JONASI 4

₁Jonasi a ri u vhona izwo zwa mu dina, a sinyuwa. ₂Jonasi a rabela Muṋe washu a ri, “Muṋe washu, izwi a si zwenezwiḽa zwe nda ri zwi ḓo vha hone, zwiḽa ndi tshi kha ḓi vha hayani naa? Ndi zwe nda ṱavhanya u shavhela Tharashishi. Ndo vha ndi tshi zwi ḓivha uri Iwe u Mudzimu wa tshilidzi na khathutshelo, a u ṱavhanyi u sinyuwa, u na lufuno luhulu, u Mudzimu ane a litsha u ḓisa khombo. ₃Zwino-ha, Muṋe washu, mmbulahe, ndi khwiṋe ndi tshi fa u fhira uri ndi tshile.”

₄Hone Muṋe washu a fhindula a ri, “U na pfanelo ya u sinyuwa naa?”

₅Jonasi o vha o bva muḓini a livha vhubvaḓuvha ha muḓi, a dzula fhasi. Henefho o vha a tshi ṱoḓa u ḓifhaṱela mushasha uri a dzule murunzini wawo, a lindele, a vhone zwine zwa ḓo wela uyo muḓi. ₆Ndi hone Mudzimu Muṋe washu a tshi medza muri wa lukumbe, wa lapfa wa tsireledza Jonasi uri ṱhoho yawe i wane murunzi, wa mu tsireledza u fhisa ha ḓuvha, Jonasi a takalela uyo muri wa lukumbe. ₇Hone nga matshelo mapfuvhi a tshi tswuka, Mudzimu a ḓisa tshivhungu tsha kora uyo muri, wa puta. ₈Musi ḓuvha ḽi tshi bva Mudzimu a ḓisa muya u fhisaho u tshi bva vhubvaḓuvha, ḓuvha ḽa fhisa Jonasi ṱhoho a fhelelwa nga nungo. Jonasi a humbela u fa a ri, “Ndi khwiṋe ndo fa u fhira uri ndi tshile.”

₉Hone Mudzimu a vhudzisa Jonasi a ri, “U ita zwone u tshi sinyuwa nga u vhona muri u tshi fa naa?”

Jonasi a fhindula a ri, “Ndo fanela u sinyuwa, ndo sinyuwa lune nda nga fa!”

₁₀Muṋe washu a mu vhudza a ri, “Iwe u pfa vhuṱungu nga u vhona muri hoyo u tshi fa. A wo ngo u shumela, a wo ngo u sheledza, wo mela nga vhusiku vhuthihi, wa fa nga vhusiku vhuthihi. ₁₁Muḓi wa Ninive u na vhathu vha no fhira 120 000, vha sa ḓivhi tshi re tshone na tshi si tshone, ha dovha ha vha na kholomo nnzhi. Muḓi wonoyo muhuluhulu Nṋe a tho ngo fanela u pfa vhuṱungu u tshi lovha naa?”