JOHANISI 12

₁Musi hu tshee ho sala maḓuvha maṱanu na ḽithihi i tshi vha Paseka, Yesu a ya Bethania he ha vha hu tshi dzula Lazaro, uḽa we a mu vusa vhafuni. ₂Henefho vha mu bikela, Marita a vha ene a vha ṋeaho zwiḽiwa. Lazaro ndi muṅwe wa vhe vha vha vha tshi khou ḽa na Yesu. ₃Ndi hone Maria a tshi dzhia hafulitha yoṱhe ya mapfura a u nukhelela a mutengo muhulu o itwaho nga munadi u songo vangwaho, a a shela kha milenzhe ya Yesu a phumula nga mavhudzi awe, munukho wa u ḓifhelela wa tou ḓadza nnḓu yoṱhe.

₄Zwino muṅwe mufunziwa wa Yesu we a vho ḓo mu fheṱa, a no pfi Judasi Iskariote a ri, ₅“Enea mapfura ane a rengwa nga malamba a muthu wa munna a ṅwaha woṱhe! Khezwi a songo rengiswa, tshelede ya ṋewa zwayo vhashai?” ₆A tshi ralo ho vha hu si u lilela vhashai, ndi ngauri o vha e fobvu, e ene mufaratshikwama, a tshi ḓi ita a tshi ṱumbulanyana.

₇Hone Yesu a ri, “Mu litsheni, aya mapfura o a vhulungela ḓuvha ḽine muvhili wanga wa khou lugiselwa u swiṱwa. ₈Vhashai ni ḓo ḓi vha navho misi yoṱhe; Nṋe a ni nga vhi na Nṋe misi yoṱhe.”

₉Gogo ḽihuluhulu ḽa Majuda ḽi tshi pfa uri Yesu u Bethania ḽa ya hone. U ya havho ho vha hu si u ela Yesu fhedzi, vho vha vho ya u vhona na Lazaro we Yesu a mu vusa vhafuni. ₁₀Ndi zwe vhotshifhe vhahulwane vha vho ita tshimbevha tsha u vhulaha na ene Lazaro, ₁₁ngauri Majuda vhanzhi vho vha vha tshi vho ṱutshela vharangaphanḓa vhavho vha fulufhela Yesu nga u vhona zwe zwa itea kha ene Lazaro.

₁₂Nga matshelo ḽiḽa gogo ḽihuluhulu ḽe ḽa vha ḽo ḓa vhuṱamboni ha Paseka ḽa zwi pfa uri Yesu u ḓo vha a tshi khou ḓa Jerusalema. ₁₃Vha dzhia maṱari a mutshevho vha yo mu ṱanganedza vha tshi khou huvha mihuvho vha tshi ri,

₁₄Yesu a wana donngi a i namela, vhunga zwo ṅwaliwa kha Maṅwalo ha pfi,

₁₆Hone vhafunziwa vhawe a vho ngo kona u zwi ṱalukanya nga tshifhinga tshenetsho; vho ḓo tou sala vha tshi elelwa musi o no iswa vhugalani uri Maṅwalo iṱali o ḓi mu amba nga u ralo, ha vha hu hone vha tshi vho zwi vhona uri ndi zwenezwiḽa zwe vha mu itela zwone.

₁₇Vhaḽa vhathu vhe vha vha vhe na Yesu zwiḽa a tshi vusa Lazaro vhafuni nga u tou mu vhidza a bva tshaloni, na vhone vho vha vho no ḓi anḓadza zwe zwa itea. ₁₈Ndi zwe vhathu vha yo mu ṱanganedza, nge vha pfa hu tshi pfi o ita maḓembe mangafhongafho. ₁₉Vhafarisei vha tshi zwi vhona vha amba nga tshavho vha ri, “Ni khou zwi vhona, zwoṱhe zwine ra khou ita a zwi khou vhuya zwa farisa tshithu; shango ḽoṱhe ḽi vho mu tevhela.”

₂₀Zwino kha vhe vha ya u rabela vhuṱamboni ho vha hu na vhaṅwe vhathu vha Magiriki. ₂₁Vhenevho vha ḓa ha Filipi wa Betsaida kha ḽa Galelia, vha ri, “Thovhela, ri khou humbela u amba na Yesu.”

₂₂Filipi a ya a vhudza Andrisi, vhuvhili havho vha swikisa iyo khumbelo ha Yesu. ₂₃Ene a tshi vha fhindula a ri, “Zwino ndi hone tshifhinga tsho swika tsha uri hu vhonale vhugala ha Mubebwa-nga-muthu. ₂₄Zwino ipfani-ha: Arali thoro ya goroi i sa tou thoma u wela mavuni ya fa i ḓo ḓi dzula i nthihi; ya fa ndi hone i tshi ita dziṅwe thoro nnzhi. ₂₅Ane a tata u ṅaledza vhutshilo hawe u a ḓilozwa; ane a vhu ṅala e fhano shangoni u ḓo vha o ḓivhulungela vhutshilo vhu sa gumi. ₂₆Ane a funa u ntshumela u fanela u vha mufunziwa wanga, uri sa mushumeli wanga, a swike-vho hoṱhe hune Nṋe nda vha hone. Ane a ntshumela u ḓo huliswa nga Khotsi anga.

₂₇“Zwino ndi hone-ha ndo tou hanganea; a thi ḓivhi na uri ndi nga tou ri mini. Ndi nga tou ri, ‘Khotsi anga, ntinyise uno musi wa vhuṱungu’ naa? Zwino hufha ndi tshi ḓa ndó ḓela hone uri ndi fhire kha wonoyu musi wa vhuṱungu! ₂₈Khotsi anga, ndi ri dzina ḽau nga ḽi huliswe!”

Zwenezwo ha pfala ipfi ḽi bvaho ṱaḓulu ḽi tshi ri, “Ndo no ḓi sumbedza vhugala hanga nahone ndi kha ḓi ḓo dovha nda vhu sumbedza.”

₂₉Gogo ḽo imaho henefho ḽi tshi pfa ipfi ḽa ri, “Mvula yo bvuma!”

Vhaṅwe vha ri, “Ndi muruṅwa we a amba nae.”

₃₀Yesu Ene a ri, “Ipfi heḽi ḽi tshi vhuya ḽa pfala a si u itela Nṋe, ndi u itela inwi. ₃₁Zwino ndi hone-ha ho swika tshifhinga tsha uri ḽino shango ḽi haṱulwe; ndi hone muvhusi wa ḽino shango a tshi khou bviswa vhuhosini. ₃₂Musi ndi tshi ḓo takulelwa nṱha ndi ḓo kokodza vhathu vhoṱhe vha ḓa kha Nṋe.” ₃₃A tshi ralo o vha a tshi khou amba lufu lune a ḓo lu fa.

₃₄Vhathu vha tshi mu fhindula vha ri, “Hufha riṋe ro pfa kha Mulayo hu tshi pfi Mesia u ḓo dzula e hone lini na lini, zwino vhone vha tshi ri Mubebwa-nga-muthu u ḓo takulelwa nṱha vha amba hani? Mubebwa-nga-muthu onoyo matsina ndi nnyi?”

₃₅Yesu a fhindula a ri, “Tshedza tshi kha ḓi ḓo vha na inwi tshifhinga tshiṱukuṱuku. Tshimbilani zwino tshedza tshi tshee hone uri swiswi ḽi sa ḓo ni fara nḓilani. Hafhu ane a tshimbila swiswini ha ḓivhi hune a ya. ₃₆Fulufhelani tshedza zwino ni tshi kha ḓi vha natsho, ndi hone ni tshi ḓo kona u vha vhathu vha tshedza.”

Yesu a ri u ralo a ṱuwa a ya a vha dzumbama.

₃₇Naho o vha o vha sumbedza zwiga zwa maḓembe mangafho, vha tshi tou zwi vhona nga maṱo, a vho ngo mu fulufhela, ₃₈hu uri hu khunyelele zwiḽa zwe muporofita Yesaya a zwi amba a tshi ri,

₃₉Ndi zwone zwe vha si kone u fulufhela, ngauri ene Yesaya o dovha a ri,

₄₁Yesaya a tshi ralo o vha o vhona vhugala ha Yesu a ṱanzilela ngae.

₄₂Nangwe zwo ralo na vhahulwane vhanzhi vha Majuda vho mu fulufhela, hone vha si kone u tou zwi amba khagala nga u ofha Vhafarisei, uri vha sa vho ḓo vha tumula tshivhidzoni. ₄₃Ndi uri vho vha vha tshi funa u huliswa nga vhathu u fhira u huliswa nga Mudzimu.

₄₄Yesu Ene a vhidzelela a ri, “Ane a mpfulufhela ha fulufheli Nṋe, u fulufhela we a nthuma. ₄₅Hu ḓi nga ane a vhona Nṋe, u vhona o nthumaho. ₄₆Nṋe ndo ḓa shangoni ndi tshedza, uri vhoṱhe vhane vha mpfulufhela vha si tsha dzula swiswini. ₄₇Ane a pfa maipfi anga a si a tevhedze a si uri ndi Nṋe ane nda mu haṱula. A tho ngo ḓela u haṱula shango, tshe nda ḓela tshone ndi u tshidza shango. ₄₈Tshi hone tshi haṱulaho muthu ane a nndandula a si ṱanganedze mafhungo anga: Enea maipfi ane nda amba a ḓo vha one a mu haṱulaho nga ḓuvha ḽa vhufhelo, ₄₉ngauri a thi sokou ḓiambela, Ene Khotsi anga o nthumaho o nndaya zwine nda fanela u amba nda zwi vhudza vhathu. ₅₀Zwino Nṋe ndi a ḓivha uri zwe a nndaya zwi ḓisa vhutshilo vhu sa gumi. Zwenezwo zwe Khotsi a nndaya ndi zwone zwine nda amba.”