JEREMIA 44

₁Ipfi heḽi ḽo ḓela Jeremia ḽi tshi amba Majuda vhoṱhe vha dzulaho Egipita, miḓini ya Migidolo na Thaphanese na Memfisi na thungo ya tshipembe ya shango, ḽi ri, ₂“Yahavee Mulangazwoṱhe Mudzimu wa Israele u ri: Inwi vhaṋe no vhona khombo khulu ye nda i ḓisa Jerusalema na miḓini ya Juda. Ṋamusi a i tsha dzula vhathu, ndi matumba ₃nga mulandu wa vhuvhi he vha ita. Vho ntsinyusa nga u fhisa zwioro na nga u luvha midzimu isili ye vhone vhaṋe na inwi na vhokhotsi avho vha si vhuye vha i ḓivha. ₄Ndo ruma vhaḓinḓa vhanga vhaporofita nda dovha ndi tshi ri, ‘Ni songo ita zwithu hezwi zwi nengisaho zwine nda zwi vhenga!’ ₅Hone a vho ngo thetshelesa, a vho ngo zwi londa, a vho ngo laṱa vhutshinyi havho, a vho ngo litsha u fhisela miṅwe midzimu zwioro. ₆Ndi zwe mbiti dzanga dzi ofhisaho dza shuluwa; ndo sinyutshela miḓi ya Juda na magondo a Jerusalema nda zwi ita matumba a sa dzuli muthu sa zwine ṋamusi zwa vhonala zwo ralo.

₇“Zwino Nṋe Yahavee Mulangazwoṱhe Mudzimu wa Israele ndi ri: Ndi mini ni tshi ḓihwesa khombo nngafhangafha nga u lozwa vhanna na vhasadzi na vhana na dzitshetshe kha ḽa Juda, na sala ni si tshee na tsalela dza vhathu? ₈Ndi mini ni tshi ntsinyusa nga midzimu ye na ita nga zwanḓa zwaṋu, na dubisela miṅwe midzimu zwioro fhano Egipita, he na yo dzula hone? Ni ḓo ḓilozwa, vhathu vha teketelana nga dzina ḽaṋu, na nyadziwa nga tshakha dzoṱhe dza ḽifhasi. ₉No no hangwa vhuvhi ho itwaho nga vhokhotsi aṋu na nga mahosi na vhafumakadzi vha Juda na vhuvhi he inwi na vhasadzi vhaṋu na ita shangoni ḽa Juda na mikotoni ya Jerusalema naa? ₁₀Na ṋamusi a vha athu ḓiṱukufhadza kana vha nnyofha, a vha athu tevhedza mulayo wanga na ndayo dze nda vhetshela inwi na vhokhotsi aṋu.”

₁₁“Zwenezwo, Muṋe washu Mulangazwoṱhe Mudzimu wa Israele u ri, ‘Ndo ḓiimisela u ni ḓisela khombo, nda lozwa ḽa Juda ḽoṱhe. ₁₂Ndi ḓo lozwa tsalela dza vhathu vha Juda vho ḓiimiselaho u ya Egipita u yo dzula hone. Vhoṱhe vhahulwane na vhaṱuku vha ḓo lovhela Egipita; vha ḓo ḽiwa nga pfumo, vha fa nga nḓala. Vhathu vha ḓo vha sanda, vha vha nyadza, vha teketelana nga dzina ḽavho, vha vha sea. ₁₃Vha no dzula Egipita ndi ḓo vha vhulaha nga pfumo na nḓala na dwadze, nda vha ita zwe nda ita vha Jerusalema. ₁₄A hu na na muthihi wa tsalela dza vhathu vha Juda vhe vha yo dzula Egipita a no ḓo ponyoka kana a tshila a dovha a humela shangoni ḽa Juda ḽine vha ṱuvha u humela khaḽo vha dzula khaḽo; a hu na a no ḓo humela hone, hu ḓo tou vhuelela tshavhi dzi si gathi.’ ”

₁₅Huno vhanna vhoṱhe vhe vha vha vha tshi ḓivha uri vhasadzi vhavho vha dubisela miṅwe midzimu zwioro, khathihi na vhasadzi vhoṱhe vhe vha vha vhe henefho – gogo ḽihulu – na vhathu vhoṱhe vhane vha dzula tshipembe ha Egipita, vha amba na Jeremia vha ri, ₁₆“A ri nga thetshelesi zwe wa ri vhudza nga dzina ḽa Muṋe washu! ₁₇Vhukumakuma ri ḓo ita zwoṱhe zwe ra ri ri ḓo ita: Ri ḓo dubisela Mufumakadzi wa ṱaḓulu zwioro, ra mu tevhulela thevhula sa zwe riṋe na vhokhotsi ashu na mahosi ashu na vhahulwane vhashu ra ita miḓini ya Juda na mikotoni ya Jerusalema. Misi yeneyo ro vha ri na zwiḽiwa zwinzhi, ro pfuma, ri sa vhoni khombo. ₁₈Hone tshee ra litsha u dubisela Mufumakadzi wa ṱaḓulu zwioro, ra si tsha mu tevhulela thevhula, ri vho shaya, ri khou lovha nga pfumo na nḓala.”

₁₉Vhasadzi vha ḓadzisa vha ri, “Zwiḽa ri tshi dubisela Mufumakadzi wa ṱaḓulu zwioro, ra mu tevhulela thevhula, vhanna vhashu vho vha vha sa zwi ḓivhi kani uri ro vha ri tshi bika khekhe ra mu fanyisa ngadzo, ra mu tevhulela thevhula?”

₂₀Ndi hone Jeremia a tshi vhudza vhathu vhoṱhe, vhanna na vhasadzi vhe vha vha vha tshi khou mu fhindula, a ri, ₂₁“Zwiḽa zwioro zwe zwa vha zwi tshi fhiswa nga inwi na vhokhotsi aṋu na mahosi aṋu na vhahulwane vhaṋu na vhathu zwavho miḓini ya Juda na mikotoni ya Jerusalema, ni vhona unga Muṋe washu o vha a sa zwi ḓivhi, o zwi hangwa naa? ₂₂Musi Muṋe washu a si tsha kona u konḓelela zwiito zwaṋu zwivhi na zwi nengisaho zwe na ita, a phusukanya shango ḽaṋu ḽa sala ḽi soga ḽi sa dzuli muthu, vhathu vha vho teketelana ngaḽo sa zwine ḽa vha zwone ṋamusi. ₂₃Vhunga ni tshi khou zwi vhona, no welwa nga khombo nge na dubisa zwioro na khakhela Muṋe washu na si thetshelese mulayo wawe na ndaela dzawe dze a ri dzi itwe.”

₂₄Zwenezwo Jeremia a amba na vhathu vhoṱhe khathihi na vhasadzi a ri, “Inwi vhathu vha Juda noṱhe ni re Egipita, ipfani ipfi ḽa Muṋe washu! ₂₅Muṋe washu Mulangazwoṱhe Mudzimu wa Israele u ri: Inwi na vhasadzi vhaṋu no sumbedza nga zwiito zwaṋu zwe na ana zwiḽa ni tshi ri, ‘Vhukumakuma ri ḓo khunyeledza zwe ra ana ra ri ri ḓo dubisa zwioro ra tevhulela Mufumakadzi wa ṱaḓulu thevhula.’ Zwenezwo isani phanḓa, itani zwe na ana! Khunyeledzani muano waṋu! ₂₆Hone inwi Majuda noṱhe ni no dzula Egipita, ipfani ipfi ḽa Muṋe washu u ri, ‘Nṋe Yahavee ndi ana nga dzina ḽanga ḽihulu, ndi ri a hu na na muthihi a no bva kha ḽa Juda a no khou dzula huṅwe Egipita a no ḓo dovha a ana nga dzina ḽanga a ri: Nga Muṋe wa zwoṱhe Yahavee a tshilaho. ₂₇Ndi dzula ndo vha vhea iṱo uri ndi vha huvhadze, a thi nga vha takadzi; Majuda vha re Egipita vha ḓo lovha nga pfumo na nḓala vha vhuye vha lozwiwe vhoṱhe. ₂₈Vhane vha ponyoka pfumo, vha humela shangoni ḽa Juda vha tshi bva Egipita vha ḓo vha vha si gathi. Ndi hone tsalela dzoṱhe dza vhathu vha Juda vhe vha pfulutshela Egipita vha tshi ḓo ḓivha uri ipfi ḽi sa weli fhasi ndi ḽanga kana ndi ḽavho.

₂₉“ ‘Hetshi tshi ḓo vha tshone tshiga tshine na ḓo vhona ngatsho uri ndi dzula ndo ni vhea iṱo, ndi ḓo ni pfisa vhuṱungu hafhano fhethu,’ u ralo Muṋe washu, ‘uri ni ḓivhe uri zwe nda ri ndi ḓo ni huvhadza, vhukumakuma a zwi nga weli fhasi.’ ₃₀Muṋe washu u ri, ‘Farao Hofra khosi ya Egipita ndi ḓo mu kumedza maswina awe vhane vha ṱoḓa u mu vhulaha, sa zwe Tsedekia khosi ya Juda nda mu kumedza Nebukhadnetsara khosi ya Babele, ḽone swina ḽawe ḽe ḽa vha ḽi tshi ṱoḓa u mu vhulaha.’ ”