JOSHUA 21

₁Vharangaphanḓa vha miṱa ya Vhalivi vha ya ha tshifhe Eliasara na ha Joshua ṅwana wa Nunu na ha vhaṋe vha miṱa ya matsinde oṱhe a Israele. ₂Henefho Shilo shangoni ḽa Kanana vha vha vhudza vha ri, “Muṋe washu o laya nga mulomo wa Mushe uri riṋe ri ṋewe-vho miḓi ri dzule khayo, khathihi na shango ḽa pfulo ya kholomo dzashu, u mona na iyo miḓi.” ₃Vhaisraele vha mbo ṋea Vhalivi miṅwe miḓi na mashango a pfulo shangoni ḽavho, vha tshi tevhedza zwe Muṋe washu a laya.

₄Miṱa ya Vhalivi vha mutupo wa Kehathi vho vha vhone vha u thoma u kovhelwa miḓi. Miṱa ya lutsinga lwa tshifhe Aroni vha kovhelwa miḓi ya 13 i re shangoni ḽa Juda na Simioni na Benyamini. ₅Vhaṅwe vha mutupo wa Kehathi vho salaho vho kovhelwa miḓi ya fumi i re shangoni ḽa Efraimi na Dani na Manase wa vhukovhela.

₆Vha mutupo wa Gerisoni vha kovhelwa miḓi ya 13 shangoni ḽa Isakhara na Ashere na Nafuthali na Manase ḽa vhubvaḓuvha ḽi re Bashani.

₇Miṱa ya mutupo wa Mirari vho kovhelwa miḓi ya 12 shangoni ḽa Rubeni na Gadi na Zebuloni.

₈Vhaisraele vho kovhela Vhalivi miḓi heyo na mashango ayo a pfulo nga u ita madeṅwa nga he Muṋe washu a laya nga mulomo wa Mushe.

₉Khea madzina a miḓi ya shangoni ḽa Juda na Simioni yo kovhelwaho ₁₀vhaḓuhulu vha Aroni vha mutupo wa Kehathi, wa lutsinga lwa Livi. Vhenevho ndi vhone vho thomaho u wana mukovhe. ₁₁Vho kovhelwa Muḓi wa Araba (Araba ndi khotsi a Anaka), une zwino wa pfi Hebroni, mivhunduni ya Juda, khathihi na pfulo ḽawo. ₁₂Hone masimu a uyo muḓi, khathihi na ḓorobo dzawo, zwo vha zwo no ḓi ṋewa Khalebe ṅwana wa Jefune uri zwi vhe zwawe.

₁₃U engedza muḓi wa Hebroni (muṅwe wa miḓi ya vhushavhelo), kheino miḓi ye ya kovhelwa vhaḓuhulu vha tshifhe Aroni: Libina ₁₄na Jathiri na Eshthemua ₁₅na Holoni na Debiri ₁₆na Aini na Juta na Bethe Shemeshe, khathihi na mashango ayo a pfulo. Ndi miḓi miṱanu na miṋa ya matsinde a Juda na Simioni. ₁₇Shangoni ḽa Benyamini vho ṋewa miḓi miṋa: Gibioni na Geba ₁₈na Anathotho na Alimoni, khathihi na mashango ayo a pfulo. ₁₉Miḓi yoṱhe yo ṱangana ndi 13 khathihi na mashango ayo a pfulo, zwo kovhelwa vhotshifhe vhaḓuhulu vha Aroni.

₂₀Vhaṅwe vha miṱa vha Vhalivi vha mutupo wa Kehathi vho kovhelwa miṅwe miḓi i re shangoni ḽa Efraimi. ₂₁Vho kovhelwa miḓi miṋa: Shikheme na mashango awo a pfulo mivhunduni ya Efraimi (ndi muṅwe wa miḓi ya vhushavhelo), na Gezere ₂₂na Kibitsaimi na Bethe Horoni, khathihi na mashango ayo a pfulo. ₂₃Shangoni ḽa Dani vho kovhelwa miḓi miṋa: Elitheke na Gibithoni ₂₄na Ayaloni na Gathi Rimoni, khathihi na mashango ayo a pfulo. ₂₅Shangoni ḽa Manase ḽa vhukovhela vho kovhelwa miḓi mivhili: Thaanakha na Gathi Rimoni, khathihi na mashango ayo a pfulo. ₂₆Miṱa heyo ya mutupo wa Kehathi vho kovhelwa miḓi ya fumi yo ṱangana, khathihi na mashango ayo a pfulo.

₂₇Vha tshiṅwe tshigwada tsha Vhalivi vha mutupo wa Gerisoni, shangoni ḽa Manase ḽa vhubvaḓuvha vho kovhelwa miḓi mivhili: Golani u re Bashani (Ndi muṅwe wa miḓi ya vhushavhelo) na Ashtharotho, khathihi na mashango ayo a pfulo. ₂₈Shangoni ḽa Isakhara vho kovhelwa miḓi miṋa: Kishioni na Daberatha ₂₉na Jaramuthu na Eni Ganimu, khathihi na mashango ayo a pfulo. ₃₀Shangoni ḽa Ashere vho kovhelwa miḓi miṋa: Mishala na Abudoni ₃₁na Helekatha na Rehobo, khathihi na mashango ayo a pfulo. ₃₂Shangoni ḽa Nafuthali vho kovhelwa miḓi miraru: Kedeshe u re Galelia, khathihi na mashango awo a pfulo (ndi muṅwe wa miḓi ya vhushavhelo), na Hamotho Doro na Karathani, khathihi na mashango ayo a pfulo. ₃₃Miṱa yo fhambanaho ya mutupo wa Gerisoni yo kovhelwa miḓi ya 13 yo ṱangana, khathihi na mashango ayo a pfulo.

₃₄Vhaṅwe Vhalivi vho salaho vha mutupo wa Mirari, shangoni ḽa Zebuloni vho kovhelwa miḓi miṋa: Jokoniamu na Karitha ₃₅na Dimina na Nahalali, khathihi na mashango ayo a pfulo. ₃₆Shangoni ḽa Rubeni vho kovhelwa miḓi miṋa: Betsere na Jahatsa ₃₇na Kedemotho na Mifaathi, khathihi na mashango ayo a pfulo.

₃₈Kha tsinde ḽa Gadi vho kovhelwa miḓi miṋa: Ramotho u re Giliadi, khathihi na mashango awo a pfulo (ndi muṅwe wa miḓi ya vhushavhelo), na Mahanaimi ₃₉na Hesheboni na Jazere, khathihi na mashango ayo a pfulo. ₄₀Vha mutupo wa Mirari vho kovhelwa miḓi ya 12 yo ṱangana yoṱhe.

_41-42Shangoni ḽe ḽa vha ḽi ḽa Vhaisraele, Vhalivi vho kovhelwa miḓi ya 48 yoṱhe yo ṱangana, khathihi na mashango ayo a pfulo.

₄₃Zwo tou ralo Muṋe washu a tshi ṋea Vhaisraele shango ḽoṱhe ḽe a vha o fulufhedzisa vhomakhulukuku wavho nga muano uri u ḓo vha ṋea. Huno vha ḽi dzhia, vha dzula henefho. ₄₄Muṋe washu a ladza shango ḽavho ḽoṱhe, nga he a fulufhedzisa vhomakhulukuku wavho. Ho vha hu si na na muthihi wa maswina avho oṱhe we a vha a tshi kona u imedzana navho, ngauri Muṋe washu o vha kumedza maswina avho oṱhe. ₄₅Muṋe washu a khunyeledza zwivhuya zwoṱhe zwe a fulufhedzisa Vhaisraele, a hu na ipfi na ḽithihi ḽe ḽa wela fhasi.