Yesu.

₅Vhenevho vha 12 Yesu a vha ruma o vha laya a ri, “Ni songo ṱutshela thungo dza vhannḓa; ni songo dzhena miḓini ya Vhasamaria; ₆tshaṋu ni ye ni yo ṱoḓa Vhaisraele, nngu dza Mudzimu dzo xelaho. ₇Tshimbilani ni tshi ḓivhadza vhathu ni ri, ‘Tshifhinga tsho sendela tsha uri ni vhuswe nga Mudzimu.’ ₈Fhodzani vhalwadze, ni vuse vhafu, ni fhodze na vha lwalaho lukanda, ni pandele na thuṅwa dza Saṱhane. No zwi ṋewa nga fhedzi, inwi-vho ni zwi ṋee vhaṅwe nga fhedzi.

₉“Ni songo tshimbila no fara tshelede tshikwamani, ya musuku kana ya siliva naho i ya musina zwayo. ₁₀Na mukhwama wa mbuvha ni songo ṱuwa nawo, na hemmbe ya vhuvhili, kana zwienda kana lubaḓa. Mushumi u fanelwa nga u vhavhalelwa.

₁₁“Musi ni tshi swika muḓini kana ḓoroboni ṱhukhu, ni ṱoḓe o teaho u ni swielela, ni dzule henefho ni vhuye ni fhire. ₁₂Ni tshi dzhena nḓuni ni ri, ‘Mulalo!’ ₁₃Arali muṱa wonoyo wo tewa nga mulalo, nangoho u ḓo vha na mulalo. Arali u songo tewa, mulalo kha u humele kha inwi. ₁₄Hune vha si ni ṱanganedze, vha si thetshelese maipfi aṋu, ni bve nḓuni yeneyo na muḓini wonoyo, ni ite na u fhufhura buse milenzheni yaṋu. ₁₅Thetshelesani ndi ni vhudze: Nga ḓuvha ḽa khaṱhulo zwine zwa ḓo wela vhathu vha muḓi hoyo zwi ḓo vhavha u fhira na zwi no ḓo wela vha Sodoma na Gomora.”

₁₆“Vhonani: ndi ni ruma sa nngu maṱalerwani. Zwino-ha thanyani sa dziṋowa ni ile tshimbevha sa maivha. ₁₇Ni thanyele vhathu: vha ḓo ni khwikhwidzela khoroni dza Majuda; vha ḓo ni rwa sinagogoni dzavho, ₁₈vha ni hwala vha yo ni hwelela kha vhavhusi na mahosi nge na vha vhanga, uri ni vhe ṱhanzi dzanga khavho na kha vhannḓa. ₁₉Hone musi vha tshi ni hwelela ni songo ḽa mbilu nga zwine na ḓo amba. Zwine na ḓo amba ni ḓo ṋewa tshenetsho tshifhinga. ₂₀A si inwi ni ambaho, ndi Muya wa Khotsi aṋu ane a amba e ngomu haṋu.

₂₁“Zwi tshi ralo vhana vha munna vha ḓo hwelelana uri vha vhulahisane; khotsi u ḓo hwelela ṅwana wawe; vhana vha ḓo vutshela vhabebi vhavho vha vha vhulahisa. ₂₂Tshakha dzoṱhe dzi ḓo ni vhenga nge na vha vhanga. Hone ane a ḓo konḓelela a sa litshi ndi ene ane a ḓo tshidzwa. ₂₃Musi vha tshi ni tovhola muḓini uno ni shavhele kha muṅwe. Asizwi: Mubebwa-nga-muthu a tshi swika u ḓo wana ni sa athu ṱanganya miḓi ya Israele.

₂₄“Mufunziwa ha fhiri mufunzi wawe; zwi ḓi nga mushumi a sa fhiri muṋe wawe. ₂₅Mufunziwa nga a fushee zwawe nga u tou lingana na mufunzi wawe; mushumi a fushee nga u lingana zwawe na muṋe wawe. Arali Nṋe muṋe wa nnḓu vho nnyita Belesebulu, vha nga kundwa ngani u ralo-vho na vhafunziwa vhanga?

₂₆“Vhunga zwo ralo ni songo ofha: A hu na tsho tibwaho tshine tsha sa ḓo tibulwa; a hu na tshiphiri tshine tsha sa ḓo ḓihwa nga vhathu. ₂₇Zwine nda ni vhudza swiswini inwi ni zwi ambe tshedzani; zwe nda ni hevhedza ro dzumbama ni zwi huwelele vhukati ha vhathu.

₂₈“Ni songo ofha vhane vha ri u vhulaha muvhili vha si tsha kona u vhulaha na muya. Ofhani Mudzimu; ndi Ene ane a kona u lozwa muya wa muthu khathihi na muvhili heleni.

₂₉“Kani-ha ṱhongola mbili a dzi rengwi nga sente? Naho zwo ralo a hu na na nthihi yadzo ine ya ḓo wela fhasi arali Khotsi aṋu a sa zwi funi. ₃₀Zwino inwi hufha na mavhudzi a ṱhohoni dzaṋu Mudzimu o dzula o a vhala. ₃₁Zwenezwo ni songo ofha tshithu. Hufha ni tshi fhira ṱhongola kule.

₃₂“Ane a si ofhe u ḓibula vhathuni uri ndi wanga, na Nṋe ndi ḓo bula khoroni ya Khotsi anga wa ṱaḓulu uri uyo muthu ndi wanga. ₃₃Hone ane a ḓo nndandula nga u ofha vhathu, Nṋe-vho ndi ḓo mu landula khoroni ya Khotsi anga wa ṱaḓulu.

₃₄“Ni songo ri ndo ḓela u ladza shango; a tho ngo ḓela u ladza shango, ndo ḓisa pfumo! ₃₅Ndo ḓa

₃₇“Ane a funa khotsi kana mme awe u fhira Nṋe, ho ngo fanela u vha wanga. Ane a funa ṅwana wawe u fhira Nṋe, ho ngo fanela u vha wanga. ₃₈Ane a sa hwale tshifhambano tshawe a ntevhela, ho ngo fanela u vha wanga. ₃₉Ane a teledza u ṅaledza vhutshilo hawe u a ḓilozwa; ane a fela Nṋe ndi ene ane a tshila.

₄₀“Ane a ni swielela u swielela Nṋe, ane a ntswielela u swielela o nthumaho. ₄₁Ane a swielela muporofita nge onoyo a vha muporofita u ḓo wana pfufho ya muporofita; ane a swielela muvhuya nge onoyo a vha muvhuya u ḓo wana pfufho ya muvhuya.

₄₂“Ane a vhuya a fha muṅwe wa havha vhaṱuku naho i khavho zwayo ya maḓi a rotholaho nga u vhona e mufunziwa wanga – thetshelesani ndi ni vhudze: ha nga kundwi u wana zwo mu fanelaho.”