LUKASI 21

₁Yesu a tshi lavhelesa a vhona vhapfumi vha tshi khou longa zwifhiwa zwavho bogisini ḽa zwifhiwa. ₂Huno a vhona na iṅwe tshilikadzi i si na tshayo i tshi bvisa masennde mavhili.

₃Yesu a ri, “Zwino ipfani-ha: tshilikadzi hei i si na tshayo yo bvisa zwi no fhira zwa vhaṅwe vhoṱhe; ₄vhaṅwe vho tou ṱusa kha lupfumo lwavho, hu uri uyu musadzi, na vhushai háwe, o bvisa zwoṱhe zwe a vha o fanela u ḽa zwone.”

₅Vhaṅwe vho vha vha tshi khou amba nga thembele, vha tshi sumbedzana matombo avhuḓi e ya fhaṱwa ngao, na nduvho dza u i ṱama dze vhathu vha bvisa. Ndi hone Yesu a tshi ri, ₆“Hu ḓo ḓa tshifhinga tshine hezwi zwoṱhe zwine na zwi vhona zwa ḓo thuthekanywa hu si sale na tombo na ḽithihi nṱha ha ḽiṅwe.”

₇Vha mu vhudzisa vha ri, “Vhafunzi, kha vha ri vhudze uri zwine vha amba zwi ḓo itea lini, na tshiga tshine ra ḓo vhona ngatsho uri zwo sendela.”

₈Yesu a ri, “Ni dzule no fhaṱuwa uri ni si xedzwe; hu ḓo ḓa vhanzhi vha tshi ri ndi vhone Nṋe, muṅwe na muṅwe a tshi ri ndi ene Khristo, kana vha ri, ‘Tshifhinga tsho swika.’ Inwi ni songo vha tevhela. ₉Musi ni tshi pfa mikosi ya dzinndwa na mifhirifhiri ni songo farwa nga nyofho; hezwo zwone zwi fanela u thoma u ḓa, hone zwi sa ambi uri vhufhelo ha shango ndi hone ho swika.”

₁₀A dovha a ri, “Tshakha dzi ḓo bva pfumo dza lwa; na mivhuso i ḓo vutshelana. ₁₁Hu ḓo vha na midzinginyo mihulu ya shango na dzinḓala na dwadze hoṱhe-hoṱhe; hu ḓo vha na zwi ofhisaho na maṱula mahulu kha lutombo. ₁₂Hone musi hezwo zwithu zwi sa athu itea, vha ḓo ni fara, vha ḓo ni tovhola, Majuda vha ḓo ni sengisa sinagogoni dzavho vha ni valela dzhele. Ni ḓo hwelelwa kha mahosi na magota nge na vha vhanga, ₁₃ha ḓo vha hu hone u ni vulela nḓila ya u vha ṱhanzi dzanga. ₁₄Zwine na fanela u dzula no elekanya mbiluni ndi u sa ḽa mbilu na ri ni ḓo fhindula hani, ₁₅ngauri ndi Nṋe ane a ḓo ni ṋea maipfi na vhuṱali ha sa ḓo vha na swina ḽine ḽa nga kona u ni pikisa kana u ni hanedza. ₁₆Ni ḓo fheṱwa nga vhabebi na nga vhe na bebwa navho na nga mashaka, na dzikhonani, vhaṅwe vhaṋu vha vhulawa. ₁₇Vhathu vhoṱhe vha ḓo ni vhenga nge na vha vhanga. ₁₈Naho zwo ralo ndi ri na luvhudzi na luthihi ṱhohoni dzaṋu a lu nga lovhi. ₁₉Na ima no khwaṱha ni sa fheli mbilu, ndi hone ni tshi ḓo tshidzwa.

₂₀“Musi ni tshi vhona Jerusalema u tshi khou tangwa nga dzimmbi, ni mbo ḓi ḓivha uri hu si kale u ḓo thuthekanywa. ₂₁Zwenezwo vha re Judia vha shavhele dzithavhani, vha re muḓini wonoyu vha bve, vha re nnḓa vha songo tsha dzhena. ₂₂Ndi wone musi une Mudzimu a ḓo lifhedza Israele ngawo uri hu khunyelele zwoṱhe zwine Maṅwalo a amba. ₂₃Maḓuvha eneo vho vhifhaho muvhilini na vha mamisaho zwi ḓo vha vhifhela nga maanḓa. Hu ḓo vha na u tambula huhulu fhano shangoni, huno ṱhamu ya Mudzimu i ḓo rwa vhathu avho. ₂₄Vhaṅwe vha ḓo ḽiwa nga pfumo, vhaṅwe vha thubiwa vha itwa dziphuli mashangoni oṱhe, Jerusalema u ḓo kandekanywa nga vhannḓa tshifhinga tshe vha ṋewa tsha vhuya tsha fela.

₂₅“Hu ḓo vha na maṱula kha ḓuvha na kha ṅwedzi na ṋaledzi. Hu ḓo vha na u hanganea na u ḓaḓa ha dzitshakha fhano shangoni nga u ofha magabelo a lwanzhe na u unga halwo. ₂₆Vhanna vha ḓo ṋoka nga u ofha zwine zwa ḓo wela shango ḽoṱhe, ngauri zwi re lutomboni zwi ḓo thudziwa zwa bva nḓilani dzazwo. ₂₇Zwenezwo vha ḓo vhona Mubebwa-nga-muthu a tshi ḓa e kha gole e na maanḓa na vhugala vhuhulu. ₂₈Musi zwenezwo zwi tshi thoma u itea, inwi takuwani ni lavhelele; u vhofhololwa haṋu hu ḓo vha hu tsini.”

₂₉Ndi hone Yesu a tshi vha fanyisela a ri, “Kha ri fanyise nga muhuyu na miri miṅwe yoṱhe. ₃₀Na vhona i tshi ṱuma lurere ni mbo ḓi ḓivha uri tsho limuwa. ₃₁Na zwenezwo zwi ḓo ḓi tou ralo: zwithu izwo zwi tshi itea ndi hone ni tshi ḓo ḓivha uri muvhuso wa Mudzimu u tsini.

₃₂“Zwino ipfani-ha: zwoṱhe zwi ḓo itea vhathu vha tshilaho zwino vha sa athu fa. ₃₃Ḽiṱaḓulu na shango zwi ḓo lovha, maipfi anga one ha nga weli fhasi.

₃₄“Ni thanyele u rongomedzwa nga vhupangwa na nga vhudakwa na u ṱolou ḽa mbilu nga zwa vhutshilo vhuno, na tshenuwa ḓuvha heḽo ḽo swika, ₃₅ḽa nga mulavhu, ḽa fasha vhathu vhoṱhe vha dzulaho shangoni. ₃₆Dzulani no fhaṱuwa ni tshi rabela, uri ni wane nungo dza u ponyoka zwoṱhe zwenezwo zwine zwa ḓo bvelela, na u ima phanḓa ha Mubebwa-nga-muthu nga ḓuvha ḽa khaṱhulo.”

₃₇Nga maḓuvha eneo Yesu o vha a tshi funza thembeleni nga masiari, nga madekwana a tshi bva muḓini a ya thavhani ine ya pfi Yamiolivi, a lala hone. ₃₈Nga matsheloni vhathu vhoṱhe vho vha vha tshi bubela thembeleni u pfa a tshi amba.